Feingangāue Makehe ki Sepitema ke Kamataʻi ha Ngaahi Ako Tohi Tapu

ʻI Sepitema, te tau feinga mālohi ke tuʻuaki ha ngaahi ako Tohi Tapu ki ha taha pē ʻo ngāueʻaki ʻa e polosiua Fiefia ʻi he Moʻuí ʻo Taʻengata! ʻE fili nai ʻe he kau malangá ke tāimuʻa tokoni ʻi ha houa ʻe 30. ʻE anga-fēfē ʻetau fakahoko ʻa e feingangāue makehe ko ení?

• ʻI he ʻUluaki ʻAʻahí: Ngāueʻaki ʻa e peesi fakaʻosi ʻo e polosiuá ke langaʻi ha mahuʻingaʻia pea feinga ke fakahāhaaʻi ha ako. Manatuʻi ʻa e faʻahinga naʻa nau fakahaaʻi ha mahuʻingaʻia ki muʻa, kau ai ʻa e ngaahi toe ʻaʻahí. Neongo naʻe ʻikai ke nau tali ha ako ʻi he kuohilí, te nau mahuʻingaʻia nai ʻi heʻetau founga ako foʻoú mo e polosiuá. ʻOku ʻikai ke totonu ke tuku ʻa e ngaahi polosiuá ʻi ha ʻapi ʻoku ʻikai ʻi ai ha taha pe ʻave ia ʻi ha tohi ki he faʻahinga naʻe ʻikai ke nau mahuʻingaʻia ʻi he kuohilí. ʻE fokotuʻutuʻu nai ʻe he Kōmiti Ngāue ʻa e Fakatahaʻangá ha toe ngaahi fakataha malanga lolotonga ʻa e taimi ko iá.

• Ngaahi Faingamālie Kehe: Kapau ʻoku ngāueʻaki ʻe he fakatahaʻangá ʻa e ngaahi papa tuʻuakí, fakaʻaliʻali ai ʻa e polosiua Fiefia ʻi he Moʻuí ʻo Taʻengata! Fakahaaʻi ange ki he faʻahinga ʻoku mahuʻingaʻia ʻi he polosiuá ʻoku fai ai mo ha ako Tohi Tapu taʻetotongi. Fakahāhaaʻi nounou ha ako Tohi Tapu lolotonga ʻa e fetalanoaʻakí pe fokotuʻutuʻu ke hoko atu ʻamui ange. ʻE fokotuʻutuʻu nai ʻe he ʻovasia ngāué ha kau malanga taau ke ngāue ʻi he feituʻu faiʻanga pisinisí pea tuʻuaki ha ngaahi ako Tohi Tapu. Te ke toe tuʻuaki nai ha ako Tohi Tapu ki he kaungāngāué pe ki he kakai ʻokú ke fetaulaki mo ia lolotonga hoʻo faifakamoʻoni ʻi he founga ʻikai anga-mahení.

Naʻe fekauʻi kitautolu ʻe Sīsū ke tau “ngaohi ākonga” pea “akoʻi kinautolu.” (Māt. 28:19, 20) ʻOfa ke tokoniʻi kitautolu ʻe he feingangāue makehe ko ení ke fakahoko ʻa e taumuʻa ko hono ngāueʻaki ʻa e Fiefia ʻi he Moʻuí ʻo Taʻengata!