Kuó Ke Fakahāhaaʻi ha Ako ʻi he ʻUluaki ʻAʻahí?
ʻI hono tuʻuaki ha ako Tohi Tapú, ʻoku pehē ʻe he faʻahinga ʻe niʻihi ʻi he ʻapí ʻoku ʻikai te nau mahuʻingaʻia pe ʻoku ʻi ai pē ha ako Tohi Tapu ia ʻa honau siasí. Koeʻuhi ʻoku ʻikai nai te nau ʻiloʻi ʻoku kehe ʻetau ako Tohi Tapú mei he ako ʻa e ngaahi kulupu fakalotu kehé, ʻoku ʻikai te nau ʻiloʻi ʻoku lava ke hoko ia ko ha meʻa fakamaama mo ha meʻa fakafiefia. Ko ia ai, ʻi he ʻikai tuʻuaki pē ha akó, fēfē ke vaheʻi ha ngaahi miniti ke fakahāhaaʻi ai ʻa e fokotuʻutuʻu ki he ako Tohi Tapú ʻi he ʻuluaki ʻaʻahí. Ke fakatātaaʻi: ʻOua ʻe tala ange pē ko ha tokotaha kuki lelei koe pea tuʻuaki ange te ke foki ange mo ha meʻakai; ʻoange he taimi pē ko iá ke nau ʻahiʻahiʻi! Ko e founga eni ʻe lava ke ke fai ai ia ʻi ha ngaahi miniti siʻi pē, ʻo ngāueʻaki ʻa e fokotuʻu ʻi he peesi 6 ʻo e Ko ʻEtau Ngāue Fakafaifekau ʻo e Puleʻanga ʻo Sepitema 2005:
“ʻOkú ke pehē ʻe faifai ange pea ʻi ai ha ʻaho ʻe fakahoko ai ʻa e ngaahi lea ko ení? [Lau ʻa e Aisea 33:24, pea tuku ke ne tali.] Tuku ke u fakahaaʻi atu ha meʻa mahuʻinga ʻi he kaveinga ko iá.” ʻOange ki he tokotaha-ʻapí ha tohi Akoʻi ʻe he Tohi Tapú, pea ʻai ke ne sio ki he palakalafi 22 ʻi he peesi 36. Lau ʻa e fehuʻi ʻi lalo ʻi he pēsí, pea kole ange ki he tokotaha-ʻapí ke ne kumi ʻa e talí ʻi hoʻo lau ʻa e palakalafí. Toe ʻeke leva ʻa e fehuʻí, pea fanongo ki he tali ʻa e tokotaha-ʻapí. Lau fakataha ha toe ngaahi konga Tohi Tapu. ʻOhake ha fehuʻi ke tali ʻi he toe ʻaʻahi hono hokó, pea fai ha fokotuʻutuʻu pau ke toe foki ki ai. Kuó ke toki ʻosi kamata leva ha ako Tohi Tapu!