ʻOku Tokanga Mai Hotau Tokotaha-Fakatupu ʻOfá
1. ʻAI ʻE HOTAU TOKOTAHA-FAKATUPÚ KE HOPO ʻA E LAʻĀ
ʻE lava ke ke sioloto atu ki he moʻui ʻi ha māmani ʻoku ʻikai ke ʻi ai ha laʻā? ʻOku tokonaki ʻe he laʻaá ha ivi ki he ʻuluʻakaú ke faʻuʻaki ʻa e lauʻiʻakau, matalaʻiʻakau, fuaʻiʻakau, nati mo e tengaʻiʻakau. ʻOkú ne toe ʻai ʻa e ʻuluʻakaú ke nau mimisi hake ʻa e vai mei he kelekelé ʻi honau aká pea ʻohake ia ki hono laú pea toki tuku ange atu ki he ʻeá ko e mao.
2. ʻOMAI ʻE HOTAU TOKOTAHA-FAKATUPÚ ʻA E ʻUHA
Ko e ʻuhá ko ha meʻaʻofa mahuʻinga mei he ʻOtuá ʻokú ne ʻai ke malava ʻe he māmaní ʻo fakatupu mai ha meʻakai ke tau kai. ʻOku ʻomai ʻe he ʻOtuá ʻa e ʻuha mei he langí mo e ngaahi faʻahitaʻu mahu, ʻo ne fakamākona kitautolu ʻaki ʻa e meʻakai pea fakafonu hotau lotó ʻaki ʻa e fiefia.
3. TOKONAKI MAI ʻE HOTAU TOKOTAHA-FAKATUPÚ ʻA E MEʻAKAI MO E VALA
ʻOku tokolahi ʻa e ngaahi tamai ʻoku nau loto-moʻua ke tokonaki ha meʻakai mo e vala feʻunga maʻa honau fāmilí. Fakatokangaʻi ʻa e meʻa ʻoku leaʻaki ʻe he Folofolá: “Siofi fakalelei ʻa e fanga manupuna ʻo e langí; ʻoku ʻikai te nau tūtuuʻi pe utu pe faʻoaki feleoko, ka ʻoku fafanga kinautolu ʻe hoʻomou Tamai fakahēvaní. ʻIkai ʻoku mou mahuʻinga ange kimoutolu ʻiate kinautolu?”—Mātiu 6:25, 26.
“Ako mei he ngaahi lile ʻo e vaó, ʻi he anga ʻo ʻenau tupú . . . ; ka ʻoku ou tala atu kiate kimoutolu naʻa mo Solomone ʻi he kotoa ʻo hono lāngilangí naʻe ʻikai ke teungaʻia ia ʻo hangē ko ha taha ʻo e ngaahi lilé ni. Kapau leva ʻoku fakateunga pehē ʻe he ʻOtuá ʻa e ʻakau ʻo e vaó . . . , ʻikai ʻe lahi ange ʻene fakateunga kimoutolú?”—Mātiu 6:28-30.
Koeʻuhi ʻoku lava ke tokonaki mai ʻe he ʻOtuá ʻa e meʻakai mo e vala, ko hono moʻoní ʻe lava foki ke ne tokoniʻi kitautolu ke tau maʻu ʻa e ngaahi fiemaʻu pau kehe ki he moʻuí. Kapau te tau feinga ke fai ʻa e finangalo ʻo e ʻOtuá, te ne tāpuakiʻi ʻetau feinga ke tō ha meʻakai pe te ne tokoniʻi kitautolu ke maʻu ha ngāue ke lava ai ʻo tau fakatau ʻa e meʻa ʻoku tau fiemaʻú.—Mātiu 6:32, 33.
Ko e moʻoni, ʻoku tau maʻu ʻa e ngaahi ʻuhinga lelei ke ʻofa ai ki he ʻOtuá ʻi heʻetau fakakaukau atu ki he laʻaá, ʻuhá, fanga manupuná mo e matalaʻiʻakaú. ʻE lāulea ʻa e kupu hokó ki he founga kuo fetuʻutaki ai ʻa hotau Tokotaha-Fakatupú mo e tangatá.