Ngāueleleiʻaki ʻa e Makasini Motuʻá
Ko e ngaahi makasini motuʻá ʻe ʻikai ke ʻaonga ki ha taha ʻo kapau ʻoku tau tauhi pe laku ia, ʻoku totonu ke tau feinga ke tufa ia. ʻE lava ʻe ha kiʻi makasini ke ueʻi ha tokotaha ke ne mahuʻingaʻia ʻi he moʻoní, pea ueʻi ai ia ke ne kamata ui ki he huafa ʻo Sihová. (Loma 10:13, 14) Ko e ngaahi fokotuʻu eni ʻe niʻihi ke ngāueleleiʻaki hono tufa ʻa e ngaahi makasini motuʻá.
ʻI he malanga ʻi ha feituʻu ngāue ʻoku ʻikai faʻa ngāueʻi, ʻe lava nai ke ke tuku ha makasini ʻo ʻikai fakaʻasi ki tuʻa ʻi he ngaahi ʻapi ʻoku ʻikai ʻi ai ha tahá.
ʻI he fai fakamoʻoni ʻi he feituʻu kakaí, ʻa ia ʻoku nau talitali aí, hangē ko e tauʻanga pasi, tauʻanga tekisī, ʻeke ange kiate kinautolu pe te nau saiʻia ke lau ha kiʻi makasini, fakaʻaliʻali ange ha ngaahi tatau kehekehe ʻo e ngaahi makasini motuʻá, pea tuku ke nau fili.
ʻI he taimi ʻokú ke ʻalu ai ki ha ngaahi ʻōfisi, falemahaki, kilīniki, pe ko ha ngaahi feituʻu pē ʻoku talitali ai ha kakai ʻi he feituʻu ngāue ʻa hoʻo fakatahaʻangá, tuku ai ha niʻihi ʻo e ngaahi makasini motuʻá ʻi he loki talitalí. ʻOku lelei maʻu pē ke ʻuluaki maʻu ha ngofua mei he tokotaha ʻokú ne tokangaʻi ʻa e feituʻu ko iá kapau ʻokú ne ʻi ai. Kapau ʻokú ke fakatokangaʻi kuo ʻosi tuku ai ha ngaahi makasini ʻoua ʻe toe tuku ai ha makasini.
ʻI he taimi ʻokú ke teuteu ai ki ha toe ʻaʻahi, fakakaukau ki he meʻa ʻoku mahuʻingaʻia ai ʻa e tokotaha taki taha ʻokú ke fokotuʻutuʻu ke ʻaʻahi ki aí. ʻOku maʻu fāmili? ʻOku saiʻia ʻi he fefolauʻakí? ʻOku saiʻia he ngoué? Vakaiʻi ʻa e ngaahi kupu ʻi loto ʻi he ngaahi makasini motuʻá ke sio pe ʻoku ʻi ai ha kupu ʻe saiʻia nai ke ne lau, pea fakaʻaliʻali kiate ia ʻi he taimi hoʻo toe foki ki aí.
ʻI he taimi ʻokú ke toe fetaulaki ai mo ha tokotaha mahuʻingaʻia ʻi hono ʻapí, hili haʻo fai ha feinga hokohoko ke fetuʻutaki kiate ia, fakaʻaliʻali ange ʻa e niʻihi ʻo e ngaahi makasini motuʻa naʻe teʻeki ai ke ne maʻú.