Sīpinga Tuʻuaki

Ke Kamata ha Ako Tohi Tapu ʻi he ʻUluaki Tokonakí ʻi Tīsema

ʻOku mau ʻaʻahi nounou mai pē ki homou feituʻú ʻi he ʻahó ni. Ko e tokolahi naʻa mau talanoa ki aí naʻa nau pehē ko e taha ʻo e meʻa faingataʻa taha ke nau aʻusiá ko e mate ʻa ha tokotaha ʻofeina. ʻOku pehē hoʻo ongoʻí? [Tuku ke ne tali.] Naʻá ku ʻiloʻi ʻe fakalototoʻa eni.” Fakahaaʻi leva ʻa e peesi 16 ʻo e Taua Leʻo Nōvema-Tīsema pea lāulea fakataha ki he fakamatala ʻi lalo ʻi he ʻuluaki fehuʻí pea lau mo ha konga Tohi Tapu ʻe taha pe lahi ange mei he ngaahi konga Tohi Tapu ʻoku haá. Tuʻuaki ʻa e makasiní, pea fokotuʻutuʻu ke foki ʻo tali ʻa e fehuʻi hono hokó.

Ko e Taua Leʻo Nōvema-Tīsema

“ʻOku tokolahi ʻa e kakai ʻoku nau ongoʻi ʻoku mahuʻinga ke nau nima-homo mo foaki ha ngaahi meʻaʻofa ke tokoniʻi fakapaʻanga honau siasí. Kuó ke fifili nai ki ha faʻifaʻitakiʻanga naʻe fokotuʻu ʻe he kau Kalisitiane ʻo e ʻuluaki senitulí fekauʻaki mo e meʻá ni? [Tuku ke ne tali.] Fakatokangaʻi ʻa e meʻa ʻoku leaʻaki ʻe he Tohi Tapú fekauʻaki mo e ʻulungaanga ʻoku totonu ke maʻu ʻe ha taha ʻi he taimi ʻoku foaki ai ha meʻaʻofa. [Lau ʻa e 2 Kolinitō 9:7.] Ko e kupu ʻi he peesi 13 ʻo e makasini ko ení ʻoku fakamatala ai ki he ʻulungaanga ʻoku ʻofa ai ʻa e ʻOtuá ʻi he taimi ʻoku foaki ai ʻe ha taha ha meʻaʻofa.”