Fakaleleiʻi ʻEtau Pōtoʻi ʻi he Ngāue Fakafaifekaú—Fakahāhā ha Ako Tohi Tapu ʻo Ngāueʻaki ʻa e Tohi Akoʻi ʻe he Tohi Tapú

ʻUhinga ʻOku Mahuʻinga Aí: Ko e kakai tokolahi heʻikai nai ke nau mahinoʻi ʻa e meʻa ʻoku tau ʻuhinga ki ai ʻi he taimi ʻoku tau tuʻuaki ange ai ha ako Tohi Tapu taʻetotongi ʻi ʻapi. Te nau fakakaukau nai ʻoku pau ke nau kau ʻi ha kulupu ako pe ko ha koosi fetohiʻaki. ʻI he ʻikai tuʻuaki pē ha akó, fēfē ke fakahāhā ha ako? ʻI ha ngaahi miniti siʻi pē, naʻa mo e ʻi he matapaá, ʻe lava ke ke fakahāhā ki ha tokotaha ko hono ako ʻa e Tohi Tapú ʻoku faingofua mo fakafiefia.

Founga Hono Fai Iá:

Hili hono fakafeʻiloaki koé, ʻeke ki he tokotaha-ʻapí pe ʻokú ne hohaʻa fekauʻaki mo e kahaʻú.
Tala ange ʻoku hohaʻa pehē pē mo e kakai tokolahi pea fakahaaʻi ange kiate ia ʻa e meʻa ʻi loto ʻi he tohi Akoʻi ʻe he Tohi Tapú. Fakamatalaʻi ʻoku maʻu ʻi he tohi ko ení ʻa e ngaahi lēsoni faingofua ke mahinoʻi ʻa ia ʻoku hā ai ʻa e ngaahi akonaki ʻa e Tohi Tapú fekauʻaki mo e kahaʻú mo e ngaahi kaveinga kehe, pea ʻeke ange pe ko fē ʻa e vahe ʻokú ne mahuʻingaʻia aí.
ʻOange kiate ia ha tatau ʻo e tohí, pea fakahaaʻi kiate ia ʻa e vahe naʻá ne filí. Fakamatalaʻi ʻa e ngaahi fehuʻi ʻi he kamataʻanga ʻo e vahé ʻa ia ʻoku tali ʻi he ngaahi palakalafí.
Kole ki he tokotaha-ʻapí ke ne lau ʻa e ʻuluaki palakalafí ʻo kapau te ne loto ki ai. Lau leva ʻa e fehuʻi ki he palakalafi ko iá, pea lāulea fakataha ki he talí. Kumi mo lāulea ki he ngaahi konga Tohi Tapu ʻoku haá ʻa ia ʻokú ne poupouʻi ʻa e talí. Fakahaaʻi ange kiate ia ʻa e founga kuó ke laineʻi ai ʻa e talí ʻi hoʻo tohí.
Lāulea ki he palakalafi hokó, ka ʻi he taimi ko ení kole ki he tokotaha-ʻapí ke feinga ke ʻomai ʻene talí ʻi heʻene ngaahi lea pē ʻaʻana.
Fakaongoongoleleiʻi ia, pea fokotuʻutuʻu ke toe foki atu ʻo fakaʻosi ʻa e lēsoní.
Kapau ʻoku feʻungamālie, taki ʻene tokangá ki he vitiō ʻi he jw.org ʻoku fakakaveinga Ko e Hā ʻOku Fai ʻi ha Ako Tohi Tapu?

ʻAhiʻahiʻi Eni ʻi he Lolotonga ʻa e Māhiná:

Lotu ʻo kole ke tāpuakiʻi ʻe Sihova hoʻo ngaahi feinga ke kamata ha ako Tohi Tapu foʻoú.—Fil. 2:13.
Feinga ke fakahāhā ha ako Tohi Tapu ʻo ngāueʻaki ʻa e tohi Akoʻi ʻe he Tohi Tapú pe fakahaaʻi ʻa e vitiō Ko e Hā ʻOku Fai ʻi ha Ako Tohi Tapu? ʻo tuʻo taha pe lahi ange lolotonga ʻa e kau atu ʻi he ngāue fakafaifekaú.