Ko e Hā ʻOkú Ne Ueʻi Kitautolu ke Malangá?

1. Ko e hā ʻa e felāveʻi ʻa e ʻofá mo ʻetau ngāue fakafaifekaú?

¹ Ko hono malangaʻi ʻa e ongoongo lelei ʻo e Puleʻanga ʻo e ʻOtuá ko e ngāue mahuʻinga taha ia ʻoku lava ke tau fai he ʻaho ní. Ko e moʻoni, ko e ngāue ʻe taha ko ení, ʻoku tau fakahāhā ai ʻa e talangofua ki he ongo fekau lahi tahá, ʻa ia ko e ʻofa kia Sihova mo e ʻofa ki hotau kaungāʻapí. (Mk. 12:29-31) Ko e ʻofá ko ha ivi fakaueʻiloto mālohi ia ʻe lava ke ne ʻai kitautolu ke tau hoko ko e kau faifekau faivelenga.—1 Sio. 5:3.

2. ʻOku anga-fēfē hono fakahāhā ʻa e ʻofa kia Sihová ʻi heʻetau malangá?

² ʻOfa kia Sihova: Ko e ʻofa ki hotau Kaumeʻa lelei tahá, ʻa Sihova, ʻokú ne ueʻi kitautolu ke tau lea ʻo taukapoʻi ia. Kuo lauʻikoviʻi loi ia ʻe Sētane ʻi he taʻu nai ʻe 6,000. (2 Kol. 4:3, 4) Ko ia ai, ʻoku tui ʻa e kakaí ʻoku fakamamahiʻi ʻe he ʻOtuá ʻa e kau angahalá ʻi ha afi ʻo heli, ko ha Tolu-Tahaʻi-ʻOtua ia ʻa ia ko ha misiteli, pea ʻoku ʻikai ke ne mahuʻingaʻia ʻi he faʻahinga ʻo e tangatá. Ko e tokolahi kuo nau aʻu ʻo fakamulituku ʻoku ʻikai ke ʻi ai ha ʻOtua! ʻIkai ʻoku tau fakaʻamu ke ʻilo ʻe he kakaí ʻa e moʻoni fekauʻaki mo ʻetau Tamai fakahēvaní! Ko ʻetau ngaahi feinga tōtōivi ke faifakamoʻoni ki he ʻOtuá ʻoku ʻoatu ai kiate ia ha fiefia lahi kae fakamamahi ia kia Sētane.—Pal. 27:11; Hep. 13:15, 16.

3. ʻI he founga fē ʻoku fakahāhā ai ʻa e ʻofa ki he kaungāʻapí ʻi heʻetau ngāue fakafaifekaú?

³ ʻOfa ki he Kaungāʻapí: Ko e taimi taki taha ʻoku tau fai ai ha fakamoʻoni ki ha taha, ʻoku tau fakahāhā ai ʻa e ʻofá kiate ia. ʻOku fiemaʻu vavale ki he kakaí ke fanongo ki he ongoongo leleí lolotonga ʻa e ngaahi taimi faingataʻa ko ení. Ko e tokolahi ʻoku nau hangē ko e kau Ninive ʻi he ʻaho ʻo Sioná ʻa ia naʻe “ʻikai te nau ʻilo honau nima toʻomataʻu mo e toʻohema.” (Siona 4:11) Ko ʻetau ngāue fakafaifekaú ʻoku akoʻi ai e kakaí ki he founga ke maʻu ai ʻa e moʻui fiefia mo lavameʻá. (ʻAi. 48:17-19) ʻOku ʻoange ai kiate kinautolu ha ʻamanaki. (Loma 15:4) Kapau te nau fanongo pea ngāueʻaki ʻa e meʻa ʻoku nau akó, “ʻe fakahaofi” kinautolu.—Loma 10:13, 14.

4. Ko e hā ʻe ʻikai ʻaupito ngalo ʻia Sihová?

⁴ Ko e fānau leleí ʻoku ʻikai ke nau fakahāhā pē ʻa e ʻofa ki heʻenau ongo mātuʻá ʻi ha taimi pau pē. ʻOku nau feinga ke ʻofa ʻi he taimi kotoa pē. ʻI he tuʻunga meimei tatau, ko e ʻofa mālohi ki he ʻOtuá mo e kaungāʻapí te ne ueʻi kitautolu ke tau tokanga ki ha ngaahi faingamālie ke faifakamoʻoni ai ʻi he taimi kotoa pē, ʻo ʻikai ʻi he taimi malanga anga-mahení pē. Te tau malanga ʻo ʻikai tuku. (Ngā. 5:42) Ko e ʻofa peheé ʻe ʻikai ʻaupito ke ngalo ia ʻia Sihova.—Hep. 6:10.