Mou Ō ʻo Ngaohi Ākonga

1-2. Ko e hā naʻe tala ʻe ha ʻāngelo ki he ongo fefine ʻi he faʻitoka ʻo Sīsuú, pea ko e hā ʻa e fakahinohino naʻe ʻoange tonu ʻe Sīsuú?

KO E maʻa hake eni ʻa e ʻahó, ʻi Nīsani 16, 33 T.S. ʻI he loto-mamahi lahi, ko ha kulupu ʻo e kau fefine manavahē ʻOtua naʻa nau fononga atu ki he fonualoto ʻa ia ʻi he houa ʻe 36 ki muʻa ange naʻe tanu ai ʻa e sino ʻo e ʻEiki ko Sīsū Kalaisí. ʻI heʻenau aʻu ki he faʻitoká, ʻo fakataumuʻa ke ʻai ʻa e ngaahi sipaisi mo e ngaahi lolo namu-kakala ki he sinó, naʻa nau ʻohovale ke ʻilo ʻoku ʻikai ha taha ʻi he fonualotó! Pea naʻe tala ʻe ha ʻāngelo ki ha ongo ākonga kuo toetuʻu ʻa Sīsū mei he maté mo pehē: “ʻOkú ne muʻomuʻa ʻiate kimoutolu ki Kāleli. Te mou sio ai kiate ia.”—Māt. 28:1-7; Luke 23:56; 24:10.

² Hili ʻa e mavahe ʻa e ongo fefiné mei he fonualotó, naʻe fakaofiofi atu ʻa Sīsū tonu kiate kinaua pea ʻoange ʻa e fakahinohino ko ení: “Mo ō, ʻo fakahā ki hoku fanga tokouá koeʻuhi ke nau ʻalu ki Kāleli, pea ko e feituʻu ia te nau sio ai kiate aú.” (Māt. 28:10) Kuo pau pē naʻe maʻu ʻe Sīsū ha fakahinohino mātuʻaki mahuʻinga ke ʻoange ki heʻene kau ākongá, he ko e fakataha ko ení ʻa e fuofua meʻa naʻá ne fokotuʻutuʻu hili ʻene toetuʻú!

KO HAI NAʻE ʻOANGE KI AI ʻA E FEKAÚ?

3-4. Ko e hā ʻoku lava ai ke tau pehē ko e fekau ʻoku hiki ʻi he Mātiu 28:19, 20 naʻe ʻikai ke ʻoange pē ki he kau ʻapositoló? (Sio ki he tā ʻi he takafí.)

³ Lau ʻa e Mātiu 28:16-20. ʻI he fakataha naʻe fokotuʻutuʻu ʻe Sīsuú, naʻá ne fakamāʻalaʻala ai ʻa e ngāue mātuʻaki mahuʻinga ʻe fakahoko ʻe heʻene kau ākongá ʻi he kotoa ʻo e ʻuluaki senitulí—ko e ngāue tatau ʻoku tau fakahoko ʻi he ʻaho ní. Naʻe pehē ʻe Sīsū: “Ko ia ai, mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, . . . pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú.”

⁴ ʻOku loto ʻa Sīsū ke malanga ʻa e kotoa hono kau muimuí. Naʻe ʻikai ke ne fakangatangata ʻa e fekau ko ení ki he kau ʻapositolo faitōnunga ʻe toko 11. ʻE lava fēfē ke tau fakapapauʻi? Ko ʻene kau ʻapositoló pē naʻe ʻi ai ʻi heʻene ʻoatu ʻa e fekau ke ngaohi ākongá ʻi he moʻunga ʻi Kālelí? Manatuʻi ʻa e meʻa naʻe tala ange ʻe he ʻāngeló ki he ongo fefiné: “Te mou sio ai kiate ia [ʻi Kāleli].” Ko ia kuo pau pē foki naʻe ʻi ai mo e kau fefine faitōnunga ʻi he fakataha ko iá. Ka ʻoku ʻikai ko ia pē. ʻOku fakahaaʻi ʻe he ʻapositolo ko Paulá ko Sīsū “naʻá ne hā ki he fanga tokoua ʻe toko 500 tupu ʻi he foʻi taimi pē ʻe taha.” (1 Kol. 15:6) ʻI fē?

5. Ko e hā ʻoku tau ako mei he 1 Kolinitō 15:6?

⁵ ʻOku tau maʻu ʻa e ngaahi ʻuhinga lelei ke fakakaukau naʻe fakakaukau ʻa Paula ki he fakataha tofu pē ʻi Kāleli ʻa ia naʻe fakamatalaʻi ʻi he Mātiu vahe 28. Ko e hā hono ʻuhingá? ʻUluakí, ko e tokolahi taha ʻo e kau muimui ʻa Sīsuú ko e kau Kāleli. Ko ia ko ha moʻunga ʻi Kāleli—ʻikai ko ha ʻapi ʻo ha taha ʻi Selusalema—ʻe hoko ia ko ha feituʻu feʻungamālie ki he fakatahataha ʻa ha fuʻu kakai tokolahi. Uá, ko Sīsū naʻe toetuʻú naʻá ne ʻosi fetaulaki mo ʻene kau ʻapositolo ʻe toko 11 ʻi ha ʻapi ʻi Selusalema. Kapau naʻe loto ʻa Sīsū ke fakahinohinoʻi pē ʻene kau ʻapositoló ki he malangá mo e ngaohi ākongá, naʻá ne mei fai pē ia ʻi Selusalema kae ʻikai ko e fekau kinautolu mo e kau fefiné mo e niʻihi kehe ke nau fakataha ʻi Kāleli.—Luke 24:33, 36.

6. ʻOku anga-fēfē hono fakahaaʻi ʻi he Mātiu 28:20 ko e fekau ke ngaohi ākongá ʻoku ngāueʻaki ki he ʻahó ni, pea ʻoku anga-fēfē talangofua ʻa e kakaí ki he fekau ko ení?

⁶ Fakatokangaʻi ha ʻuhinga mahuʻinga hono tolu. Ko e fekau ʻa Sīsū ke ngaohi ākongá naʻe ʻikai fakangatangata pē ki he kau Kalisitiane ʻi he ʻuluaki senitulí. ʻOku anga-fēfē ʻetau ʻiló? Naʻe fakaʻosi ʻe Sīsū ʻene fakahinohino ki hono kau muimuí ʻaki ʻa e ngaahi lea: “ʻOku ou ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Māt. 28:20) ʻI hono fakamoʻoniʻi ʻa e lea ʻa Sīsuú, ko e ʻahó ni ko e ngāue ngaohi ākongá ʻoku lele ʻi matangí. Fakakaukau atu ki ai! ʻOku ofi ki he kakai ʻe toko 300,000 ʻi he taʻu taki taha ʻoku nau papitaiso ko e Kau Fakamoʻoni ʻa Sihova pea hoko ko e kau ākonga ʻa Sīsū Kalaisi!

7. Ko e hā te tau lāulea ki ai he taimi ní, pea ko e hā hono ʻuhingá?

⁷ Ko e tokolahi ʻoku nau ako ʻa e Tohi Tapú ʻoku nau fakalakalaka ʻo papitaiso. Kae kehe, ko e niʻihi ʻoku nau ako tuʻumaʻu ʻa e Tohi Tapú mo kitautolu ʻoku hā ngali ʻoku nau toumoua ke hoko ko ha ākonga. ʻOku nau fiefia ʻi heʻenau akó, ka ʻoku ʻikai ke nau fakalakalaka ke papitaiso. Kapau ʻokú ke fakahoko ha ako Tohi Tapu, ʻoku pau pē ʻokú ke loto ke tokoniʻi hoʻo tokotaha akó ke ngāueʻaki ʻa e meʻa ʻokú ne akó pea hoko ko ha ākonga ʻa Kalaisi. ʻE lāulea ʻa e kupu ko ení ki he founga ʻe lava ke tau aʻu ai ki he loto ʻo e tokotaha akó pea mo e founga ʻe lava ke tau tokoniʻi ai ia ke tupulaki fakalaumālié. Ko e hā ʻoku fiemaʻu ai ke tau lāulea ki he kaveinga ko ení? Koeʻuhí ʻi ha taimi ʻe fiemaʻu ke tau fili pe ʻe hokohoko atu ʻa e akó pe ʻikai.

FEINGA KE AʻU KI HE LOTÓ

8. Ko e hā ʻe lava ke faingataʻa ai ke aʻu ki he lotó?

⁸ ʻOku finangalo ʻa Sihova ki he kakaí ke tauhi kiate ia koeʻuhi ko ʻenau ʻofa kiate iá. Ko ia ko ʻetau taumuʻá ke tokoniʻi ʻetau kau akó ke mahinoʻi ʻoku tokanga loloto mai ʻa Sihova kiate kinautolu taautaha pea ʻokú ne ʻofa lahi ʻiate kinautolu. ʻOku tau loto ke tokoniʻi kinautolu ke vakai kia Sihova “ko ha tamai ia ʻa e tamai-maté pea ko ha tokotaha maluʻi ʻo e kau uitoú.” (Saame 68:5) ʻI he hoko hoʻo kau akó ʻo houngaʻia ʻi he ʻofa ʻa e ʻOtuá ʻiate kinautolú, ʻoku ngalingali ʻe maongo ki honau lotó pea ko ʻenau ʻofa kiate iá ʻe tupulaki. Ko e kau ako ʻe niʻihi ʻe faingataʻa nai ke nau vakai kia Sihova ko ha Tamai ʻofa koeʻuhi ko ʻenau tamaí tonu naʻe ʻikai ke ne fakahaaʻi ange ha ʻofa kiate kinautolu. (2 Tīm. 3:1, 3) ʻI hoʻo fakahoko leva ʻa e akó, fakamamafaʻi ʻa e ngaahi ʻulungaanga fakamānako ʻo Sihová. Tokoniʻi hoʻo kau akó ke nau mahinoʻi ko hotau ʻOtua ʻofá ʻokú ne finangalo ke nau maʻu ʻa e moʻui taʻengatá, pea ʻokú ne mateuteu ke tokoniʻi kinautolu ke aʻusia ʻa e taumuʻa ko iá. Ko e hā ha toe meʻa ʻe lava ke tau fai?

9-10. Ko e hā ʻa e ongo tohi ʻoku totonu ke tau ngāueʻaki ʻi hono fakahoko ʻa e ngaahi ako Tohi Tapú, pea ko e hā hono ʻuhingá?

⁹ Ngāueʻaki ʻa e tohi “Ko e Hā ʻOku Lava ke Akoʻi Mai ʻe he Tohi Tapú?” mo e “Founga ke Nofo Maʻu Ai ʻi he ʻOfa ʻa e ʻOtuá.” Ko e ongo tohi ko iá naʻe faʻu tefito ia ke tokoniʻi kitautolu ke aʻu ki he loto ʻetau kau akó. Ko e fakatātaá, ko e vahe 1 ʻo e tohi Akoʻi Mai ʻoku tali ai ʻa e ngaahi fehuʻi ko ení: ʻOku tokanga mai ʻa e ʻOtuá kiate kitautolu pe ʻokú ne anga-fakamamahi?, ʻOku anga-fēfē ʻa e ongoʻi ʻa e ʻOtuá ʻi he taimi ʻoku faingataʻaʻia ai ʻa e kakaí? mo e ʻE lava ke ke hoko ko ha kaumeʻa ʻo Sihova? Fēfē ʻa e tohi Nofo Maʻu ʻi he ʻOfa ʻa e ʻOtuá? Ko e tohi ko iá ʻe tokoni ki ha tokotaha ako ke ne mahinoʻi ʻa e founga ʻe hanga ai ʻe hono ngāueʻaki ʻa e ngaahi tefitoʻi moʻoni Fakatohitapú ʻo fakaleleiʻi ʻene moʻuí peá ne ʻunuʻunu ofi ange ai kia Sihova. Neongo kapau kuó ke ʻosi ako ʻi he ongo tohi ko ení mo e niʻihi kehé, teuteu lelei ki he ako taki taha, pea fakakaukau maʻu pē ki he ngaahi fiemaʻu tefito ʻa e tokotaha akó.

¹⁰ Kae kehe, tau pehē pē, ko ha tokotaha ako ʻokú ne mahuʻingaʻia ʻi ha kaveinga ʻoku lāulea ki ai ha tohi ʻoku ʻikai kau ʻi heʻetau Puha Meʻangāue Fakafaiakó. Mahalo ʻe lava ke ke fakalototoʻaʻi ia ke lau ʻa e tohi ko iá ʻi hono taimi pē ʻoʻona koeʻuhi kae lava ke hokohoko atu ʻa e akó ʻi he taha ʻetau ongo tohi ʻoku fokotuʻu mai ke fai ai ʻa e ako Tohi Tapú ʻa ia naʻa tau toki lāulea ki aí.

11. Ko fē taimi ʻoku totonu ke kamata mo fakaʻosiʻaki ai ʻa e akó ha lotú, pea ʻe anga-fēfē nai haʻo lāulea ki he kaveinga ko iá?

¹¹ Kamata ʻa e ako taki taha ʻaki ha lotu. ʻI hono fakalūkufuá, ʻoku lelei tahá ke kamata mo fakaʻosiʻaki ʻa e akó ha lotu ʻi he vave taha ʻe ala lavá, ko e anga-mahení ʻi he ngaahi uike siʻi pē mei hono kamata ha ako tuʻumaʻu. Kuo pau ke tau tokoniʻi ʻa e tokotaha akó ke ne ʻiloʻi ʻe lava ke tau toki mahinoʻi pē ʻa e Folofola ʻa e ʻOtuá ʻi he tokoni ʻa e laumālie ʻo e ʻOtuá. Ko e kau faiako Tohi Tapu ʻe niʻihi ʻoku nau lāulea ki he kaveinga ʻo e lotú ʻaki hono lau ʻa e Sēmisi 1:5, ʻa ia ʻoku pehē: “Kapau ʻoku ʻi ai ha taha ʻo kimoutolu ʻoku masiva ʻi he potó, tuku ke ne hanganaki kole ki he ʻOtuá.” ʻOku ʻeke leva ʻe he faiakó ki he tokotaha akó, “ʻE lava fēfē ke tau kole ʻa e poto ʻo e ʻOtuá?” ʻOku ngalingali ʻe loto-tatau ʻa e tokotaha akó ʻoku totonu ke tau lotu ki he ʻOtuá.

12. ʻE anga-fēfē haʻo ngāueʻaki ʻa e Saame 139:2-4 ke tokoniʻi ha tokotaha ako ke fakaleleiʻi ʻa e anga ʻo ʻene lotú

¹² Akoʻi hoʻo tokotaha akó ki he founga ke lotu aí. Fakapapauʻi kiate ia ʻoku loto ʻa Sihova ke fanongo ki heʻene ngaahi lotu loto-moʻoní. Fakamatalaʻi ʻi heʻetau ngaahi lotu fakafoʻituituí, ʻe lava ke tau fakaava moʻoni hotau lotó kia Sihova—fakahaaʻi kiate ia ʻa e ngaahi ongoʻi ʻoku tau toumoua nai ke vahevahe ki ha tangata. He ko ē, ʻoku ʻosi ʻiloʻi ʻe Sihova ʻetau ngaahi ongoʻi lolotó. (Lau ʻa e Saame 139:2-4.) ʻE lava foki ke tau fakalototoʻaʻi ʻetau tokotaha akó ke kole ki he tokoni ʻa e ʻOtuá ke liliu ʻa e fakakaukau halá pea ikuʻi ʻa e ngaahi tōʻonga koví. Ko e fakatātaá, tau pehē pē, ko ha tokotaha kuó ne ako ʻi ha vahaʻa taimi ʻokú ne saiʻia ʻi ha ʻaho mālōlō fakapangani. ʻOkú ne ʻilo ʻoku hala ia, ka ko hono moʻoní ʻokú ne saiʻia ʻi ha tafaʻaki pau ʻo ia. Fakalototoʻaʻi ia ke ne fakamatalaʻi papau kia Sihova ʻa e anga ʻene ongoʻí pea kōlenga ki ha tokoni ke ʻofa pē ʻi he meʻa ʻoku ʻofa ai ʻa e ʻOtuá.—Saame 97:10.

13. (a) Ko e hā ʻoku totonu ai ke tau fakaafeʻi ʻetau kau akó ke maʻu ʻa e ngaahi fakatahá ʻi he vave taha ʻe ala lavá? (e) ʻE lava fēfē ke tau ʻai ha tokotaha ako ke ongoʻi fiemālie ange ʻi he Fale Fakatahaʻangá?

¹³ Fakaafeʻi hoʻo ako Tohi Tapú ke maʻu ʻa e ngaahi fakatahá ʻi he vave taha ʻe ala lavá. Ko e meʻa ʻoku fanongo mo sio ki ai hoʻo tokotaha akó ʻi he fakataha faka-Kalisitiané ʻe lava ke aʻu ia ki hono lotó pea tokoniʻi ia ke fakalakalaka. Huluʻi ange ʻa e vitiō Ko e Hā ʻOku Fai ʻi ha Fale Fakatahaʻanga? pea fakaafeʻi loto-māfana ia ke mo ʻalu. Tala ange te ke ʻave ia ʻo ka malava. Ko ha fakakaukau lelei ke fakaafeʻi ha kau malanga kehekehe ke ʻalu mo koe ki he akó. ʻI he founga ko iá, ko hoʻo tokotaha akó ʻe maheni mo e niʻihi kehe ʻi he fakatahaʻangá, pea ʻoku ngalingali te ne ongoʻi fiemālie ange ʻi heʻene maʻu ʻetau ngaahi fakatahá.

TOKONIʻI ʻA E TOKOTAHA AKÓ KE TUPU FAKALAUMĀLIE

14. Ko e hā ʻe lava ke ne ueʻi ha tokotaha ako ke tupu fakalaumālie?

¹⁴ Ko ʻetau taumuʻá ke tokoniʻi ʻetau ako Tohi Tapú ke tupu fakalaumālie. (ʻEf. 4:13) ʻI he loto ha tokotaha ke ako ʻa e Tohi Tapú, te ne mahuʻingaʻia tefito nai ʻi he founga te ne maʻu ʻaonga fakafoʻituitui ai mei aí. Kae kehe, ʻi he tupulaki ʻene ʻofa kia Sihová, ʻoku ngalingali te ne kamata ke fakakaukau fekauʻaki mo e founga ʻe lava ke ne tokoni ai ki he niʻihi kehé, kau ai ʻa e faʻahinga ʻoku nau ʻosi hoko ko e konga ʻo e fakatahaʻangá. (Māt. 22:37-39) ʻI he taimi feʻungamālié, ʻoua ʻe tautoloi ke lave ki he monū ʻo hono poupouʻi fakapaʻanga ʻa e ngāue ʻo e Puleʻangá.

15. ʻE lava fēfē ke tau tokoniʻi ha ako Tohi Tapu ke fakafeangai lelei ʻi he malanga hake ha palopalema?

¹⁵ Akoʻi hoʻo ako Tohi Tapú ki he meʻa ke fai ʻi he malanga hake ha palopalema. Ko e fakatātaá, tau pehē pē, ko hoʻo tokotaha akó, ko ha tokotaha malanga teʻeki papitaiso, ʻokú ne tala atu kuo fakaʻitaʻi ia ʻe ha taha ʻi he fakatahaʻangá. ʻI he ʻikai kau ki ha faʻahí, fēfē ke ke fakamatalaʻi ange ʻa e vakai ʻa e Tohi Tapú ke ne fili mei ai. ʻE lava ke ne fakamolemoleʻi ʻa e tokouá pe kapau heʻikai lava ke ne fakangaloʻi ia, fakaofiofi ki he tokotahá ʻi he anga-lelei mo e anga-ʻofa mo e taumuʻa ke “maʻu mai [hono] tokouá.” (Fakafehoanaki mo e Mātiu 18:15.) Tokoni ki hoʻo tokotaha akó ke teuteu ʻa e meʻa te ne leaʻakí. Fakahaaʻi ange ʻa e founga ke ngāueʻaki ai ʻa e JW Library^®, Tataki Fakaefekumi Maʻá e Kau Fakamoʻoni ʻa Sihová, mo e jw.org^® ke ako ʻa e ngaahi founga ʻaonga ke fekuki ai mo e tuʻungá. Ko e lahi ange ʻa e ako ʻokú ne maʻu ki muʻa ke ne papitaisó, ko ʻene fetaulaki lelei ange ia mo e niʻihi kehe ʻi he fakatahaʻangá ʻamui ange.

16. Ko e hā hono lelei ʻa hono fakaafeʻi ha tokotaha malanga kehe ke mo ō ki he akó?

¹⁶ Fakaafeʻi ʻa e niʻihi kehe mei he fakatahaʻangá—mo e ʻovasia sēketí ʻi heʻene ʻaʻahi ki he fakatahaʻangá—ke mo ō ki he akó. Ko e hā hono ʻuhingá? Tānaki atu ki he ngaahi ʻuhinga naʻe lave ki ai ki muʻá, ko e kau malanga kehé ʻe malava nai ke nau tokoniʻi hoʻo tokotaha akó ʻi he ngaahi founga ʻoku ʻikai te ke malava. Ko e fakatātaá, mahalo kuo feinga ʻa e tokotaha akó ke taʻofi ʻene ifi tapaká ka kuó ne toutou tō. Fakaafeʻi ha tokotaha Fakamoʻoni naʻá ne ikuʻi ʻa e tōʻonga ko iá, mahalo naʻá ne toutou tō mo ia ki muʻa, ke kau fakataha mo koe ʻi he akó. Ko ho kaungā-Fakamoʻoní ʻe malava ke ne ʻoatu ʻa e faleʻi ʻaonga ʻa ia ʻoku fiemaʻu ʻe he tokotaha akó ke fanongo ki ai. Kapau ʻoku ʻikai ke ke ongoʻi fiemālie ʻi hono fakahoko ha ako ʻi he ʻi ai ha tokoua taukei, kole ange ke ne fakahoko ʻa e akó. ʻI ha tuʻunga, ngāueʻaongaʻaki ʻa e taukei ʻa e niʻihi kehé. Manatuʻi, ko ʻetau taumuʻá ke tokoniʻi ʻa e tokotaha akó ke tupu fakalaumālie.

ʻOKU TOTONU KE U TAʻOFI ʻA E AKÓ?

17-18. Ko e hā ʻoku totonu ke ke fakakaukau ki ai ʻi he fili pe ʻoku totonu ke ke taʻofi ha ako?

¹⁷ Kapau ʻoku ʻikai fai ʻe hoʻo ako Tohi Tapú ha fakalakalaka lelei, ʻe faai atu pē ʻo ke ʻeke hifo, ‘ʻOku totonu ke u taʻofi ʻa e akó?’ ʻI hono sivisiviʻi ʻa e tuʻungá, ʻoku totonu ke ke fakakaukau ki he malava ʻa e tokotahá. ʻOku fiemaʻu ʻa e taimi lahi ke fakalakalaka ai ʻa e kakai ʻe niʻihi mei he niʻihi. ʻEke hifo: ‘ʻOku fakalakalaka ʻeku tokotaha akó ʻi he vave feʻunga ʻo fakatatau ki hono tuʻungá?’ ‘ʻOku kamata ke ne “tauhi” pe ngāueʻaki ʻa e ngaahi meʻa ʻokú ne akó?’ (Māt. 28:20) ʻE tuai nai ʻa e fakalakalaka ha tokotaha ako, ka ʻoku totonu ke ne fai ha liliu māmālie ʻi heʻene moʻuí.

¹⁸ Kae fēfē kapau ko ha taha kuó ne ako ʻi ha vahaʻa taimi, ʻoku siʻisiʻi pe ʻikai hā mai ha fakaʻilonga ʻokú ne houngaʻia ʻi he akó? Fakakaukau ki he tuʻunga ko ení: Ko hoʻo tokotaha akó kuo kakato ʻene akó ʻi he tohi Akoʻi Mai pea mahalo kuo kamata ke ne ako mo e tohi Nofo Maʻu ʻi he ʻOfa ʻa e ʻOtuá, ka kuo teʻeki ke ne maʻu ha fakataha ʻe taha—ʻo aʻu ki he Fakamanatú! Pea ʻokú ne faʻa kaniseli ʻa e akó ʻi he ngaahi meʻa ʻikai mahuʻinga. ʻI ha tuʻunga pehē, ʻoku lelei ke ke fai ha talanoa hangatonu mo e tokotaha akó.b

19. Ko e hā te ke tala ange nai ki ha taha ʻoku hā ngali ʻoku ʻikai ke ne houngaʻia ʻi heʻene ako Tohi Tapú, pea ko e hā ʻe fiemaʻu ke ke fakakaukau ki aí?

¹⁹ Te ke kamata nai ʻaki hono ʻeke ange kiate ia, ‘ʻOkú ke fakakaukau ko e hā ʻe hoko ko e pole lahi taha kiate koe ʻi hoʻo hoko ko e taha ʻo e Kau Fakamoʻoni ʻa Sihová?’ ʻE tali nai ʻa e tokotaha akó, ‘ʻOku ou saiʻia hono ako ʻa e Tohi Tapú, ka heʻikai ʻaupito te u hoko ko e taha ʻo e Kau Fakamoʻoni ʻa Sihová!’ Kapau ko ʻene fakakaukaú ia ʻi he hili ʻene ako ʻi ha vahaʻa taimi, ʻoku ʻi ai ha ʻuhinga ke hokohoko atu ai ʻa e akó? ʻI he tafaʻaki ʻe tahá, ko e fuofua taimi nai eni ke fakahaaʻi atu ai ʻe hoʻo tokotaha akó ʻa e meʻa ʻokú ne taʻotaʻofi ia. Ko e fakatātaá, ʻokú ne ongoʻi nai heʻikai ʻaupito lava ke ne malanga mei he fale ki he fale. ʻI hono ʻiloʻi he taimí ni ʻa e anga ʻene ongoʻí, te ke ʻi ha tuʻunga lelei ange ai ke tokoniʻi ia.

20. ʻI hono mahinoʻi ʻa e Ngāue 13:48, ʻoku lava fēfē ke ne tokoniʻi kitautolu ke ʻiloʻi pe ʻe hokohoko atu ha ako pe ʻikai?

²⁰ Ko e meʻa fakamamahí, ko e kau ako ʻe niʻihi ʻoku nau hangē ko e kau ʻIsileli ʻi he taimi ʻo ʻIsikelí. Fakatokangaʻi ʻa e meʻa naʻe leaʻaki ʻe Sihova fekauʻaki mo kinautolu kia ʻIsikelí: “Vakai! ʻOkú ke hangē kiate kinautolu ha foʻi hiva ʻeva, ʻoku hivaʻi ʻaki ha leʻo lelei pea mālie hono taá ʻi ha meʻalea filo. Te nau fanongo ki hoʻo ngaahi leá, ka heʻikai ha taha te ne fai ki ai.” (ʻIsi. 33:32) ʻE faingataʻa nai ke tau tala ange ki ha taha te tau taʻofi ʻa e ako mo iá. Kae kehe, “ko e taimi ʻoku toé ʻoku tātāiʻi.” (1 Kol. 7:29) ʻI he ʻikai fakamoleki ʻa e taimi lahi ange ʻi hono fakahoko ha ako ʻikai fakalakalaká, ʻoku fiemaʻu ke tau kumi ha taha ʻokú ne fakahaaʻi ʻokú ne “hehema totonu ki he moʻui taʻengatá.”—Lau ʻa e Ngāue 13:48.

21. Ko e hā ʻetau konga tohi fakataʻu ki he 2020, pea ko e hā ʻoku feʻungamālie aí?

²¹ Lolotonga ʻa e 2020, ko ʻetau konga tohi fakataʻú te ne tokoniʻi kitautolu ke tokangataha ki hono fakaleleiʻi ʻa e tuʻunga ʻoku ʻi ai ʻetau ngāue ngaohi ākongá. ʻOku kau ai ʻa e niʻihi ʻo e ngaahi lea naʻe leaʻaki ʻe Sīsū lolotonga ʻa e fakataha mahuʻinga ko ia ʻi ha moʻunga ʻi Kālelí: Mou ō ʻo ngaohi ākonga, ʻo papitaiso kinautolu.—Māt. 28:19.