Ko e Ngoué Kuo Fisi Hina ki he Utu-Taʻu
1. Ko e hā ʻa e ngāue mahuʻinga ʻoku lolotonga fakahokó?
1 Hili ʻene faifakamoʻoni ki ha fefine Samēlia, naʻe tala ange ʻe Sīsū ki heʻene kau ākongá: “Mou hanga hake muʻa ki he ngaahi ngoue na: vakai, kuo fisi hina ia ki he ututaʻu.” (Sione 4:35, 36) Ko ha ngāue utu-taʻu fakalaumālie naʻe lolotonga fakahoko, pea naʻe malava ke tomuʻa ʻiloʻi ʻe Sīsū ʻa e lahi fakaemāmani ʻo e ngāue ko iá. Mei hono tuʻunga ʻi hēvaní, ʻoku kei hokohoko atu ʻa e mātuʻaki kau mai ʻa Sīsū ʻi he utu-taʻú. (Mt. 28:19, 20) Ko e hā ʻa e ngaahi fakaʻilonga ko e ngāue ko ení ʻoku hokohoko atu ʻo fakalalahi ʻi heʻene ʻalu ke ofi ange ki hono tumutumú?
2. Ko e hā ʻa e ngaahi fakalakalaka ʻokú ne fakahā ai ʻa e tuʻunga ʻo e ngāue ʻi māmani lahí ʻoku ʻalu ke fakalalahi?
2 Ko Ha Utu-taʻu Fakaemāmani Lahi: Lolotonga ʻa e taʻu fakangāue 2009, naʻe ʻi ai ʻa e tupu peseti 3.2 ʻi he kau malangá ʻi māmani lahi. Ko e ngaahi fonua ʻoku fakangatangata ai ʻa e ngāue fakamalangá naʻa nau sio ki he tupu peseti ʻe 14. Ko e lahi ʻo e ngaahi ako Tohi Tapu ʻi ʻapi naʻe līpooti fakamāhiná naʻe fakalaka ia ʻi he 7,619,000—ko ha fika ʻoku lahi hake ia ʻi he tumutumu ʻo e kau malangá pea ko e meimei vaeua miliona lahi hake ʻi he fika ʻo e ngaahi ako Tohi Tapu naʻe līpooti ʻi he taʻu ki muʻá. ʻI he tupu vave ʻa e ngāué ʻi he ngaahi vahefonua lahi, kuo lahi ange ai hono maʻu ʻa e ngaahi tohi kole ki ha kau misinale kuo akoʻi ʻi Kiliati. Ko e ngaahi malaʻe ngāue lea mulí ʻokú ne ʻomai ha fua lahi ʻi he fonua ki he fonua. ʻOku hā mahino ko Sihova ʻokú ne fakavaveʻi ʻa e ngāué lolotonga ʻa e fakaʻosiʻosi ʻo e utu-taʻú. (Ai. 60:22) ʻOkú ke maʻu ha vakai pau ki hoʻo ngaahi “ngoue”?
3. Ko e hā nai ʻe fakamulituku ʻa e niʻihi fekauʻaki mo ʻenau utu-taʻu fakalotofonuá?
3 Ko Hoʻo Utu-Taʻu Fakalotofonuá: “Ko hoku feituʻu ngāué ʻoku ʻikai fuʻu fua lelei,” ko e lau nai ia ʻa ha niʻihi. Ko e moʻoni ia ʻoku ʻi ai ʻa e ngaahi feituʻu ngāue ʻe niʻihi ʻoku ʻikai ke hā ngali fuʻu fua lelei ʻo hangē ko e ngaahi feituʻu ngāue kehé pe nau fua lahi hangē ko e kuohilí. Ko ia ko e Kau Fakamoʻoni ʻe niʻihi te nau fakamulituku nai kuo aʻu ʻa e utu-taʻú ki hono tumutumú ʻi he ngaahi feituʻu ko iá pea ko e taimí ni kuo holoki ʻa ʻenau ngāué ki hono tufitufi mai ʻa e toenga ʻoku kei toé. Ko e tuʻunga moʻoní nai ia?
4. Ko e hā ʻa e fakakaukau totonu felāveʻi mo ʻetau ngāue fakafaifekaú ʻoku totonu ke tau fakatupulekiná, pea ko e hā hono ʻuhingá?
4 Mei he kamatá ki heʻene ʻosí, ko e utu-taʻú ko ha taimi ngāue lahi ia. Fakatokangaʻi ʻa e ongoʻi ʻo e fakavavé ʻi he ngaahi lea ko eni ʻa Sīsuú: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mt. 9:37, 38) Ko Sihova, ʻa e ʻEiki ʻo e utu-taʻú, ko ia pē ʻokú ne tala mai ko fē ʻa e taimi mo e feituʻu ʻe hoko ai ʻa e fuá. (Sione 6:44; 1 Kol. 3:6-8) Ko e hā hotau vāhenga-ngāué? ʻOku tali ʻe he Tohi Tapu: “ʻI he pongipongi to hoʻo tenga, pea ʻi he efiafi ofi ʻa e poʻuli ʻoua taʻofi ho nima.” (Koh. 11:4-6) ʻIo, ʻi he taimi ʻe aʻu ai e utu-taʻú ki hono tumutumú ʻoku ʻikai ko ha taimi ia ke mālōlō ai hotau nimá!
5. Ko e hā ʻoku totonu ai ke tau hokohoko atu ʻa e malanga mo e faivelengá ʻi he ngaahi feituʻu ngāue hā ngali taʻefua lelei?
5 Hokohoko Atu ʻa e Utu-Taʻú: Neongo kapau ko hotau feituʻu ngāué kuo toutou ʻosiki tuʻo lahi pea hangē ʻoku taʻetalitalileleí, ʻoku ʻi ai ʻa e ʻuhinga lelei ke tau ngāue ʻi he faivelenga mo e ongoʻi ʻo e fakavavevave. (2 Tim. 4:2) Ko e ngaahi māveuveu fakafokifā ʻi he tuʻunga ʻo e māmaní ʻokú ne ʻai ai ʻa e kakaí ke liliu ʻenau vakaí mo e fakakaukaú ke toe fakamātoato ange fekauʻaki mo e kahaʻú. ʻI he tupu ʻo motuʻa ange ʻa e kau talavoú, te nau ongoʻi nai ʻa e fiemaʻu ke kumi ki ha maluʻanga mo e melino ʻo e ʻatamaí. Ko ʻetau kīvoí ʻe maongo ia ki he niʻihi kehé. ʻIo, ko kinautolu kuo ʻikai fanongo ki muʻá mahalo nai te nau toki fanongo he kahaʻú. Naʻa mo e faʻahinga ʻoku nau talitekeʻi loto lelei ʻetau pōpoakí ʻoku fiemaʻu ke tau fakatokanga kiate kinautolu.—Isi. 2:4, 5; 3:19.
6. Kapau ko ha pole hotau feituʻu ngāué, ko e hā te ne tokoniʻi kitautolu ke tauhi maʻu ʻetau faivelengá?
6 Kapau ko ha pole hotau feituʻu ngāué, ko e hā te ne tokoniʻi kitautolu ke tauhi maʻu ʻetau faivelengá? Mahalo pē ʻe lava ke tau tānaki atu ki he ʻetau malanga fale-ki-he-falé mo ha toe ngaahi founga kehe ʻo e ngāue fakafaifekaú, hangē ko e malanga ʻi he feituʻu pisinisí pe telefoní. Pe ko ʻetau ʻai nai ke kehekehe ʻetau tuʻuakí koeʻuhi ke hā foʻou ʻetau fakaleá. Te tau liliu nai ʻetau taimi-tēpilé pea kau atu ki he ngāue fakafaifekau ʻi he efiafí pe ko ha toe ngaahi taimi kehe ngalingali ʻe ʻi ʻapi ai e kakaí. Mahalo ʻe lava ke tau tuli ke ako ha lea foʻou kae lava ke tau aʻu ki he kakai tokolahi ange mo e ongoongo leleí. ʻOfa ke tau malava ʻo fakalahi ʻetau ngāue fakafaifekaú ʻaki ʻetau hoko ʻo tāimuʻa tuʻumaʻu. Pe ko ʻetau hiki ki ha feituʻu ʻoku tokosiʻi ai e kau ngāue utu-taʻú. Kapau te tau maʻu ha fakakaukau totonu fekauʻaki mo e utu-taʻú, te tau feinga ke tau kau ʻi he lahi taha ʻe ala lavá ʻi he ngāue mahuʻingá ni.
7. ʻOku totonu ke aʻu ki ʻafē ʻetau hokohoko atu e ngāue fakatahatahaʻi ko ení?
7 Ko e kau ngoué ʻoku fakangatangata ʻa e taimi ke tānaki ai e fua ʻo e ngoué, ko ia ai ʻoku ʻikai ke nau fakafiefiemālie pe fakatuotuai kae ʻoua leva ke ʻosi e ngāué. Ko e utu-taʻu fakalaumālié ʻoku fiemaʻu ʻa e ongoʻi fakavavevave tatau. ʻOku totonu ke aʻu ki ʻafē ʻetau hokohoko atu e ngāue fakatahatahaʻi ko ení? ʻI he kotoa ʻo e ‘fakaʻosiʻosi ʻo e fokotuʻutuʻu lolotongá’ ʻo aʻu ki he “ngataʻanga.” (Mt. 24:14; 28:20, NW) Hangē ko e Faifekau tuʻu-ki-muʻa taha ʻa Sihová, ʻoku fiemaʻu ke tau fakaʻosi ʻa e ngāue kuo tuku mai kiate kitautolú. (Sione 4:34; 17:14) Ko ia ai, tau hokohoko atu hono fataki e ngāue fakafaifekaú mo e faivelenga, fiefia, mo e fakakaukau pau ʻo aʻu ki he ngataʻangá. (Mt. 24:13) Ko e utu-taʻú ʻoku teʻeki ai ke ʻosi!
[Fakamatala ʻi he peesi 2]
Mei he kamatá ki heʻene ʻosí, ko e utu-taʻú ko ha taimi ngāue lahi ia