Sīpinga Tuʻuaki
Ke Kamata ha Ako Tohi Tapu ʻi he ʻUluaki Tokonakí ʻi ʻAokosi
“ʻI he laui taʻu kuo taʻelavameʻa ai ʻa e feinga ʻa e kau taki ʻi he māmaní ke ʻomai ʻa e melinó ki he māmaní. ʻOkú ke fakakaukau nai ko hai ʻe lava ke ne fokotuʻu ʻa e melinó ke tuʻuloa ʻi he māmaní? [Tuku ke ne tali.] Fakatokangaʻi ʻa e lau ʻa e veesi ko ení fekauʻaki mo Sīsū Kalaisi ko e ‘ʻEiki ʻo e Melino.’” [Lau ʻa e ʻAisea 9:6, 7 (9:5, 6, PM).] Lave ki he ngaahi meʻa ʻe fai ʻe Sīsū Kalaisi ke ʻomai ʻa e melino ki he māmaní ʻi he kaveinga tokoni “Ko hai te ne fokotuʻu ʻa e melinó ʻi he māmaní?” ʻi he peesi 15 ʻo e Taua Leʻo ʻo Siulai-ʻAokosi. Tuʻuaki ʻa e makasiní pea fokotuʻutuʻu ke toe foki ʻo lāulea ki he kaveinga tokoni “Ko e hā ʻoku fuʻu maʻungataʻa ai ʻa e melinó?”
Fakatokangaʻi: Ko e tuʻuaki ko ení ʻoku totonu ke fokotuʻutuʻu ke fai hano fakahāhaaʻi lolotonga e fakataha ki he ngāue fakamalanga ʻi ʻAokosi 3.
Ko e Taua Leʻo Siulai-ʻAokosi
“ʻOku ʻikai ha veiveiua ʻokú ke ʻiloʻi ʻa e Lotu ʻa e ʻEikí ʻa ia ʻoku tau kole ai ke fakamolemoleʻi ʻetau ngaahi angahalá. ʻOkú ke fakakaukau ko hono leaʻaki ʻo e lotú ni ʻoku ʻosi feʻunga pē ia ki hono maʻu ai ʻa e fakamolemolé? [Tuku ke ne tali.] ʻOku tala mai ʻe he Tohi Tapú ʻa e toe meʻa ʻoku fiemaʻu ke maʻu ai ʻa e hōifua ʻa e ʻOtuá. [Lau ʻa e Ngāue 3:19.] ʻI he peesi 11 ʻo e makasini ko ení ʻoku lāulea ai ki he ʻuhinga ʻoku ʻikai ke fuʻu faingataʻa ia kia kitautolu ke maʻu ʻa e hōifua ʻa e ʻOtuá.”
Ko e Taua Leʻo Siulai-ʻAokosi
“Te u saiʻia ke ʻiloʻi pe ʻokú ke loto-tatau mo e fakamatala ko ení: ‘ʻOku puleʻi ʻe he ʻOtuá ʻa e māmaní, ko ia ʻokú ne fakatupunga ai ʻa e ngaahi fakatamaki fakanatulá.’ [Tuku ke ne tali.] ʻOku ou loto ke fakahaaʻi atu ʻa e konga Tohi Tapu fekauʻaki mo e tokotaha ʻokú ne puleʻi moʻoni ʻa e māmaní. [Lau ʻa e 1 Sione 5:19.] ʻI hono tuʻunga ko e pule ʻo e māmaní, ko e ‘tokotaha fulikivanú’ ʻokú ne tākiekina ʻa e ngaahi fakatamaki fakanatula ʻoku hokosia ʻe he faʻahinga ʻo e tangatá. Ko e makasini ko ení ʻoku fakamatala ai ki ha fakamoʻoni lahi ange ki he ʻuhinga ʻe lava ke tau fakapapauʻi ai ʻoku ʻikai ha kaunga ia ʻa e ʻOtuá ki he ngaahi fakatamaki fakanatulá.”