What Can the Bible Teach Us?​—Founga Hono Ngāueʻakí

Ko e tohi Teach Us mo e tohi Akoʻi ʻe he Tohi Tapú ʻokú na meimei tatau. Ko e ongo meʻangāue eni mei heʻetau puha meʻangāue fakafaiakó ʻoku tatau ʻa e tefitoʻi moʻoni ʻi aí mo fakahokohoko tatau. Kae kehe, ko e tohi Teach Us ʻoku faingofua ange ʻa e ngaahi lea mo e fakakaukau ʻoku ngāueʻaki ʻi aí. ʻOku faʻu ia ki he faʻahinga ʻoku faingataʻa ke nau mahinoʻi ʻa e tohi Akoʻi ʻe he Tohi Tapú. ʻI he ʻikai ke ʻi ai ha ʻapenitikí, ko e tohi Teach Us ʻoku ʻi ai ʻa e fakamatala ʻi he ngataʻangá ʻoku faingofua hono fakamatalaʻi ʻi ai ha kupuʻi lea mo e fakakaukau ʻoku ʻi he vahe ko iá. Ko e ngaahi vahé ʻoku ʻikai ʻi ai ha ngaahi fehuʻi talateu pe puha fakamanatu. ʻIkai ko ia pē, ʻoku nau fakamulitukuʻaki ʻa e ngaahi moʻoni ʻi he Tohi Tapú ʻa ē naʻe fakamatalaʻi ʻi he vahé. Hangē pē ko e tohi Akoʻi ʻe he Tohi Tapú, ko e tohi Teach Us ʻoku lava ke tuʻuaki ia ʻi ha faʻahinga taimi pē, neongo ʻoku ʻikai tuʻuaki ia ʻi he lolotonga ʻo e māhiná. ʻI he founga fē ʻe lava ai ke tau ngāueʻaki ʻa e ngaahi tafaʻaki kehe ʻo e tohi Teach Us ʻi he fakahoko ʻo ha ako Tohi Tapu?

FAKAMĀʻOPOʻOPO: Ko e tokolahi taha ʻo e kakaí, ʻoku nau anga ki heʻetau founga fakahoko ʻo e akó ʻaki hono lau ʻa e palakalafi ʻi he tohi Akoʻi ʻe he Tohi Tapú pea toki ʻeke ʻa e fehuʻí pea naʻe ola lelei ia. Kae kehe, fakakaukau atu kapau ko e tokotaha akó ʻoku ʻikai fuʻu poto ia ʻi he lea ʻoku fakahoko ai ʻa e akó pe ʻoku ʻikai lautohi lelei. ʻI he tuʻunga ko iá, te ke fili nai ke ngāueʻaki ʻa e tohi Teach Us. Hili iá, ʻe lava ke ngāueʻaki nai ʻa e fakamāʻopoʻopo ʻi he vahé ke tefito mei ai ʻa e akó pea fakalototoʻaʻi nai e tokotaha akó ke lau ʻa e vahe ko iá ʻiate ia pē. Ko e moʻoni Fakatohitapu taki taha ʻoku faʻa akoʻi ia ʻi ha miniti ʻe 15 nai. Koeʻuhi ko e ʻikai ke fakakau ʻi he fakamāʻopoʻopó ʻa e fakaikiiki kotoa ʻo e vahé, kuo pau ki he faiakó ke teuteu lelei pea manatuʻi ʻa e tuʻunga ʻo e tokotaha akó. Kapau ʻoku fakahoko ʻe he faiakó ʻa e akó mei he vahé, ʻe ngāueʻaki leva ʻa e fakamāʻopoʻopó ko ha fakamanatu.

FAKAMATALA ʻI HE NGATAʻANGÁ: Ko e ngaahi kupuʻi lea mo e fakakaukau ʻi he fakamatala ʻi he ngataʻangá ʻoku fakahokohoko lelei ia ʻo hangē ko ia ʻoku hā ʻi he vahé. ʻE fili nai ʻa e faiakó pe ʻe lāulea ki he fakamatala ʻi he ngataʻangá lolotonga ʻa e ako ʻi he tohi Teach Us.