Founga Hono Ngāueʻaki ʻa e Tohi ko e ʻOfa ʻa e ʻOtuá ke Fai ha Ako Tohi Tapu
1. Ko e hā ʻa e taumuʻa ʻo e tohi ʻOfa ʻa e ʻOtuá?
1 He fiefia moʻoni ē ko kitautolu ʻi heʻetau Fakataha-Lahi Fakavahe “Tataki ʻe he Laumālie ʻo e ʻOtuá” ʻi hono maʻu ʻa e tohi foʻou ko e Tauhi Kimoutolu ʻi he ʻOfa ʻa e ʻOtuá! Hangē ko ia kuo fanongonongo atú, ʻoku faʻu ʻa e tohi ko ení ke tokoniʻi kitautolu ke tau ʻilo pea mo ʻofa ʻi he ngaahi tuʻunga ʻa Sihova ki he ʻulungāangá ʻo ʻikai ko hono akoʻi pē ʻa e ngaahi tokāteline tefito Fakatohitapú. Heʻikai te tau tuʻuaki ʻa e tohí ni ʻi he matapā ki he matapā.
2. ʻE fēfē hono ngāueʻaki ʻa e tohí ni, pea ʻe ngāueʻakí kia hai?
2 Ko e tohi ko ení ʻe ngāueʻaki ia ko e tohi hono ua ke ako ai mo e kau ako Tohi Tapú ʻi he ʻosi ʻa e tohi Akoʻi ʻe he Tohi Tapú. Manatuʻi ʻoku ʻi he tuʻunga kehekehe pē ʻa e tupu fakalaumālie ʻa e kakaí. ʻOku totonu ko e ako taki taha ke fakahoko ia ʻo fakatatau ki he tuʻunga ʻo e tokotaha akó. Fakapapauʻi ko e fakamatala ʻoku fai ki ai ʻa e lāuleá ʻoku mahinoʻi lelei. ʻI he ngaahi tuʻunga lahi, ʻoku ʻikai totonu ke ngāueʻaki ʻa e tohí ni ke kamata ai ha ako Tohi Tapu mo e kakai ko ia kuo nau ʻosi ako ʻi ha ngaahi tohi lahi ʻi he kuohilí, ka kuo teʻeki ai pē ke nau maʻu ʻa e ngaahi fakataha ʻa e fakatahaʻangá, pea ʻoku mahino ʻa e ʻikai ha mahuʻingaʻia ke ngāueʻaki ʻi heʻenau moʻuí ʻa e moʻoni mei he Tohi Tapú ʻa ia kuo akoʻi kia kinautolú.
3. Ko e hā ʻoku totonu ke tau faí kapau ʻoku tau lolotonga ako ʻi he tohi Lotu ki he ʻOtua?
3 Kapau ʻokú ke lolotonga fai ha ako ʻi he tohi Lotu ki he ʻOtua pea kuo toe siʻi pē ʻa e ngaahi vahé, te ke fili nai ke fakaʻosi ʻa e tohí pea mo fakalototoʻaʻi ʻa e tokotaha akó ke ne lau pē ʻe ia ʻa e tohi ʻOfa ʻa e ʻOtuá. Kapau ʻoku ʻikai, ko e lelei tahá ke hiki ki he tohi foʻoú pea kamata mei he kamataʻangá. Ka ʻi he tohi Akoʻi ʻe he Tohi Tapú, ʻe lava ke ke fili ke fai ha lāulea ki he ngaahi tuʻunga-lea ʻi he ʻapenitikí.
4. Ko e hā ʻoku totonu ke tau faí kapau kuo papitaiso ʻa e tokotaha akó ki muʻa ʻoku teʻeki ʻosi ʻa e tohi Akoʻi ʻe he Tohi Tapú pea mo e tohi ʻOfa ʻa e ʻOtuá?
4 Kapau kuo papitaiso ʻa e tokotaha akó ki muʻa ke ʻosi ʻa e ongo tohí, ʻoku totonu leva ke hokohoko atu ʻa e akó kae ʻoua ke ʻosi ʻa e tohi ʻOfa ʻa e ʻOtuá. Neongo kuo papitaiso ʻa e tokotaha akó, ʻe lava ke ke līpooti ʻa e taimí, ko e toe ʻaʻahí, mo e akó. Ko e tokotaha malanga ʻoku ʻalu mo koe ʻi hono fai ʻo e akó te ne toe lau foki ʻa e taimí.
5. ʻE ngāueʻaki fēfē nai ʻa e tohi ʻOfa ʻa e ʻOtuá ke tokoniʻi ʻaki ʻa e kau malanga ʻoku ʻikai te nau longomoʻui ʻi he ngāue fakafaifekaú?
5 Kapau ʻoku vaheʻi atu koe ʻe ha mēmipa ʻo e Kōmiti Ngāue ʻa e Fakatahaʻangá ke ke fakahoko ha ako Tohi Tapu mo ha tokotaha ʻoku ʻikai longomoʻui ʻi he ngāue fakamalangá, ʻe kole atu nai ke ke vakaiʻi ha ngaahi vahe pau ʻi he tohi ʻOfa ʻa e ʻOtuá. ʻOku ʻikai fiemaʻu ke fai ʻa e ngaahi ako peheé ʻi ha vahaʻa taimi fuoloa. Ko ha tokonaki lelei moʻoni ia ʻoku tau maʻu ʻi he tohi foʻou ko ení, ʻa ia kuo faʻu ke tokoniʻi kitautolu ke tau nofo maʻu “ʻi he ʻofa ʻa e ʻOtua”!—Siu. 21.