Sio ki he Kau Palōfitá ko ha Sīpinga—ʻĒmosi
1. Ko e hā ʻe lava ai ʻa e faʻifaʻitakiʻanga ʻa ʻĒmosí ke hoko ko ha matavai ʻo e fakalototoʻa kiate kitautolú?
1 ʻOkú ke ongoʻi taʻetaau ke malanga koeʻuhí ko hoʻo maʻu ha puipuituʻa masiva? Kapau ko ia, ʻe lava ke ke maʻu ha loto-toʻa mei he faʻifaʻitakiʻanga ʻa ʻĒmosí. Ko ha tokotaha tauhi-sipi ia pea ko ha tokotaha ngāue ʻi he faʻahitaʻu ʻo e sukaminó, neongo ia naʻe fakaivimālohiʻi ia ʻe Sihova ke ne fanongonongo ha pōpoaki mahuʻinga. (ʻĒm. 1:1; 7:14, 15) ʻI he tuʻunga meimei tatau, ʻi hotau ʻahó ni ʻoku ngāueʻaki ʻe Sihova ʻa kinautolu ko ia ʻoku masiva mo maʻulaló. (1 Kol. 1:27-29) Ko hā ʻa e ngaahi lēsoni kehe ki heʻetau ngāue fakafaifekaú ʻe lava ke tau ako mei he palōfita ko ʻĒmosí?
2. Ko e hā ʻe lava ke tau tuʻumaʻu ai pē ʻi he fehangahangai mo e fakafepaki ʻi he ngāue fakafaifekaú?
2 Tuʻumaʻu Ai Pē ʻi he Fehangahangai mo e Fakafepakí: ʻI he taimi naʻe fanongo ai ʻa ʻAmasaia ko e taulaʻeiki naʻe lotu ki he kiʻi pulu ʻi he puleʻanga matakali ʻe hongofulu ʻo ʻIsileli he tokelaú ki he kikite ʻa ʻĒmosí, naʻá ne tali ʻi he ʻita: ‘ʻAlu ki ʻapi! Tukunoaʻi kimautolu! ʻOku ʻi ai pē ʻemau lotu ʻamautolu!’ (ʻĒm. 7:12, 13) ʻI heʻene kole kia Tuʻi Selopoame ke tapui ʻa e ngāue ʻa ʻĒmosí, naʻe mioʻi ʻe ʻAmasaia ʻa e ngaahi lea ʻa e palōfitá. (ʻĒm. 7:7-11) Ka naʻe ʻikai ke fakamanavaheeʻi ai ʻa ʻĒmosi. ʻI he ʻahó ni ko e niʻihi ʻo e haʻa faifekaú ʻoku nau kumi ki he tokoni fakapolitikalé ʻi heʻenau feinga ke fakatangaʻi ʻa e kakai ʻa Sihová. Kae kehe, ʻoku fakapapauʻi mai ʻe Sihova kiate kitautolu ʻe ʻikai ha mahafu ʻoku faʻu ke fai ʻaki ha kovi kiate kitautolu ʻe siaʻa tuʻuloa.—ʻAi. 54:17.
3. Ko e hā ʻa e tafaʻaki ʻe ua ʻo e pōpoaki ʻoku tau fanongonongo ʻi he ʻaho ní?
3 Talaki ʻa e Fakamaau ʻa e ʻOtuá mo e Ngaahi Tāpuaki ʻi he Kahaʻú: Neongo naʻe kikite ʻa ʻĒmosi fekauʻaki mo e fakamaau ki he puleʻanga matakali ʻe hongofulu ʻo ʻIsilelí, naʻá ne fakaʻosiʻaki ʻa e tohi ʻi he Tohi Tapú ʻoku hā ai hono hingoá mo e talaʻofa ʻa Sihova ki he toe fakafokí mo e ngaahi tāpuaki hulu faú. (ʻĒm. 9:13-15) Ko kitautolu foki ʻoku tau lea fekauʻaki mo e hoko mai ʻa e ‘ʻaho ʻo e fakamaau’ ʻo e ʻOtuá, ka ko e konga pē eni ʻo e ‘ongoongo lelei ʻo e Puleʻangá’ ʻa ia ʻoku pau ke tau fanongonongó. (2 Pita 3:7; Māt. 24:14) Ko e fakaʻauha ʻe Sihova ʻa e fulikivanú ʻi ʻĀmaketoné ʻe fakaʻatā ai ʻa e hala ki ha māmani palataisi.—Saame 37:34.
4. Ko e hā ʻa e fakapapau ʻoku tau maʻu ʻe lava ke tau fakakakato ai ʻa e finangalo ʻo Sihová?
4 Ko e malangaʻi ʻa e pōpoaki ʻo e Puleʻangá ʻi ha māmani ʻoku tokolahi ai ʻa e kau fakafepakí ʻoku siviʻi moʻoni ai ʻetau fakapapau mo ʻetau fakatapui kia Sihova ke fai hono finangaló. (Sione 15:19) Kae kehe, ʻoku tau fakapapauʻi ʻe hokohoko atu ʻe Sihova hono ʻai kitautolu ke tau taau ke fakakakato hono finangaló ʻo hangē ko e meʻa naʻá ne fai kia ʻĒmosí.—2 Kol. 3:5.