Tuʻuaki ʻa e Ongo Makasini ʻOkú Na Fakahaaʻi ʻa e Moʻoní
1. Ko e hā ʻa e ngafa ʻo e Taua Leʻo mo e ʻĀ Hake!?
1 Ko e Taua Leʻo ʻOku Fanongonongo Ai ʻa e Puleʻanga ʻo Sihová mo hono hoa makasiní ko e ʻĀ Hake! ʻoku kei hoko pē ia ko e meʻangāue tefito ʻi hono malangaʻi ʻo e Puleʻangá mo e ngaohi ākongá. (Mt. 24:14; 28:19, 20) ʻOku tau fiefia ʻi hono tuʻuaki maʻu pē ʻa e ongo makasini taimi tonu ko ʻení ʻi heʻetau kau ki he ngaahi tafaʻaki kehekehe ʻo e ngāue ʻo e Puleʻangá.
2. Ko e hā ʻa e ngaahi liliu kuo fai ki he Taua Leʻo mo e ʻĀ Hake!, pea ko e hā hono ʻuhingá?
2 Kuo tau fakatokangaʻi ʻi he faai mai ʻa e ngaahi taʻú ʻa e ngaahi liliu ʻi he fōtunga mo e meʻa ʻi loto ʻi he ongo makasiní pea pehē ki he ngaahi founga ʻoku tau ngāueʻaki ke tufaki ai kinauá. Kuo fai ʻa e ngaahi liliu ko ʻení fakataha mo e taumuʻa ko hono ʻai ke toe manakoa mo ola lelei ange ʻa e ongo makasiní, koeʻuhí ke aʻu ai ʻa e pōpoaki ʻo e Puleʻangá ki he loto ʻo e ‘kakai kotoa pe, pea ke nau aʻusia ʻa e ʻilo kanokano ki he moʻoní.’—1 Tim. 2:4.
3. ʻE ngāueʻaki fēfē ʻa e ongo makasiní ʻi he ngāue fakamalangá?
3 Kuo tau hoko ʻo pōtoʻi ʻi hono ngāueʻaki ʻa e ngaahi tuʻuaki kehekehe ki he ʻīsiu fakakuata ʻo e ʻĀ Hake! ʻI he founga tatau, te tau toe ngāueʻaki ʻa e tuʻuaki kehekehe ki hono tuʻuaki ʻa e ʻīsiu fakakuata ʻo e Taua Leʻo ʻOku Fanongonongo Ai ʻa e Puleʻanga ʻo Sihová maʻá e kakaí ʻi heʻetau ngāue fakamalangá. Ko e ngaahi sīpinga tuʻuaki ki he makasini taki taha ʻoku hā ia ʻi he peesi fakamuimui ʻo ʻEtau Ngāue Fakafaifekau ʻo e Puleʻanga. ʻOku faʻa fakamamafaʻi heni ʻa e taha ʻo e ngaahi kupu kamata ʻi he makasiní ka ʻi he taimi ʻe niʻihi ʻoku fakaʻaliʻali ha ngaahi kupu pau kehe ʻe mahuʻingaʻia ai ʻa e kakaí. Ko e ngaahi tuʻuaki ʻoku fokotuʻu mai hení ʻe lava ke ngāue pōtoʻi ʻaki ʻi he taimi ʻoku tau alāanga ai mo e kupu ʻoku fakaʻaliʻalí pea ngāueʻaki ʻa e ngaahi lea pē ʻa kitautolu ke feliliuaki ʻa e tuʻuakí ke feʻunga mo hotau feituʻu ngāué.
4. Ko e hā ʻoku ʻaonga nai ai ke ngāueʻaki ha ngaahi tuʻuaki kehe mei ha tuʻuaki ʻoku ʻomai ʻi he ʻEtau Ngāue Fakafaifekau ʻo e Puleʻanga?
4 Neongo ʻoku fakakau ʻi he ʻEtau Ngāue Fakafaifekau ʻo e Puleʻanga ʻa e fokotuʻu ʻe ua ki he makasini taki taha, te ke lava pē ke ngāueʻaki ha tuʻuaki kehe. Ko e ʻuhinga ʻe taha ki hono fai iá koeʻuhi ko e taha ʻo e ngaahi kupu kehé ʻe fakamānako ange nai ia ʻi ho feituʻu ngāué. Pe ʻokú ke ongoʻi nai ʻe lava ke ke ʻai ha tuʻuaki lelei ange ʻaki hono ngāueʻaki ha kupu ʻoku mahuʻinga lahi ange kiate koé.
5. Ki muʻa ke teuteu ha tuʻuaki ʻo e makasini ke fakaʻaliʻalí, ko e hā kuo pau ke ke faí?
5 Founga ke Teuteu Ai Hoʻo Tuʻuakí: Ko e ʻuluaki meʻá, kuo pau ke ke maheni fakaʻāuliliki mo e kupu ʻokú ke fili ke fakaʻaliʻalí. ʻE ʻikai nai lava maʻu pē ke ke maheni mo e kupu kotoa pē ʻi he makasiní ki muʻa ke ke kamata ngāueʻaki ia ʻi he ngāue fakamalangá. Kae kehe, kuo pau ke ke fakahā ʻa e loto-māfana mo e loto-totonu fekauʻaki mo e ngaahi kupu ʻokú ke fili ke fakaʻaliʻalí. ʻE lava ke toki fai pē ia ʻi he taimi ʻokú ke maheni lelei ai mo e fakamatala ʻokú ke ʻoatú.
6. ʻE lava fēfē ke tau teuteu haʻatau tuʻuaki pē ʻa kitautolu?
6 Ko hono hokó, ngaofengofua pe maliliungofua ʻi hono teuteu hoʻo ngaahi lea kamatá. ʻE ngāueʻaki nai ha fehuʻi fakatupu fifili ʻoku felāveʻi mo e kupú ke kamata ha fetalanoaʻaki. Falala maʻu pē ki he mālohi ʻo e Folofola ʻa e ʻOtuá ke aʻu ai ki he lotó. (Hep. 4:12) Filifili ha konga Tohi Tapu feʻungamālie ʻoku kaunga ki he kaveinga ʻokú ke ʻohaké. ʻE sai ange ha konga Tohi Tapu ʻoku hā pe hiki mai ʻi he kupu ʻokú ke fakaʻaliʻalí. Lāulea ki he anga ʻo e felāveʻi ʻa e konga Tohi Tapú mo e kupú.
7. ʻE anga-fēfē nai ʻetau toe feliliuaki ʻetau ngaahi tuʻuakí?
7 ʻI he Faingamālie Kotoa Pē: Ke ola lelei moʻoni ha tuʻuaki, kuo pau ke ke ngāueʻaki ia. Kau mo e fakatahaʻangá ʻi he faifakamoʻoni ʻaki ʻa e makasiní ʻi he Tokonakí. Tuʻuaki ʻa e ongo makasiní ki he kakai naʻa nau tali ki muʻa ha tohi kehe. Tuʻuaki maʻu pē ʻa e ongo makasiní ki hoʻo kau ako Tohi Tapú pea ki ha kakai kehe ʻoku nau ʻi ai nai ʻi hoʻo fai ʻa e toe ʻaʻahí. Te ke malava ke tuku ʻa e ongo makasiní ki he kakai te ke lea ki ai ʻi hoʻo fai hoʻo fakataú, lolotonga ʻo e fefonongaʻakí, pe ko e tatali ʻi he falemahakí. Feliliuaki hoʻo ngaahi tuʻuakí ʻi hoʻo ngāueʻaki kinautolu lolotonga ʻa e māhiná.
8. ʻI he ngaahi founga fē ʻoku makehe ai ʻa e Taua Leʻo mo e ʻĀ Hake!?
8 ʻOku makehe ʻa e Taua Leʻo mo e ʻĀ Hake! ʻOkú na hakeakiʻi ʻa Sihova ko e Hau ʻo e ʻunivēsí. (Ng. 4:24) ʻOkú na fakafiemālieʻi ʻa e kakaí ʻaki ʻa e ongoongo lelei ʻo e Puleʻanga ʻo e ʻOtuá pea fakaʻaiʻai ʻa e tui kia Sīsū Kalaisí. (Mt. 24:14; Ng. 10:43) Tānaki atu ki ai, ʻokú na vakaiʻi maʻu pē ʻa e ngaahi meʻa ʻoku hoko ʻi he māmaní ʻi hono fakahoko ʻa e kikite ʻa e Tohi Tapú. (Mt. 25:13) Tokoniʻi ʻa e faʻahinga tāutaha ʻi ho feituʻu ngāué ke maʻu ʻaonga mei he ongo makasini ko ʻení ʻaki ʻa e mateuteu ke tuʻuaki kinaua ʻi he faingamālie kotoa pē!
9. ʻE lava fēfē ke tau fakatoka ha makatuʻunga ki ha toe ʻaʻahi?
9 ʻI hoʻo tufa ha makasini, pe naʻá ke fetalanoaʻaki lelei pē mo ha taha ʻo kau ki ha kaveinga fakalaumālie, teuteu ha fehuʻi pe ko ha fakamatala fakatupunga-fakakaukau ʻa ia ʻe lava ke ke fai ai ha toe ʻaʻahi mo ha toe fetalanoaʻaki fakalaumālie. Kapau ʻoku tau faivelenga ʻi hono tō ʻa e ngaahi tenga ʻo e moʻoní, ʻe lava ke tau fakapapauʻi ʻe ueʻi ʻe Sihova ʻa e loto ʻo e faʻahinga ʻoku holi moʻoni ke ʻilo mo tauhi kiate Iá.—1 Kol. 3:6.