Ko e Hā ʻOku Tupulaki Pehē Ai ʻa e Tāufehiʻá?

Ko e Hā ʻa e Tāufehiʻa?

Ko e tāufehiʻá ko e mātuʻaki fehiʻa ia pe ko hono fakahāhā ʻa e fakafili mālohi ki ha tokotaha pe ki ha kulupu ʻo e kakai. Ko ha ongoʻi loto-kovi hokohoko ia.

ʻUHINGA ʻOKU KAMATA AI KE TĀUFEHIʻA ʻA E KAKAÍ

ʻOku lahi ʻa e ngaahi ʻuhinga ʻoku tāufehiʻa ai ʻa e kakaí. Ko e tāufehiʻá ʻoku faʻa fai ia ki he niʻihi kehé, ʻo ʻikai ko e ʻuhingá pē ko e meʻa ʻoku nau faí, ka koeʻuhí ko honau puipuituʻá. Ko e faʻahinga ʻoku fehiʻanekinaʻí ʻoku fai ʻa e vakai kiate kinautolu ʻoku nau kovi, fakatuʻutāmaki pe ʻikai malava ke nau liliu. ʻOku fai nai ʻa e vakai kiate kinautolu ʻoku nau māʻulalo ange pe ko e tupuʻanga kinautolu ʻo e ngaahi palopalemá. Ko e faʻahinga ʻoku nau tāufehiʻa ki he niʻihi kehé naʻa nau tofanga nai ʻi he anga-fakamālohi, fakamaau taʻetotonu pe ʻi ha faʻahinga meʻa naʻá ne fakatupunga ke faiaka ʻa e ngaahi ongoʻi fakafilí ʻi honau lotó.

FOUNGA ʻOKU MAFOLALAHIA AÍ

Ko ha tokotaha ʻe lava ke ne fehiʻa ʻi he niʻihi kehé naʻa mo e teʻeki ai ke ne fetaulaki mo kinautolú. Ko e fakatātaá, ʻe ohi nai ʻe ha taha ʻa e vakai filifilimānako ʻa e faʻahinga ʻokú ne tokaʻí mo ongoʻi ofi ki aí. Ko ia ai, ko e tāufehiʻá ʻoku malavangofua ke mafolalahia ʻo ne ʻai ai ʻa e taha kotoa ʻi ha kulupu ke nau maʻu ʻa e vakai tatau.

ʻI heʻetau mahinoʻi ko ia ʻa e mālohi faitākiekina ʻo e tāufehiʻá, ʻoku lava ai ke tau ʻiloʻi ʻa e ʻuhinga ʻokú ne maʻunimā ai ʻa e kakai tokolahi. Kae kehe, ke fakangata ʻa e tupulaki ʻa e tāufehiʻá ʻi hotau māmaní, kuo pau ke tau ʻiloʻi ʻa e ngaahi aka tefito ʻoku tupu mei ai ʻa e tāufehiʻá. ʻOku fakaeʻa mai ia ʻe he Tohi Tapú.

FAKAEʻA ʻE HE TOHI TAPÚ ʻA E NGAAHI AKA ʻO E TĀUFEHIʻÁ

KO E TĀUFEHIʻÁ NAʻE ʻIKAI TUPU IA MEI HA TANGATA. Naʻe kamata ia ʻi he taimi naʻe angatuʻu ai ki he ʻOtuá ha ʻāngelo ʻi hēvani, ʻa ia naʻe ui ki mui ai ko Sētane ko e Tēvoló. Ko e Tēvoló “ko ha tokotaha fakapō ia ʻi heʻene kamata” ke angatuʻú. Koeʻuhi “ko ha tokotaha loi ia pea ko e tamai ia ʻa e loí,” kuó ne hokohoko atu ai ke fakatupunga ʻa e tāufehiʻá mo e fakaaoaó. (Sione 8:44; 1 Sione 3:11, 12) ʻOku fakamatalaʻi ia ʻe he Tohi Tapú ko ha tokotaha fakatupu maumau, ʻiteʻita, mo fakaaoao.​—Siope 2:7; Fakahā 12:9, 12, 17.

KO E FAʻAHINGA TAʻEHAOHAOA ʻO E TANGATÁ ʻOKU NAU HEHEMA KE TĀUFEHIʻA. Ko e ʻuluaki tangatá, ʻa ʻĀtama, naʻá ne muimui ʻi he ʻalunga angahalaʻia ʻo Sētané. Ko hono olá, ko e faʻahinga kotoa ʻo e tangatá kuo nau maʻu tukufakaholo ʻa e angahalá mo e taʻehaohaoá. (Loma 5:12) Ko e ʻuluaki foha ʻo ʻĀtamá, ʻa Keini, naʻá ne tāmateʻi ʻi he tāufehiʻa ʻa hono tokoua ko ʻĒpelí. (1 Sione 3:12) Ko e moʻoni, ʻoku tokolahi ʻa e faʻahinga ʻo e tangatá ʻoku nau fakahāhā ʻa e ʻofá mo e manavaʻofá. Ka koeʻuhí ko e angahala tukufakaholó, ko e fuʻu tokolahi ʻoku nau hehema ke fakahāhā ʻa e siokita, meheka, mo e hīkisia​—ko e ngaahi ʻulungaanga ʻokú ne tafunaki ʻa e tāufehiʻá.​—2 Tīmote 3:1-5.

ʻOKU FAKALALAHI ʻA E TĀUFEHIʻÁ ʻI HE TAʻEFEMAHINOʻAKÍ. Ko e māmani ʻoku tau nofo aí ʻokú ne tafunaki ʻa e tāufehiʻá ʻaki hono pouaki ʻa e ngaahi ʻulungaanga mo e tōʻonga taʻefaimeesi mo fakatupu maumau. Ko e taʻefemahinoʻakí, tomuʻa fehiʻá, leakoví, houtamakí mo e maumauʻi noa pē ʻa e ngaahi meʻá ʻoku fakalalahi ange koeʻuhí “ko e māmaní kotoa ʻoku tokoto ia ʻi he mafai ʻo e tokotaha fulikivanú,” ʻa Sētane ko e Tēvoló.​—1 Sione 5:19.

Kae kehe, ʻoku ʻikai ngata pē hono fakaeʻa mai ʻe he Tohi Tapú ʻa e ngaahi aka ʻoku tupu mei ai ʻa e tāufehiʻá. ʻOkú ne toe ʻomai foki ʻa e fakaleleiʻangá.