Ngāueʻaki ʻEtau Uepisaití ke Akoʻi Hoʻo Fānaú
1. Ko e hā ʻa e taumuʻa ʻo e konga ʻi heʻetau Uepisaití ʻoku fakakaveinga ko e “Children”?
1 Ko ʻetau Uepisaiti jw.org ʻoku fokotuʻutuʻu ia ke fakamānako ki he kakai ʻo e taʻumotuʻa kotoa. Ko e konga ʻo e Uepisaiti ʻoku fakakaveinga ko e “Children” (ʻalu ki he Bible Teachings > Children) ʻoku tokoniʻi ʻa e fānau īkí mo ʻenau mātuʻá ke nau vāofi ange ʻia kinautolu pea kia Sihova. (Teu. 6:6, 7) ʻE lava fēfē ke ke ngāueʻaki ʻa e konga ko ení ke akoʻi ʻaki hoʻo fānaú?
2. ʻE lava fēfē ke ke fili ha fakamatala feʻungamālie ki he taʻumotuʻa hoʻo fānaú ke fakahoko ha ako?
2 Ngaofengofua: Ko e kiʻi tama taki taha ʻoku ʻi ai ʻene ngaahi fiemaʻu makehe. (1 Kol. 13:11) ʻE lava fēfē leva ke ke fili ha fakamatala feʻungamālie mo e taʻumotuʻa hoʻo fānaú ke fakahoko ha ako? ʻEke kiate koe: ‘Ko e hā ʻe mahuʻingaʻia ai ʻeku fānaú? Ko e hā hono lahi ʻenau mahinoʻi iá? Ko e hā hono fuoloa ʻenau tokanga ki he meʻa ko iá?’ Ko e fānau ʻoku nau taʻu tolu pe siʻi hifo aí ʻe lava ke ke lāulea ki he “Ko ʻEku Ngaahi Lēsoni Fakatohitapú.” Ko e ngaahi fāmili ʻe niʻihi ʻoku nau ngāueʻaki ʻa e ngaahi talanoa Fakatohitapu ʻi he konga ko e “Teach Your Children.” Lāulea foki ki he ngaahi fokotuʻu ko ení.
3. ʻE lava fēfē ki he ngaahi mātuʻá ke ngāueʻaki ola lelei ʻa e ngaahi talanoa mo e ngaahi ngāue ke fai ʻoku maʻu ʻi he “Family Worship Projects”?
3 Polokalama Lotu Fakafāmili: Ko e ngaahi polokalama ko ení ko e meʻangāue ia ke tokoni ki he ngaahi ʻuluʻi fāmilí ke ako mo ʻenau fānaú. Ke ako ki he founga hono ngāueʻaki ʻa e ngaahi talanoa mo e ngaahi ngāue ke faí, lomi ʻa e kī “download,” pea lau ʻa e “Parents’ Guide” ki he polokalama taki taha. Ngāueʻaki ʻa e ngaahi fakatātaá, hangē ko hono valivali ʻo e ngaahi pēsí ke akoʻi hoʻo fānau ʻoku iiki angé. Tokoniʻi ʻa e fānau lalahi angé ke fakakakato ʻa e ngaahi ngāue ke fai ʻi he akó. Ko e kotoa ʻo e ngaahi ngāue ke fai ʻi he polokalama taki taha ʻe felāveʻi ia mo e talanoa pe lēsoni Fakatohitapu tatau, koeʻuhi ke lava ʻo kau ki ai ʻa e fānau ʻi he taʻu motuʻa kehekehe ʻi he polokalama lotu fakafāmili ko iá.
4. Ko e hā ʻe lava ke maʻu ʻi he konga ko e “Become Jehovah’s Friend”?
4 Hoko ko e Kaumeʻa ʻo Sihova: Ko e ngaahi vitiō, hiva mo e ngāue ko eni ke fai ʻi he konga ko eni ʻo ʻetau Uepisaití ʻoku tokoni ia ki he ngaahi mātuʻá ke akoʻi ʻenau fānau īkí ki he Folofola ʻa e ʻOtuá. (Teu. 31:12) Ko e vitiō nounou taki taha ʻoku haʻu hangatonú ʻoku akoʻi ai ha lēsoni mahuʻinga. Ko e ngaahi ngāue ke fai hangē ko ha vaʻinga ko e kumi-ke-maʻu ʻa ia ʻoku fakamamafaʻi ai ʻa e ngaahi lēsoni ko iá. Koeʻuhi ko e saiʻia ʻa e fānaú ke hivá—pea ʻoku tokoni ʻa e hivá ki he fānaú ke nau manatuʻi ʻa e meʻa ʻoku nau akó—ngaahi hiva ʻo e Puleʻangá mo e hiva ʻoku ʻasi maʻu pē ʻa ia ʻoku faʻu tautefito ki he fānaú.
5. Ko e hā ʻoku totonu ai ki he ngaahi mātuʻá ke kole kia Sihova ke tokoniʻi kinautolu ke akoʻi ʻa e moʻoní ki heʻenau fānaú?
5 Ngaahi mātuʻa ko e finangalo ia ʻo Sihová ke mou hoko ko e ngaahi faʻē mo e ngaahi tamai lavameʻa. Ko ia, kole kiate ia ke tokoniʻi koe ke akoʻi hoʻo fanaú ki he moʻoní. (Fkm. 13:8) Fakataha mo e poupou ʻa Sihová ʻe lava ke ke akoʻi hoʻo fānaú ke hoko ʻo “poto ke maʻu ai ʻa e fakamoʻui fakafou ʻi he tui fekauʻaki mo Kalaisi Sīsuú.”—2 Tīm. 3:15; Pal. 4:1-4.