Tokoniʻi ʻa e Tokotaha-ʻApí ke Fakaʻuhinga
1. Ko fē ʻa e fakalea ʻi he ngāue fakafaifekaú ʻoku lelei tahá?
1 Ko fē ʻa e fakalea ʻi he ngāue fakafaifekaú ʻoku ola lelei angé—ko e taha ʻoku fakamatemateé pe ko e taha ʻoku tokoniʻi ai ʻa e tokotaha-ʻapí ke ne fakaʻuhinga pea maʻu ʻa e ngaahi fakamulituku totonú? Naʻe ngāueʻaki ʻe he ʻapositolo ko Paulá ʻa e fakaʻuhingá ʻi heʻene malanga ki he kau Siu ʻi Tesalonaiká, pea ko hono olá “naʻe ai honau niʻihi naʻe tui.” (Ng. 17:2-4) Ko e hā ʻoku kau ki he fakaʻuhinga mo e niʻihi kehé?
2. ʻE fēfē nai haʻatau faʻifaʻitaki ki he faʻifaʻitakiʻanga ʻa Paulá ʻi he taimi ʻoku tau vahevahe atu ai ʻa e ongoongo leleí?
2 Fakakaukau ki he Ngaahi Ongoʻí mo e Puipuituʻá: Ko ha fakalea fakaʻatuʻí ʻoku fakakaukauʻi ai ʻa e ngaahi ongoʻi ʻa e faʻahinga ko ia ʻi he feituʻu ngāué. Naʻe kamata ʻe Paula ha malanga ki he kau Kalisi taʻetui ʻi he ʻAleopeikó ʻaki ʻene lave ki he ngaahi meʻa ʻoku ngalingali naʻa nau ʻiloʻi pea talí. (Ng. 17:22-31) Ko ia ai, ʻi hono teuteu hoʻo tuʻuakí, fakakaukau ki he ngaahi tui mo e tomuʻa fehiʻa anga-maheni ʻa e kakai ʻi ho feituʻu ngāué. (1 Kol. 9:19-22) Kapau ʻe ʻohake ʻe he tokotaha-ʻapí ha fakafepaki, feinga ke maʻu ha meʻa ʻe fai ai ha felotoi, pea langa hake hoʻo fetalanoaʻakí ʻi he meʻa ko iá.
3. ʻE lava fēfē ke tau fakaʻuhinga ola lelei ange mo e niʻihi kehé ʻaki hono ngāueʻaki pōtoʻi ʻa e ngaahi fehuʻí?
3 Ngāueʻaki Pōtoʻi ʻa e Ngaahi Fehuʻí: Heʻikai lava ke tau ʻoange ki ha tokotaha fononga ha ngaahi fakahinohino ke tokoniʻi ia ke ne aʻu ki he feituʻu ʻoku ʻalu ki aí kae ʻoua kuo tau ʻiloʻi ʻa e feituʻu ʻokú ne lolotonga ʻi aí. ʻI he founga meimei tatau, heʻikai lava ke tau tokoniʻi ha tokotaha-ʻapi ke aʻu ki he fakamulituku totonú kae ʻoua kuo tau ʻiloʻi ʻene fakakaukau lolotongá. Ki muʻa ke fakaʻuhinga mo ha tokotaha fanongo, naʻe faʻa ʻeke ʻe Sīsū ha ngaahi fehuʻi ke ʻiloʻi ai ʻa e fakakaukau ʻa e tokotahá. Ko e fakatātaá, ʻi he taimi naʻe ʻeke ai ʻe ha tokotaha kia Sīsū, “Ko e ha ha meʻa te u fai kae tō moʻoku ʻa e moʻui taʻengata?,” naʻe feinga ʻa Sīsū ke ʻilo e fakakaukau ʻa e tangatá ki muʻa ke ne talí. (Luke 10:25-28) ʻI ha toe taimi ʻe taha, ʻi hono fai ʻe Pita ha tali halá, naʻe ngāueʻaki pōtoʻi ʻe Sīsū ʻa e ngaahi fehuʻí ke fakatonutonu ʻene fakakaukaú. (Mt. 17:24-26) Ko ia ai, kapau ʻoku ʻeke ʻe he tokotaha-ʻapí ha fehuʻi pe fakahaaʻi ha fakakaukau hala, ʻe lava ke tau ngāueʻaki ʻa e ngaahi fehuʻí ke tokoniʻi ia ke ne fakaʻuhinga ʻi he ngaahi meʻá.
4. Ko e hā ʻoku totonu ai ke tau feinga ke tokoniʻi ʻa e tokotaha-ʻapí ke fakaʻuhingá?
4 ʻI he taimi ʻoku tau tokoniʻi ai ʻa e tokotaha-ʻapí ke fakaʻuhingá, ʻoku tau faʻifaʻitaki ai ki he Faiako Lahí, ʻa Sīsū, pea pehē ki he kau ʻevangeliō pōtoʻi kehe he ʻuluaki senitulí. ʻOku tau fakangeingeiaʻi ai ʻa e tokotaha-ʻapí pea fakahaaʻi ʻa e fakaʻapaʻapa kiate ia. (1 Pita 3:15) Ko hono olá, te ne hehema ange nai ai ke fakaʻatā ke tau toe foki ange.