Founga Teuteu ki he Fakataha Ngāué
1. Ko e hā ʻa e taumuʻa ʻo e Fakataha Ngāué, pea ʻe lava fēfē ke tau maʻu mei ai ʻa e ʻaonga lahi tahá?
1 ʻOku faʻufaʻu ʻa e Fakataha Ngāué ke teuʻi ai kitautolu ki ha ngāue fakafaifekau ola lelei. ʻOku fai ʻa e tokangatahá ki hono malangaʻi ʻa e ongoongo lelei ʻo e Puleʻangá, ngaohi ākongá, mo hono talaki ʻa e ofi ke fakahoko ʻa e fakamaau fakaʻotuá. (Mt. 28:20; Mk. 13:10; 2 Pita 3:7) ʻOku tau maʻu ʻa e ʻaonga lahi taha mei he fakataha mahuʻinga ko ení ʻi he taimi ʻoku tau teuteu lelei ai pea mateuteu ke kau ki aí.
2. ʻE lava fēfē ke tau teuteu ke fanongo ki ha malanga?
2 Malanga: Ko e maʻuʻanga fakamatala ki ha malanga ʻoku fakahaaʻi fakalūkufua ia ʻi he ngaahi fakahinohino ki he tokotaha malangá. Te ke fakamanatu nai ʻa e fakamatala kuo vaheʻi atú, kau ai ʻa e ngaahi konga Tohi Tapu ʻoku haá, pea fakakaukau ki he founga te ke ngāueʻaki nai ʻa e fakamatala ʻi hoʻo ngāue fakafaifekaú.
3. Ko e hā nai te tau fai ʻi he teuteu ki he fetalanoaʻaki ʻi he fehuʻi mo e talí?
3 Fetalanoaʻaki ʻi he Fehuʻi mo e Tali: ʻE fai ʻa e konga ko ení ke meimei tatau mo e Ako Taua Leʻo, fakataha mo ha talateu nounou mo e fakamulituku. Laineʻi ʻa e poini tefito ʻi he palakalafi taki taha, pea teuteu ke tali nounou pē ʻi he poiní.
4. ʻE anga-fēfē nai ʻa ʻetau teuteu ki he fetalanoaʻaki mo e kau fanongó?
4 Fetalanoaʻaki mo e Kau Fanongó: ʻE fakahoko ʻa e konga ko ení ko ha malanga, ka ko e tokotaha malangá te ne fiemaʻu ke kau mai ki ai ʻa e kau fanongó. Kapau te ke laineʻi ʻa e poini tefitó mo sio ki he ngaahi konga Tohi Tapu ʻoku haá, ʻe lava nai ke ke fai ha tali ʻi he taimi ʻoku ʻeke ai ʻa e fehuʻí. ʻE feinga lahi ʻa e tokoua te ne fai ʻa e konga ko ení ke ʻohake ʻe he kau fanongó ʻa e ngaahi poini tefitó.
5. Ko e hā te ne tokoniʻi kitautolu ke maʻu ʻa e ʻaonga lahi taha mei he ngaahi fakahāhaá?
5 Fakahāhā: ʻE kau ʻi he ngaahi konga ʻe niʻihi ʻa e ngaahi fakahāhā ʻo e meʻa moʻoni ke fakahaaʻi ai ʻa e founga nai ʻe ngāueʻaki ai ʻa e fakamatalá ʻi he feituʻu ngāue fakalotofonuá. ʻE kole ki he kau mātuʻá pe ko e kau malanga taukeí pe ko e kau tāimuʻá ke nau fai ʻa e ngaahi fakahāhaá. ʻI hoʻo teuteu ki he konga ko ení te ke fakakaukau nai ki he founga te ke fakahoko ai iá. ʻI he taimi ʻoku fakahāhaaʻi ai ʻa e fakahāhā ʻi he ʻEtau Ngāue Fakafaifekaú, fakakaukau ki he lea mo e feʻunuʻaki te ke fai ki he ʻapi kehekehe. Fakapapauʻi ke ʻomi ʻa e tohi pe ko e makasini ʻe ngāueʻaki ʻi he fakahāhaá. ʻI he lolotonga ʻa hoʻo efiafi Lotu Fakafāmilí, te ke ʻiloʻi nai ai ʻoku ʻaonga ʻa hono ngāueʻaki ʻa e niʻihi ʻo e fakahāhā ko ení.
6. Ko e hā ʻa e ngaahi ʻuhinga ʻoku tau teuteu ai ki he Fakataha Ngāué?
6 Ko e Fakataha Ngāué ʻoku fakafiefia lahi ange ia ʻi he taimi ʻoku tau teuteu mo fakakaukau atu ai ki he fakahinohino lelei ʻe fakahokó. ʻI hono fai iá ʻe iku ki ha fefakalototoʻaʻaki lahi ange. (Loma 1:11, 12) Kapau te tau vaheʻi ha taimi ke teuteu ai ki he Fakataha Ngāué, te tau mateuteu lelei ange ai ke fakahoko ʻa ʻetau ngāué.—2 Tim. 3:17.