Ko Hono Kamata ha Ngaahi Ako Tohi Tapu ʻi he Ngaahi ʻApí
1 Ko e taha ʻo e ngaahi meʻa fakafiemālie lahi taha kuo hokosia ʻe he kau Kalisitiane moʻoní ko hono akoʻi ʻa e moʻoní ki ha taha ʻi he ako Tohi Tapu ʻi ʻapi. Ka, ʻoku ʻi ai nai ʻa e faʻahinga ʻoku ʻikai te nau maʻu ʻa e fiefia ʻi he tafaʻaki fakakoloa ko ʻeni ʻo e ngāue fakamalangá koeʻuhi ʻoku nau ongoʻi ʻoku ʻikai te nau malava ke kamata mo fai ha ako Tohi Tapu. Naʻe pehē ʻa e ongoʻi ʻa e kau malanga mo e kau tāimuʻa tuʻu-ki-muʻa tokolahi. Kae kehe, ʻi he falala kia Sihova mo ngāueʻaki ʻa e ngaahi fokotuʻu mei he Ko ʻEtau Ngāue Fakafaifekau ʻo e Puleʻangá, kuo nau ako ai ʻa e founga ki hono kamata mo fai ha ngaahi ako Tohi Tapu, pea naʻa nau maʻu ai ʻa e fiefia lahi ange ʻi he ngāue fakamalangá. Te ke malava mo koe ke ke maʻu ʻa e ola tatau.
2 Ngāueʻaki ʻa e Founga Hangatonu mo e Ngaahi Tuleki: Ko e taha ʻo e ngaahi founga faingofua taha ke kamata ai ha akó ko e founga hangatonu. Ko e meʻa pē ʻoku fie maʻu ki he kakai ʻe niʻihi ko ha fakaafe loto-māfana ke ako ʻa e Tohi Tapú. ʻE malava hono fai ʻení ʻaki hano ʻeke ange ki he toko taha ʻapí: “Te ke saiʻia ke ako ʻa e Tohi Tapú ke fakalahi hoʻo ʻilo ki he Tohi Tapú mo e ngaahi taumuʻa ʻa e ʻOtuá ki he foʻi māmaní?” Pe te ke tala nai ki he toko taha ʻapí te ke fiefia ke fakahāhā ʻa e founga hono fai ha ako Tohi Tapu ʻi ʻapi. Neongo ʻe fakafisi ʻa e tokolahi ke tali ʻa e fakaafe ko ʻení, kae fakakaukau atu ki he fiefia te ke maʻu ʻi haʻo maʻu ha taha te ne tali ʻa e fakaafe ko iá!
3 Ko e toe founga ʻe taha ke kamata ai ha ako Tohi Tapú ko hono ngāueʻaki ʻa e taha ʻo ʻetau ngaahi tulekí. Neongo ʻoku siʻisiʻi pē ʻa hono lahí, ka ʻoku nau fakahoko atu ha fanongonongo ʻoku fakatupu-fakalotoʻi mo mālohi. ʻE lava fēfē hano kamata ha ako ʻi ha tuleki? Ko hano foaki pē ki he toko taha ʻapí ha tuleki ʻokú ke tui te ne mahuʻingaʻia ai. ʻI he hili iá, pea ke kamata ʻe koe pea fakaafeʻi ʻa e toko taha ʻapí ke mo lau ʻa e ʻuluaki palakalafí. Sio ki he ngaahi konga Tohi Tapu ʻoku hā aí, pea ke fetalanoaʻaki pe ko e hā honau kaunga ki he fakamatalá. ʻI hoʻo ʻuluaki ʻaʻahí, te mo fetalanoaʻaki nai ki ha palakalafi ʻe taha pe ua. Pea ʻi he maʻu ʻe he toko taha ʻapí ʻa e mahino kuó ne ʻilo ha ngaahi meʻa fakatupu-tokanga mei he Tohi Tapú, te ke toki malava nai ai ke fakalahi ʻa e vahaʻa taimi ke fai ai hoʻomo fetalanoaʻakí.
4 Ngāueʻaki pē ʻa e Tohi Tapú: ʻI he taimi ʻe niʻihi ʻe loto-lelei ha taha ke fetalanoaʻaki ʻi he Tohi Tapú kae hangē ʻokú ne pipikoʻia ke fai ha ako ʻi he founga maheni pe ngāueʻaki ha taha ʻo ʻetau ngaahi tohí. Te ke kei malava pē ke kamata mo fai ha ako Tohi Tapu ʻaki hano teuteu ha ngaahi fetalanoaʻaki fakatupu-tokanga ʻi he Tohi Tapú ʻo fakatuʻunga ʻi he tohi ko e Moʻui Taʻengata pe tohi Reasoning kae ngāueʻaki pē ʻa e Tohi Tapú ʻi hoʻo ʻaʻahi ki he toko taha ʻoku mahuʻingaʻiá. Ko e ngaahi fetalanoaʻaki peheé ʻe aʻu nai ʻo miniti ʻe 15 pe 20, pe lōloa ange, ʻo fakatuʻunga pē ʻi he ngaahi tuʻunga ʻo e toko taha ko iá. Kapau ʻe fai tuʻumaʻu ʻaki ʻa e founga ko iá pea ʻoku fakalakalaka ai ʻa hono akoʻi ʻa e ngaahi moʻoni ʻo e Tohi Tapú, kuó ke kamata leva ha ako Tohi Tapu, pea ʻe lava ke lipooti ia ko e ako. ʻI he hoko mai ha taimi feʻunga, tuʻuaki ʻa e tohi ko e Moʻui Taʻengata, pea fai leva ai ʻa e ako ʻi he founga mahení.
5 ʻI he ʻikai ke ngata pē ʻi hano kumi ha ngaahi faingamālie ʻi he ngāue fakamalangá, kuó ke feinga ke kamata ha ngaahi ako Tohi Tapu mo ho ngaahi kaungāʻapí, ko e ngaahi kaungāmeʻá, pe ngaahi memipa ʻo ho fāmilí? Naʻe fai ia ʻi ha taimi fuoloa ki muʻa? Kuó ke toe feinga ke fai ia ki muí ni? Kapau naʻe ʻikai ke lavameʻa ʻa e founga ko ē, kuó ke fakakaukau ke ke fai ha feinga ʻi ha toe founga kehe?
6 Te ke lavameʻa ʻi hono kamata ha ngaahi ako kapau te ke ngāueʻaongaʻaki ʻa e ngaahi fokotuʻutuʻu kuo faí, kītaki ʻi he ngāue fakamalangá, mo falala kia Sihova ke ne tokoni mai. ʻOua naʻa fakasiʻisiʻi ʻa e mahuʻinga ʻo e mālohi ʻo e moʻoní mo e tokoni ʻoku foaki mai ʻe Sihová. ʻOfa ke fakalahi hoʻo fiefiá ʻi he ngāue fakamalangá ʻaki hono kamata mo fai ha ngaahi ako Tohi Tapu ʻi he ngaahi ʻapí.