Ko ʻEtau Uepisaiti Fakaʻofisialé—Kuo Fakataumuʻa Ke Tau Maʻu ʻAonga mei Ai mo e Niʻihi Kehé
Naʻe fekauʻi kitautolu ʻe Sīsū ke malangaʻi ʻa e ongoongo lelei ʻo e Puleʻangá “ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.” (Māt. 24:14) Koeʻuhi ke tokoniʻi kitautolu ke ‘fakahoko kakato ʻa ʻetau ngāue fakafaifekaú,’ ko e watchtower.org, jw-media.org, mo e jw.org kuo fakatahaʻi ia ʻo faʻu foʻou ke toe lelei ange ʻi he Uepisaiti jw.org.—2 Tīm. 4:5.
“Kotoa ʻo e Māmani Kuo Nofoʻí”: ʻOku meimei ko e vahe tolu ʻe taha ʻo e kakai he māmaní ʻoku nau ngāueʻaki ʻa e ʻInitanetí. Kuo hoko ia ko e maʻuʻanga fakamatala tefito ki he tokolahi, tautefito ki he toʻutupú. Ko ʻetau saití te ne ʻoatu ki he kau ngāueʻaki ʻo e ʻInitanetí ha ngaahi tali moʻoni ki he ngaahi fehuʻi Fakatohitapú. ʻOkú ne fakafeʻiloaki kinautolu ki he kautaha ʻa Sihová pea faingofua ai kiate kinautolu ke fai ha kole ki ha ako Tohi Tapu taʻetotongi. ʻOku malava ai ʻa e ongoongo leleí ke hūhū ki he ngaahi feituʻu ʻi he māmaní ʻa ia ko e kakai aí ʻoku siʻisiʻi ʻa e ngaahi faingamālie ke fanongo ki he pōpoaki ʻo e Puleʻangá.
“Ngaahi Puleʻanga Kotoa Pē”: Koeʻuhi ke ʻoatu ha fakamoʻoni ki he “ngaahi puleʻanga kotoa pē,” ko e moʻoni ʻo e Tohi Tapú kuo pau ke ʻoatu ia ʻi he ngaahi lea kehekehe. Ko e kau ʻaʻahi ki he jw.org ʻe faingofua ke nau maʻu ʻa e fakamatalá ʻi he lea ʻe 400 nai ʻo laka hake ia ʻi ha toe Uepisaiti.
Ngāueleleiʻaki Ia: Ko e Uepisaiti jw.org kuo fokotuʻutuʻu foʻoú ʻoku ʻikai ko e taumuʻa pē ke faifakamoʻoni ki he kau taʻetuí. Kuo fokotuʻutuʻu ia ke ngāueʻaki ʻe he Kau Fakamoʻoni ʻa Sihová foki. Kapau ʻoku malava ke ke ngāueʻaki ʻa e ʻInitanetí, ʻoku mau fakalototoʻaʻi koe ke ke hoko ʻo alāanga mo e jw.org. Ko e ngaahi fokotuʻu eni ʻe niʻihi ki he founga hono ngāueʻakí.
[Fakatātā ʻi he peesi 3]
(Ki he fakamatala kakato, sio ki he tohí)
ʻAhiʻahiʻi Ia
1 Fakahū ʻa e www.jw.org ki he tuʻasilá ʻi he polokalama ʻInitaneti ʻi hoʻo komipiutá.
2 Kumi ʻi he saití ʻaki hoʻo lomi ki he kaveinga ʻi ʻolunga, ʻi he tafaʻaki mo e kaveinga ʻi loto.
3 ʻAhiʻahi ngāueʻaki ʻa e jw.org ʻi he ʻInitaneti hoʻo telefoni toʻotoʻó. Feinga ke hao ʻa e pēsí ʻi hoʻo kiʻi telefoní, ka ko e fakamatalá ʻoku kei tatau pē.