Tokoni ki he Niʻihi Kehé ke Ako ʻo Kau ki he ʻAlo ʻo e ʻOtuá, ko Sīsū Kalaisi
1 Ko e māhina ko Tisemá ʻoku fakakaukau ai ʻa e faʻahinga ʻoku taku ko e kau Kalisitiané kia Sīsū ʻo lahi ange ia ʻi ha toe taimi kehe ʻo e taʻú. Ko ia ko e māhina lelei ia ke tuʻuaki atu ai ʻa e tohi ko e Te Ke Malava ʻo Moʻui Taʻengata he Palataisi ʻi he Māmaní. Koeʻuhi ko e lahi ʻa e mahuʻinga ʻo e tohí ni, ʻoku totonu ke tau fakapapauʻi ki muʻa pea tau toki tuku atu ʻa e tohí pe ʻoku fie ako moʻoni ʻa e toko taha ʻapí ʻo lahi ange ʻo kau ki he ʻAlo ʻo e ʻOtuá. ʻE malava fēfē ke tau fai ia?
2 Feinga ke aʻu leva ki he fetalanoaʻaki fakatuʻunga ʻi he Tohi Tapú ʻa ia ʻoku fakahanga ai ʻa e tokangá kia Sīsū.
ʻI he ʻosi hono fai ʻa e lea fakafeʻiloakí, te ke lea pehē ni nai:
◼ “ʻI he ʻahó ni ʻoku mau ʻeke ki homau ngaahi kaungāʻapí pe ko e hā ʻenau fakakaukau ʻi heʻenau lau ʻi he Tohi Tapú ʻo kau ki he moʻui taʻe ngatá. [Tuku ke ne tali.] Ko e meʻa fakatupu tokanga makehe ia koeʻuhí he ʻoku lāulea ʻa e Tohi Tapú ʻo kau ki he moʻui taʻe ngatá ʻo tuʻo 40. Ko e faʻahinga moʻui fēfē nai ia kiate kitautolu? Fakatokangaʻi ʻa e lau ʻi he tohi Fakahā 21:4. [Lau.] Naʻá ke fakatokangaʻi ʻa e meʻa ko ia ʻoku talaʻofa maí? [Tuku ke ne tali.] ʻE lava fēfē ke tau maʻu ʻa e moʻui taʻe ngatá?” Lau ʻa e tohi Sione 17:3, pea fakamamafaʻi ʻa e fie maʻu ke maʻu ʻa e ʻilo ʻo kau ki he ʻOtuá mo hono ʻAló, ko Sīsū Kalaisi. Kapau ʻe fie fanongo ʻa e toko taha ʻapí, fakahā ki ai ʻa e tohi ko e Moʻui Taʻengatá, ʻo ngāueʻaki ʻa e ngaahi kaveinga ʻo e vahé koeʻuhi ke langaʻi ke toe lahi ange ʻene fie fanongó.
3 Kapau ʻoku ʻikai loko fie fanongo ʻa e toko taha ʻapí, tuʻuaki ha tatau ʻo e Taua Leʻo mo e Awake! ʻoku lolotonga maʻú pe ko e tuleki ʻE Kei Tuʻu ʻa e Māmani ko Ení? ʻAi ke fakahanga ʻa e tokangá ki ha poini tefito ʻe taha pe ua ʻi he meʻa ʻoku tuʻuakí. Fakahā ange te ke fiefia ke toe ʻaʻahi mai ʻi ha taimi faingamālie ke hokohoko atu ʻa e fetalanoaʻaki mo ia ki he kaveinga ko ʻení.
4 Kapau ʻe hā ʻoku femoʻuekina ʻa e toko taha ʻapí, ʻe fakapotopoto nai ke fakanounou ʻa e fakamatala kuo teuteu ʻa ia ʻoku hā ʻi ʻolungá. ʻE faingofua ke ngāueʻaki nai ʻe he kau malanga kei foʻoú ʻa e fakamatala ko eni ʻoku hoko maí.
ʻI he ʻosi hono fakafeʻiloaki kitautolú, te tau lea pehē ni nai:
◼ “ʻI he ʻahó ni ʻoku mau ʻeke ki homau ngaahi kaungāʻapí pe ko e hā ʻenau fakakaukau ʻi heʻenau lau ʻi he Tohi Tapú ʻo kau ki hono maʻu ʻa e moʻui taʻe ngatá. Ko e fakatātā, fakatokangaʻi ʻa e lea ʻa Sīsū ʻi he Sione 17:3. [Lau.] Ke tokoni ki he kakaí ke nau ako ʻo lahi ange ʻo kau kia Sīsū Kalaisi mo e ngaahi meʻa naʻá ne akoʻí, kuo pulusi ai ʻa e tohi ko ʻení.” Fakaava ʻa e tohi ko e Moʻui Taʻengatá ki he ngaahi fakatātā fakaʻofoʻofa ʻoku hā aí pea fakahā ha niʻihi ʻo e ngaahi kaveinga kehekehe ʻoku lāulea ki aí. Kapau ʻe fie fanongo ʻa e toko taha ʻapí, tuʻuaki ki ai ʻa e tohí.
5 Kapau te ke tuku ʻa e tohí, fokotuʻutuʻu ha makatuʻunga ke kamata ai ha ako Tohi Tapu ʻaki hoʻo pehē te ke fiefia ke fai ha fetalanoaʻaki ʻi he ʻuluaki vahé, “Ko e Moʻui Taʻengatá ʻOku ʻIkai ko ha Misi Pē,” ʻi he taimi pē ko iá pe ko e toe ʻaʻahi ʻi ha ngaahi ʻaho ki mui mai. ʻI he lelei ange ke ʻoua ʻe fakahā ki he toko taha ʻapí ʻa hono fuoloa ʻo e taimi ʻe fakamoleki ʻi he ʻaʻahi hoko maí, tala ange pē, ʻi he kiʻi vahaʻa taimi nounou te ne malava ke ako lahi ange ai ki ha fakamatala fakatupu tokanga ʻo kau kia Sīsū Kalaisi mei he Folofola ʻa e ʻOtuá, ko e Tohi Tapú.
6 ʻOfa ke tau ngāueʻaki ʻe kitautolu kotoa ʻa e vahaʻa taimi ʻo e ngaahi ʻaho mālōlō fakamāmani ko ʻení ke fakahanga ʻa e tokangá ki he moʻoni ʻo kau ki he ʻAlo ʻo e ʻOtuá, ko Sīsū Kalaisi, koeʻuhi ke tokoni ki he niʻihi kehé ke nau fou ʻi he hala ki he moʻui taʻe ngatá.—Mt. 7:14.