Sio ki he Lelei ʻi Hoʻo Ngāue Mālohí
1. Ko e hā ʻe lava ke ne holoki ʻetau faivelenga ʻi he ngāue fakafaifekaú?
1 Naʻe fakataumuʻa ʻa e tangatá ke ‘sio ki he lelei ʻoku maʻu ʻi heʻene ngaué.’ (Koh. 2:24) Neongo ia, ʻi he taimi ʻoku ʻikai ke tau sio ai ki ha ola lelei ʻi heʻetau ngāue fakafaifekaú, ko e loto-siʻí te ne kaihaʻasi ʻetau fiefiá pea holoki ʻetau faivelengá. Ko e hā te ne tokoniʻi kitautolu ke tauhi maʻu ha fakakaukau leleí?
2. Ko e hā ʻoku totonu ai ke tau maʻu ha ʻamanekina totonu fekauʻaki mo e tali ki heʻetau ngāue fakafaifekaú?
2 Maʻu ha ʻAmanekina Totonu: Manatuʻi neongo ko e faʻahinga naʻa nau tali ʻa Sīsuú naʻe tokosiʻi, ka ko ʻene ngāue fakafaifekaú naʻe taʻetoefehuʻia ʻene lavameʻá. (Sione 17:4) ʻI heʻene talanoa fakatātā ki he tokotaha tūtūʻí, naʻe tomuʻa tala ʻe Sīsū ko e lahi taha ʻo e ngaahi lotó ʻe ʻikai ke nau tali lelei ʻa e pōpoaki ʻo e Puleʻangá ʻoku hangē ha tengaʻi ʻakaú. (Māt. 13:3-8, 18-22) Neongo ia, ko ʻetau feinga tōtōiví ʻoku kei fakahoko ai ʻa e meʻa lahi.
3. ʻE lava fēfē nai ke tau “fua” neongo kapau ʻoku tau sio ʻoku siʻi hono tali ʻetau ngāue fakamalangá?
3 Founga Ke Tau Fua Lahi Aí: Fakatatau ki he talanoa fakatātā ʻa Sīsuú, ko e faʻahinga te nau tali ʻa e pōpoakí te nau “fua.” (Māt. 13:23) Hili ha tupu hake ʻo motuʻa ha kauʻi uite, ʻokú ne ʻomai ʻa e fua, ʻo ʻikai ko e fanga kiʻi vaʻa uite, ka ko e tenga foʻoú. Ko ia ai, ko e fua ʻoku ʻomai ʻe ha kau Kalisitiane lavameʻá, ʻoku ʻikai ko e ākonga foʻoú, ka ko e fua lahi ia ʻo e tenga ʻo e Puleʻangá—ko hono toutou tūtuuʻi o e tenga lahi ange ʻo e Puleʻangá. Ko e ola ko ení ʻoku lelei lahi ange ʻa ia ʻe lava ke tau maʻu ai ʻa e fiemālie, neongo pē pe ʻe tali ia ʻe he kakaí. ʻOku tau poupou ai ki hono fakamāʻoniʻoniʻi ʻa e huafa ʻo Sihová. (ʻAi. 43:10-12; Māt. 6:9) ʻOku tau fiefia ʻi he monū ko e ngaahi kaungāngāue ʻo e ʻOtuá. (1 Kol. 3:9) Pea “ko e fua ʻo hotau loungutú” ʻe fakafiefia kia Sihova.—Hep. 13:15, 16.
4. Ko e hā ʻa e ola, ʻoku ʻikai ke tau ʻilo ki ai, ʻoku maʻu nai ʻi heʻetau ngāue fakafaifekaú?
4 ʻI he tānaki atu ki aí, ko ʻetau ngāue mālohí ʻoku tau maʻu nai ha ngaahi ola ʻoku ʻikai ke tau sio ki ai. Mahalo nai ko e niʻihi naʻa nau fanongo ki he malanga ʻa Sīsuú naʻe ʻikai ke nau hoko ko ʻene kau ākonga ʻi heʻene kei ngāue fakafaifekau he māmaní. ʻI he tuʻunga meimei tatau, ko e tenga ʻo e Puleʻangá ʻoku tau tūtūʻí ʻe ʻikai nai faiaka ia pea kamata tupu ʻi ha loto ʻo ha taha kae mahalo te ne toki haʻu ki he moʻoní ʻo ʻikai ke tau ʻiloʻi. Ko e moʻoni, ko ʻetau ngāue fakafaifekaú ʻokú ne fakahoko ha fuʻu lelei lahi. Ko ia ai, ʻofa ke tau ‘hokohoko atu ke fua lahi’ pea fakamoʻoniʻi kitautolu ko e kau ākonga ʻa Sīsū.—Sione 15:8.