Kakapa Atu ʻi Heʻetau Ngāue Fakafaifekaú
1 Naʻe naʻinaʻi ʻa e ʻapositolo ko Paulá ki he kau Kalisitiané ke nau ʻaʻeva ʻi he founga ʻa e ʻOtuá pea ke “fakautuutu [ʻenau] hulu atu ʻi he meʻa ko ia.” (1 Tes. 4:1) Ko e hā hono ʻuhinga ʻo e meʻá ni kia kitautolú? Ko e meʻa ʻe taha ʻoku totonu ke tau hokohoko kumi ki ha ngaahi founga ke kakapa atu ai ki ha ngāue fakalaumālie lahi ange, ʻo feinga maʻu pē ke ‘fai ke kakato ʻetau gaue fakafaifekaú.’—2 Tim. 4:5, PM.
2 Fakaueʻiloto: Ko e kakapa atu ʻi heʻetau ngāue fakafaifekaú ʻoku ueʻi ia heʻetau holi ke tauhi ke toe kakato ange ki hotau Tokotaha-Fakatupú. ʻOku tau loto ke tupu fakalaumālie pea kumi ki ha ngaahi founga ke fakaleleiʻi ai ʻetau ngāue fakafaifekaú. Ko ha founga-tuʻumaʻu lelei fakataha mo e fakaueʻiloto totonú ʻe tokoniʻi ai kitautolu ke tau aʻusia ʻa e ngaahi taumuʻa fakateokalatí.—Sāme 1:1, 2; Fili. 4:6; Hep. 10:24, 25.
3 Ko e ngāue ki hono fakalahi ʻo ʻetau ngāue fakafaifekaú ʻoku fiemaʻu ai ke tau fakatupulekina ha laumālie nima-homo mo feilaulauʻi-kita. Ko ha laumālie pehē ʻoku lava ke fakatupulekina ia ʻi ha fakalaulauloto ʻi he lotu ki he faʻifaʻitakiʻanga lelei ʻa Sīsuú. (Mt. 20:28) Naʻe maʻu ʻe Sīsū ʻa e fiefia lahi mei he tauhi ki he niʻihi kehé ʻi he kotoa ʻo ʻene ngāue fakafaifekaú. (Ng. 20:35) ʻOku lava ke tau faʻifaʻitaki kia Sīsū ʻaki hono fakahāhā ʻa e mahuʻingaʻia fakafoʻituitui ʻi he kakaí pea tokanga ki he ngaahi faingamālie ke kakapa atu ai ʻi heʻetau ngāue fakafaifekaú.—Ai. 6:8.
4 Ngafa ʻo e Ngaahi Mātuʻá: Ko ha holi ke tauhi ki he niʻihi kehé mo fakalahi ʻetau ngāue fakafaifekaú ʻoku lava ke fakahūhū ia ki he fānaú ʻi ha taʻu siʻi. ʻE fakatokangaʻi ʻe he fānaú ʻa e tōtōivi ʻa e ngaahi mēmipa ʻo e fāmilí mo ʻenau kau longomoʻui ʻi hono fakalahi atu ʻenau ngāue fakafaifekaú. Naʻe ueʻi ʻa e tokoua ʻe taha ke ne kakapa atu ʻi hono tuʻunga ko ha kiʻi tamasiʻí ko e ola ia ʻo ʻene ngāue fakataha mo ʻene kui-tangatá ʻi he ngaahi ngāue fakateokalatí. ʻI he sio ki he tōtōivi mo e fiefia ʻa ʻene kui-tangatá naʻe ueʻi ai ia ke ne kumi ki he ngaahi faingamālie ke tokoni ai ki hono fanga tokouá. ʻOkú ne hoko he taimí ni ko ha sevāniti fakafaifekau.
5 Fiemaʻu ki he Fanga Tokouá: “Ka feinga [pe kakapa atu] ʻe ha taha . . . , ko ʻene holi [ia] ki ha ngaue lelei.” (1 Tim. 3:1) Ko e ngaahi leá ni ʻoku fakalotolahiʻi ai ʻa e fanga tokouá ke nau kakapa atu ke taau ki he ngaahi monū lahi ange ʻo e ngāué ʻi he kautaha ʻa Sihová. Ko hono fai iá ʻoku ʻikai fiemaʻu ki ai ha ngaahi pōtoʻi makehe. Ko ha tokoua ʻoku kakapa atu te ne fuofua kumi ki he Puleʻangá pea kau faivelenga ʻi he ngāue fakafaifekaú. (Mt. 6:33; 2 Tim. 4:5) Te ne feinga ke hoko ko ha faʻifaʻitakiʻanga lelei ki he niʻihi kehé.
6 Māmani Lahi: ʻOku fakavaveʻi ʻe Sihova ʻa e ngāue fakatahatahaʻí. (Ai. 60:22) ʻOku ʻi ai ha fiemaʻu fakavavevave ki he faʻahinga kotoa ʻoku nau muimui ʻi he faʻifaʻitakiʻanga ʻa Sīsuú ke nau fai ʻa e ngāue fakafaifekaú ke toe kakato ange. Ko e līpooti ʻi māmani lahi ki he taʻu fakangāue 2006 ʻoku fakahaaʻi ai naʻe papitaiso ʻa e toko 248,327. ʻOku ʻomai ʻe he fika ko iá ha ʻavalisi ʻo e faʻahinga foʻou laka hake he toko 680 ʻi he ʻaho kotoa pē! ʻOfa ke tau hokohoko atu kotoa ʻi he kumi ki ha ngaahi founga ke ngāue ai ke toe kakato ange ʻi heʻetau ngāue fakafaifekaú!