Kuó Ke Mateuteu ki ha Faitoʻo Fakavavevave?
ʻE lava ke hoko fakafokifā ha faitoʻo fakavavevave ʻo ʻikai ha fakatokanga. (Sēm. 4:14) Ko ia ai, ko ha taha fakapotopoto ʻe mateuteu ʻi he lahi taha ʻe malavá. (Pal. 22:3) Kuó ke fakapapauʻi pe ko e hā ʻa e ngaahi faitoʻo mo e ngaahi founga fakafaitoʻo te ke talí, pea kuó ke ʻai hoʻo filí ʻo hiki? Ke tokoniʻi koé, kuo faʻu ai ʻa e foʻi vitiō ko e Transfusion-Alternative Health Care—Meeting Patient Needs and Rights, ko e foʻi konga hono ua ʻi he DVD kuo fakakaveinga ko e Transfusion-Alternatives—Documentary Series. ʻI hoʻo sio aí, vakai angé pe ʻe lava ke ke tali ʻa e ngaahi fehuʻi ko ení. Koeʻuhi ko e foʻi vitioó ʻoku kau ki ai ʻa e ngaahi ʻata nounou fakaetafa, ʻoku totonu ke ngāueʻaki ʻe he ngaahi mātuʻá ʻa e fakapotopotó ʻi heʻenau mamata mo e fānau īkí ʻi he foʻi vitioó.
(1) Ko e hā ʻoku toe sivisiviʻi ai ʻe he kau ngāue fakafaitoʻo ʻe niʻihi ʻa hono ngāueʻaki ʻo e huhu totó? (2) ʻOmai ha fakatātā ʻe tolu ʻo e ngaahi tafa fihi ʻa ia kuo lava ke fakahoko ʻo ʻikai ha huhu totó. (3) Ko e hā ʻoku laui afe ai ʻa e kau toketā pea mo e kau toketā tafa ʻi māmani lahi ʻoku nau loto-lelei ke faitoʻo ʻa e kau mahakí ʻo ʻikai ha huhu totó? (4) Ko e hā kuo fakahaaʻi ʻi he ngaahi ako fakafalemahaki ki muí ni ʻo fekauʻaki mo hono ngāueʻaki ʻo e totó? (5) Ko e hā ʻa e ngaahi fakatuʻutāmaki fakafaitoʻo ʻoku fekauʻaki mo e huhu totó? (6) Ko e hā ʻa e fakamulituku kuo aʻu ki ai ʻa e kau mataotao tokolahi ʻi he fekauʻaki mo e ʻaonga ʻo e ngaahi faitoʻo fetongi ʻo e huhu totó? (7) Ko e hā ʻokú ne fakatupunga ʻa e ʻanīmiá (siʻi ʻa e totó), pea ko e hā ʻe lava ke fai ke tokoniʻi ha tokotaha ʻanīmia? (8) ʻE lava fēfē ke fakakake ʻa hono faʻu ʻo e sela kulokulá ʻi he sino ʻo ha mahaki? (9) Ko e hā ʻa e ngaahi founga ʻoku ngāueʻaki ke fakasiʻisiʻiʻaki e mole ʻa e totó lolotonga ʻa e tafá? (10) ʻE lava ke ola lelei ʻa e ngaahi faitoʻo fetongi ʻo e huhu totó ki he fānau īkí pe ki he kakai ʻoku ʻi he tuʻunga fakatuʻutāmaki ʻenau moʻuí? (11) Ko e hā ʻa e taha ʻo e ngaahi tefitoʻi moʻoni fakaʻēfika tefito ʻo e tokangaʻi fakafaitoʻo leleí?
Koeʻuhi ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha meʻa fakakonisēnisi, ʻoua ʻe tatali kae ʻoua kuó ke fehangahangai mo ha meʻa fakavavevave ke fakakaukau ai ki he meʻa te ke faí pe ʻikai ke faí. Ko e vahe 7 ʻo e tohi ʻOfa ʻa e ʻOtuá mo e ngaahi maʻuʻanga fakamatala ʻoku haá kae pehē ki he fakalahi ʻi he ʻīsiu ʻo e Ko ʻEtau Ngāue Fakafaifekau ʻo Nōvema 2006 ʻe tokoni ia kia koe ke fai ha ngaahi fili papau. Pea, kapau kuó ke ʻosi papitaiso, fakahaaʻi hoʻo ngaahi filí ʻi he kaati HCD, pea ʻalu holo maʻu pē mo e kātí.
[Fakamatala ʻi he peesi 5]
Kuó ke fakapapauʻi pe ko e hā ʻa e ngaahi faitoʻo mo e ngaahi founga fakafaitoʻo te ke talí pea ʻai eni ʻo hiki?