“ʻOua Te Ke Manavahe”
1. Ko e hā ʻa e ngaahi pole meimei tatau mo Selemaia te tau fehangahangai fakafoʻituitui nai mo ia?
1 Ko Selemaia, ʻi he taimi naʻe fekauʻi atu ai ko ha palōfitá, naʻá ne maʻu ʻa e ngaahi ongoʻi ʻo e taʻefeʻungá. Ka naʻe fakapapauʻi ange ʻe Sihova kiate ia, “ʻoua te ke manavahe,” peá ne fakaivimālohiʻi anga-ʻofa ia ke fakahoko ʻa hono vāhenga-ngāué. (Sel. 1:6-10) ʻI hotau ʻahó ni, ko e ongoʻi maá pe ʻikai loko loto-maʻú te ne uesia nai ʻa ʻetau kau atu ko ia ki he ngāue fakafaifekaú. Ko e manavahē nai ki he anga ʻo e tali pe vakai mai ʻa e kakaí kiate kitautolú ʻe lava ke ne ʻai kitautolu ke tau toupīkoi ʻi ha ngaahi taimi. ʻE lava fēfē ke tau ikuʻi ʻa e ngaahi manavahē peheé, pea ko e hā ʻa e ngaahi tāpuaki fakafoʻituitui ʻe iku ki aí?
2. ʻE anga fēfē hono tokoniʻi kitautolu ʻe he teuteú ke fakafiemālieʻi ʻetau ngaahi manavahē fekauʻaki mo e ngāue fakafaifekaú?
2 Teuteu Tōmuʻa: Ko e teuteu feʻungá ʻe lava ke ne fai ʻa e meʻa lahi ʻaupito ke fakafiemālieʻi ʻetau ngaahi manavaheé. Hangē ko ení, kapau te tau fakakaukauʻi tōmuʻa ʻa e ngaahi taʻofiʻanga ʻo e fetalanoaʻaki ʻe ala hokó, te tau mateuteu nai ai ke fai ha tali ki he ngaahi fakafetauʻi-lea anga-mahení. (Pal. 15:28) Ko e hā ʻoku ʻikai ke ʻai ai ha ngaahi taimi ʻahiʻahi lolotonga ʻa e Lotu Fakafāmilí ke teuteu ai ki ha ngaahi pole kehekehe ʻi he ʻapiakó mo e ngāue fakafaifekaú?—1 Pita 3:15.
3. ʻE anga-fēfē hono tokoniʻi kitautolu ʻe he falala kia Sihová ke ikuʻi ʻa e manavaheé?
3 Falala kia Sihova: Ko e faitoʻo papau ki he manavaheé ko e falala ki hotau ʻOtuá. Naʻe fakapapauʻi mai ʻe Sihova te ne tokoniʻi kitautolu. (Ai. 41:10-13) Ko e hā ha toe maluʻanga lahi ange ʻe lava ke tau maʻu? Tānaki atu ki aí, naʻe fakapapauʻi mai ʻe Sīsū kiate kitautolu naʻa mo e taimi ʻoku malanga hake ai ha ngaahi tuʻunga taʻeʻamanekiná, ko e laumālie māʻoniʻoni ʻo e ʻOtuá te ne fakamafeia kitautolu ke tau fai fakamoʻoni ʻi ha founga lelei. (Mk. 13:11) Ko ia ai, kole maʻu pē kia Sihova ki hono laumālie māʻoniʻoní.—Luke 11:13.
4. Ko e hā ʻa e ngaahi tāpuaki ko e ola ia ʻo e tōtōivi ʻi he ngāue fakafaifekaú neongo ʻa e ngaahi polé?
4 Ngaahi Tāpuaki: ʻI heʻetau tōtōivi ʻi he ngāue fakafaifekaú neongo ʻa e ngaahi polé, ʻoku fakaivimālohiʻi ai kitautolu ke tau fehangahangai lavameʻa mo e ngaahi ʻahiʻahi ʻi he kahaʻú. ʻOku tau fakatupulekina ai ʻa e loto-toʻa mo e loto-lahi—ʻa e ngaahi anga ʻo e faʻahinga ʻoku fakafonuʻaki kinautolu ʻa e laumālie māʻoniʻoní. (Ng. 4:31) ʻIkai ko ia pē, ʻi heʻetau ikuʻi ʻa e ngaahi manavahē fakafoʻituituí ʻaki e tokoni ʻa Sihová, ʻoku tau fakaivimālohiʻi ai ʻetau tui mo ʻetau falala ki hono nima fai fakahaofí. (Ai. 33:2) ʻOku tau toe hokosia foki ai ʻa e fiefia mo e fiemālie ʻa ia ʻoku haʻu mei hono ʻiloʻi ʻoku tau fakahōifuaʻi ʻetau Tamai fakahēvaní. (1 Pita 4:13, 14) Fakatauange ke tau hoko leva ʻo ʻoua ʻe manavahē ke malangaʻi ʻa e pōpoaki ʻo e Puleʻangá ʻaki ʻa e loto-lahi, ʻo falala-pau maʻu pē ki he tokoni ʻa Sihová!