ʻOfa ki he ʻOtuá mo e Kaungāʻapí—Founga ke Fakatupulekina Ai Iá

Neongo ko e Lao ʻa Mōsesé ʻoku ʻikai haʻisia ki ai ʻa e Kalisitiané, ko hono ongo fekau lahi tahá—ke ʻofa ki he ʻOtuá pea ke ʻofa ki hotau kaungāʻapí—ʻokú ne kei fakahaaʻi mai ʻa e meʻa ʻoku fiemaʻu ʻe Sihova meiate kitautolú. (Māt. 22:37-39) ʻOku ʻikai te tau maʻu tukufakaholo ʻa e ʻofa ko iá. Kuo pau ke fakatupulekina ia. ʻI he founga fē? Ko e founga mahuʻinga ʻe taha ko hono lau fakaʻaho ʻa e Tohi Tapú. ʻI heʻetau fakakaukau atu ki he ngaahi tafaʻaki kehekehe ʻo e ʻulungaanga ʻo e ʻOtuá ʻo hangē ko ia ʻoku fakahaaʻi mai ʻe he Tohi Tapú, ʻoku tau sio ai ki he “fakaʻofoʻofa ʻo Sihová.” (Saame 27:4) Ko hono olá, ʻoku tupulaki ai ʻetau ʻofa kiate iá pea ʻoku hoko lahi ange ai ʻetau fakakaukaú ʻo hangē ko ʻene fakakaukaú. ʻOku ueʻi ai kitautolu ke tau tauhi ʻa e ngaahi fekau ʻa e ʻOtuá, ʻo kau ai ʻa e fekau ke fakahāhā ʻa e ʻofa feilaulauʻi-kita ki he niʻihi kehé. (Sione 13:34, 35; 1 Sio. 5:3) Ko ha fokotuʻu eni ʻe tolu ke ʻai ai ʻetau lau Tohi Tapú ke fakamānako ange:

• Ngāueʻaki ʻa e siolotó, pea ngāueʻaki ho ngaahi ongoʻangá. Sioloto atu ʻokú ke ʻi ai. Ko e hā ʻokú ke sio, fanongo ki ai mo nāmuʻí? Ko e hā nai ʻa e ngaahi ongoʻi ʻa e faʻahinga ʻi aí?

  

• ʻAi ke kehekehe hoʻo fakafeangaí. Ko e ngaahi fokotuʻu eni ʻe niʻihi: Lau leʻo-lahi, pe muimui ʻi he lolotonga hoʻo fanongo ki ha hiki-leʻo. Lau leʻo-lahi ʻo fekauʻaki mo ha tokotaha pau ʻi he Tohi Tapú pe tuʻunga-lea kae ʻikai ko hono lau fakahokohoko ha ngaahi vahe. Ko e fakatātaá, ngāueʻaki ʻa e Fakamatala Fakalahi A7 pe E12 ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ke lau ai fekauʻaki mo Sīsū. Lau ʻa e foʻi vahe fakakātoa ʻoku toʻo mei ai ʻa e potu tohi fakaʻahó. Lau ʻa e ngaahi tohi ʻi he Tohi Tapú ʻi he hokohoko naʻe hiki ai kinautolú.

  

• Lau ke mahinoʻi. Ko hono lau ha foʻi vahe ʻe taha ʻi he ʻaho taki taha ke mahinoʻi pea fakalaulauloto ki aí ʻoku lelei ange ia ʻi hono lau ha ngaahi vahe lahi ke ʻosiki ʻa e fakamatalá. Fakakaukau ki he taimí mo e feituʻú. Sivisiviʻi ʻa e ngaahi fakaikiikí. Ngāueʻaongaʻaki ʻa e ngaahi mapé mo e ngaahi maʻuʻanga fakamatala he tafaʻakí. Kumi ʻo ʻikai toe siʻi hifo ʻi ha foʻi poini ʻe taha ʻa ia ʻoku ʻikai te ke mahinoʻí. ʻO ka malava, fakamoleki ʻa e meimei taimi tatau ke ke fakalaulauloto ai ʻi hoʻo lau iá.