Puha Fehuʻi
◼ ʻOku feʻungamālie ki he kau fanongó ke nau pasipasi hili ʻa e konga taki taha ʻi he Ako Fakafaifekau Fakateokalatí mo e Fakataha Ngāué?
ʻI hono tanupou ʻe he Tokotaha-Fakatupu ko Sihová ʻa e māmaní “naʻe hiva fakataha ai ʻa e ngaahi fetuʻu pongipongi, pea hiki mavava kotoa pe [ʻo pasipasi] ʻa e ngaahi foha ʻo e ʻOtua.” (Siope 38:7) Ko e ngaahi foha fakaeʻāngelo ko eni ʻo e ʻOtuá naʻa nau holi ke fakahīkihikiʻi ʻa Sihova ʻi heʻene ngāue tuʻu-ki-muʻa ʻo e fakatupú, ʻa ia ko ha fakahāhā foʻou ia ʻo hono potó, leleí mo e mālohí.
Ko ha meʻa lelei ia ke tau fakahāhā ʻa e houngaʻia moʻoni ki he ngaahi feinga ʻa hotau fanga tokouá pea ki he fakamatala ʻoku nau fakahokó. Ko e fakatātaá, ʻoku angamaheniʻaki ʻetau pasipasi ʻi he ngaahi malanga mo e tuʻuaki ʻi he ngaahi fakatahataha makehé, hangē ko e ngaahi ʻasemipilií mo e ngaahi fakataha-lahí. Ko e ngaahi konga ʻoku fakahoko aí naʻe fiemaʻu ki ai ʻa e taimi mo e feinga lahi ange ki hono teuteú. Ko ʻetau pasipasí ʻoku fakahaaʻi ai ʻa e houngaʻia ʻo ʻikai ki he ngāue mālohi pē ʻa e tokotaha malangá kae pehē foki ki he fakahinohino ʻoku tokonaki mai ʻe Sihova fakafou heʻene Folofolá mo ʻene kautahá.—Ai. 48:17; Mt. 24:45-47.
Fēfē ʻa e pasipasi ʻi he ngaahi konga ʻoku fakahoko ʻi he Ako Fakafaifekau Fakateokalatí mo e Fakataha Ngāué? ʻOku ʻikai ha lao ia ʻe tapui ai ʻa e pasipasí kapau ʻoku fai ākenoa pē ia, hangē ko ia ʻi he hili hono fai ʻe ha tokotaha ako ʻa ʻene ʻuluaki konga ʻi he akó. Kae kehe, ko e pasipasí ʻe lavangofua ke hoko ia ko ha meʻa fakafatongia pē pea mole ai ʻa hono ʻuhingá. Ko ia ai, ʻoku ʻikai angamaheniʻaki ʻetau pasipasi ʻi he konga taki taha.
Lolotonga ʻoku ʻikai nai ke tau pasipasi ʻi he ngaahi konga lahi taha ʻi he Ako Fakafaifekau Fakateokalatí mo e Fakataha Ngāué, ʻoku ʻi ai ʻa e ngaahi founga kehe ʻe lava ke tau fakahāhā kotoa ai ʻa e houngaʻia ki he fakahinohinó pea ki he ngaahi feinga ʻa e faʻahinga ʻoku nau fakahoko ʻa e ngaahi kongá. ʻE lava ke tau fai eni ʻaki ʻa e ʻāʻā ai pē mo e tokanga ʻaupito ki he kau malangá. Pea ʻi he hili ʻa e fakatahá, ʻoku faʻa malava ai ke fakahaaʻi fakafoʻituitui ʻete houngaʻia ʻi heʻenau ngaahi feingá.—Ef. 1:15, 16.