Ngāueʻaki ʻa e Tokangá Lolotonga ʻa e Ngāue Fakafaifekaú

1. Ko e hā ʻoku fiemaʻu ai ha fakalea pōtopotoʻi ʻi he ngāue fakafaifekaú?

¹ ʻI he hoko “ko e fanga sipi ʻi he haʻohaʻonga ʻo e fanga ulofi,” ko e kau sevāniti ʻa e ʻOtuá ʻoku nau malanga “ʻi he lotolotonga ʻo ha toʻutangata pikopiko mo mioʻi.” (Māt. 10:16; Fil. 2:15) Ko e ngaahi līpooti fakautuutu ʻo e ngāʻehu fakalotofonuá, fuʻu kakai anga-fakamālohí, mo e kaihaʻa fakamālohi anga-fakamamahí, ko e fakamoʻoni ia ʻo e ʻalu ʻa e kau tangata fulikivanú “mei he kovi ki he kovi ange.” (2 Tīm. 3:13) Ko hono ngāueʻaki ʻa e ngaahi tefitoʻi moʻoni Fakatohitapu ko e hā ʻe tokoniʻi ai kitautolu ke tau “pōtopotoʻi” ʻi he ngāue fakafaifekaú?—Māt. 10:16.

2. Ko e hā ʻa e ngaahi tuʻunga ʻe fakapotopoto nai ai ke mavahe mei he feituʻu ngāué pea malanga ʻi ha feituʻu ʻe taha?

² Ngāue Fakapotopoto: ʻOku fakamamafaʻi ʻi he Palōveepi 22:3 ʻa e fakapotopoto ʻo ‘ʻetau toi’ mei he koví. Hanganaki ʻāʻā! Ko e ngaahi tuʻunga ʻi ha feituʻu kaungāʻapi malú ʻe lava ke liliu taʻeʻamanekina. Te ke sio nai ki ha fakautuutu ʻo e ngāue ʻa e kau polisí pe ko e fuʻu kakai ʻoku nau fakapupunga ʻi he halá. ʻI he taimi ʻe niʻihi ʻe ʻomai ai ʻe ha tokotaha-ʻapi anga-lelei ha fakatokanga. ʻI he ʻikai nōfoʻi ʻi he fieʻiló, ʻoku fakapotopoto ke mavahe leva pea hokohoko atu ʻi ha feituʻu kehe.—Pal. 17:14; Sione 8:59; 1 Tes. 4:11.

3. ʻOku anga-fēfē hono ngāueʻaki ʻa e tefitoʻi moʻoni ʻi he Koheleti 4:9 ki heʻetau ngāue fakafaifekaú?

³ Ngāue Fakataha: “ʻOku ngutuhuaange ke toko ua ʻi heʻete toko taha,” ko e lau ia ʻa e Koheleti 4:9. Lolotonga kuó ke anga nai ki he ngāue malu tokotaha ʻi he ngāue fakafaifekaú, ʻoku malu he taimí ni ke fai pehē? ʻI he ngaahi feituʻu ʻe niʻihi, ʻoku pehē. Ka ʻi he ngaahi feituʻu kehé, ʻoku ʻikai malu he taimí ni ki ha tuofefine pe ko ha tokotaha kei siʻi ke ngāue tokotaha ai mei he matapā ki he matapā, tautefito ʻi he tō ʻa e laʻaá. Kuo fakamoʻoniʻi mei he meʻa kuo hokosiá ʻoku mahuʻinga ke ʻi ai ha hoa ngāue tokanga. (Koh. 4:10, 12) Hanganaki tokanga ki he ngaahi mēmipa kehe ʻi hoʻo kulupú. ʻAi ke ke angaʻaki hono fakahā ke ʻiloʻi ʻe he niʻihi kehé ʻokú ke mavahe mei he feituʻu ngāué.

4. ʻE lava fēfē ke tau ngāue ki hono maluʻi ʻa e faʻahinga kotoa ʻi he fakatahaʻangá?

⁴ ʻI he hoko ko e faʻahinga ‘ʻoku nau hanganaki leʻohi kitautolú,’ ko e fatongia ia ʻo e kau mātuʻá ke ʻomai ʻa e tataki ʻaonga ʻo fakatatau ki he ngaahi tuʻunga fakalotofonuá. (Hep. 13:17) ʻOku fakapapauʻi ʻa e tāpuaki ʻa Sihová ʻi heʻetau fakahāhā ʻa e anga-fakanānā faka-Kalisitiané pea ngāue fāitaha kakato mo kinautolu. (Mai. 6:8; 1 Kol. 10:12) ʻOfa ke tokoni ʻa e kau sevāniti kotoa ʻa e ʻOtuá ki hono fai ha fakamoʻoni ola lelei ʻi hotau feituʻu ngāué, kae fai maʻu pē fakataha mo e tokanga totonu.