Fokotuʻu ko Hoʻo Taumuʻá ke Fai ha Ako Tohi Tapu
1 “Mou hanga hake muʻa ki he ngaahi ngoue na: vakai, kuo fisi hina ia ki he ututaʻu.” (Sione 4:35) Ko e ngaahi lea ko ia naʻe leaʻaki ʻe Sīsū Kalaisí ʻoku ngāueʻaki moʻoni ki he tuʻunga ʻoku fehangahangai mo e kau faifekau Kalisitiane he ʻaho ní.
2 ʻOku kei ʻi ai ʻa e kakai loto-totonu ʻoku nau loto ke ako ʻa e ngaahi founga ʻa Sihová. ʻOku hā ʻeni ʻi he tokolahi ʻo e kau ākonga foʻou kuo papitaiso ʻi he taʻu taki taha. Kapau ʻokú ke mahuʻingaʻia moʻoni ʻi hono fai ha ako Tohi Tapu, ko e hā nai te ke faí?
3 Fokotuʻu ha Taumuʻa: ʻUluakí, fokotuʻu ha taumuʻa ke kamata pea fakahoko ha ako Tohi Tapu tuʻumaʻu. Fakakaukau ki hoʻo taumuʻá he lolotonga hoʻo kau ki he ngāue fakamalangá. Koeʻuhi ko ʻetau ngāue faka-Kalisitiané ʻoku kau ki ai ʻa e faiakó mo e malangá, ko e kotoa ʻo kitautolú ʻoku totonu ke tau feinga ke kau lahi ange ki he ngāue fakaeako Tohi Tapú.—Mt. 24:14; 28:19, 20.
4 Ngaahi Poini Kehe ke Fakakaukau ki Ai: Ko e lotu fakamātoató ko e meʻa ia kuo pau ke fai ʻe he kau malanga ʻo e Puleʻangá. ʻI he taimi ʻe niʻihi, ʻoku tau maʻu ai ha kakai kuo nau lotu ʻo fekauʻaki mo ha tokoni fakalaumālie. Ko ha tāpuaki ia ke ngāueʻaki kitautolu ʻe Sihova ke kumi pea akoʻi ʻa e faʻahinga peheé!—Hak. 2:7; Ng. 10:1, 2.
5 Naʻe lotu ha tuofefine fekauʻaki mo ha ako Tohi Tapu peá ne fakaʻaliʻali leva ʻa e ngaahi tatau ʻo e tuleki Te Ke Saiʻia ke ʻIlo Lahi Ange ki he Tohi Tapú? ʻi he ngāueʻangá. ʻI he taimi naʻe toʻo hake ai ʻe ha fefine ʻa e taha ʻo e ngaahi tulekí ʻo lau kotoa pea kamata ke fakafonu ʻa e kūponí, naʻe lea atu ʻa e tuofefiné kiate ia pea naʻe malava ke kamata ai ha ako Tohi Tapú.
6 ʻE lava ke tokoniʻi koe ʻe he kaungā malanga ʻoku nau ola lelei ʻi hono kamata mo fai ha ngaahi ako Tohi Tapú ke ke aʻusia ai hoʻo taumuʻa ke fai ha ako Tohi Tapú. Lotu fekauʻaki mo ha ako, pea ngāueʻaongaʻaki ʻa e tokoni kotoa ʻoku ala maʻu ke aʻusia ai ʻa e taumuʻa ko ʻení. Mahalo ʻe vave ai ke ke maʻu ha fiefia ʻi hono fai ha ako Tohi Tapu.