Talitali Lelei Kinautolu!
1. Ko fē taimi ʻokú ne ʻomai ʻa e faingamālie lelei ke ʻoatu ai ha fakamoʻoni pea ko e hā hono ʻuhingá?
1 ʻOku ʻikai ha toe taimi te ne ʻomai ha faingamālie lelei ange ke faifakamoʻoni ka ko hono kātoangaʻi fakataʻu ʻo e Fakamanatú. Fakakaukau angé: ʻI he taʻú ni laka hake ʻi he toko hongofulu miliona ʻoku ʻamanekina ke nau ʻaʻahi mai ki he Fakamanatú pea fanongo ki he founga māʻolunga taha ʻe ua hono fakahāhaaʻi ʻa e ʻofá fakafou ʻi he huhuʻí. (Sione 3:16; 15:13) Te nau ako fekauʻaki mo e ngaahi tāpuaki ʻoku faingamālie kiate kinautolu koeʻuhi ko e meʻaʻofa ʻa Sihová. (ʻAi. 65:21-23) Neongo ia, ko e tokotaha-malangá ʻoku ʻikai ko ia pē te ne fai ha fakamoʻoni ʻi he tuʻungá ni. Ko e kotoa ʻo e kau maʻu fakatahá te nau maʻu ha faingamālie ke ʻoatu ha fakamoʻoni mālohi ʻaki hono talitali māfana ʻa e kau ʻaʻahí.—Loma 15:7.
2. ʻOku lava fēfē ke tau talitali loto-māfana ʻa e kau ʻaʻahí?
2 ʻI he ʻikai ke ke kumi pē ho nofoʻangá pea tatali fakalongolongo ke kamata ʻa e polokalamá, ko e hā ʻoku ʻikai ke ke tamuʻomuʻa ai ke fakafeʻiloaki koe ki he faʻahinga ofi atú? Ko e kau ʻaʻahí mahalo ʻoku nau loto-siʻi mo ʻikai ke fakapapauʻi ʻa e meʻa ke ʻamanekiná. Ko ʻetau malimali loto-māfaná mo e fakafeʻiloaki anga-fakakaumeʻá te ne ʻai ke nau ongoʻi fiemālie ʻoku talitali lelei kinautolu. Ke hoko ʻo ʻiloʻi pe naʻe haʻu ha taha ʻi hano fakaafeʻi, ʻe lava ke ke ʻeke ange pe ko e ʻuluaki taimi eni ke ne maʻu ai ʻetau ngaahi fakatahá pe ʻokú ne ʻiloʻi ha taha ʻi he fakatahaʻangá. Mahalo ʻe lava ke ke fakaafeʻi ia ke tangutu fakataha mo koe pea ngāueʻaki hoʻo Tohi Tapú mo e tohi hivá. Kapau ʻoku ngāueʻaki ʻa e Fale Fakatahaʻangá, ʻoku lelei ke kiʻi taki mamataʻi nounou ia. Hili ʻa e malangá, fakafaingamālieʻi koe ke tali haʻane ngaahi fehuʻi. Kapau ʻe fiemaʻu ke mavahe vave hoʻo fakatahaʻangá ke ʻatā ki ha toe fakatahaʻanga, ʻe lava ke ke pehē: “Te u loto ke ʻilo ki he anga hoʻo fakakaukau ki he polokalamá. ʻE ʻi ai nai ha founga ʻoku lava ke u fetuʻutaki atu ai?” Fai leva ha fokotuʻutuʻu ke muimuiʻi ʻa e mahuʻingaʻiá. ʻE tautefito ki he kau mātuʻá ʻa e fiemaʻu ke nau tokanga ke fakalototoʻaʻi ʻa e kau malanga ʻikai longomoʻui ʻoku nau haʻú.
3. Ko e hā ʻoku mahuʻinga ai ke tau tamuʻomuʻa ʻi hono talitali lelei ʻa e kau ʻaʻahi ʻi he Fakamanatú?
3 Ko e tokolahi taha ʻo e kau ʻaʻahí, ko ʻenau ʻuluaki sio eni ki he fiefia, melino mo e fāʻūtaha ʻo e palataisi fakalaumālié ʻoku tau fiefia ai ko e kakai ʻa Sihová. (Saame 29:11; ʻAi. 11:6-9; 65:13, 14) Ko e hā ʻa e fakakaukau ʻe ʻalu mo e kau ʻaʻahí? Ko e konga lahi ʻe makatuʻunga ia ʻi heʻetau tamuʻomuʻa ke talitali lelei kinautolú.