Tokoniʻi Hoʻo Fānaú ke Fekuki mo e Ngaahi Ongoongo Fakamamahí

ʻOku ʻi ai maʻu pē ʻa e ngaahi ongoongo fakamamahi ʻi he TV, telefoní, tepiletí, mo e komipiutá ʻi he houa ʻe 24 ʻi he ʻaho kotoa pē.

Pea ʻoku sio ai ʻa e fānaú.

ʻOku lava fēfē ke ke tokangaʻi hoʻo fānaú ke ʻoua ʻe lōmekina kinautolu ʻe he ngaahi ongoongo fakamamahí?

• ʻOku anga-fēfē hono uesia ʻe he ngaahi ongoongó ʻa e fānaú?

• ʻOku lava fēfē ke ke tokoniʻi hoʻo fānaú ke fekuki mo e ongoongo fakatupu loto-moʻuá?

• Fēfē kapau naʻe sio tonu hoʻo kiʻi tamá ʻi ha meʻa fakamamahi?

ʻOku anga-fēfē hono uesia ʻe he ongoongó ʻa e fānaú?

• ʻOku loto-mamahi ʻa e fānau tokolahi ʻi he ngaahi fakatamaki ʻoku nau sio ai ʻi he ongoongó. ʻE ʻikai nai ke fakahaaʻi tauʻatāina ʻe he fānau ʻe niʻihi ʻa e anga ʻenau ongoʻí, ka ko ha ongoongo fakamamahi te ne uesia lahi nai kinautolu.a ʻE lava ke toe fakalalahi ange ʻenau hohaʻá kapau ʻoku ʻikai ke tokanga ange ʻenau ongo mātuʻá.

• ʻOku fakaʻuhingahalaʻi nai ʻe he fānau ʻe niʻihi ʻa e meʻa ʻoku nau sio ai ʻi he ongoongó. Ko e fakatātaá, ʻoku fakamulituku ʻe he niʻihi ko e meʻa ʻoku nau sio aí ʻe hoko ia ki honau fāmilí. Pea ko e fānau ʻoku nau toutou sio ʻi ha vitiō tatau pē ʻo ha meʻa fakamamahi naʻe hoko, te nau fakakaukau nai ʻoku toutou hoko ia.

• ʻOku ʻikai nai ke mahinoʻi ʻe he fānaú ʻa e founga ngāue ʻa e ongoongó. ʻE ʻikai nai ke nau ʻiloʻi ko e ngaahi kautaha ongoongó ko e pisinisi pea ʻoku maʻu ʻenau tupú mei he tokolahi ange ʻa e kakaí. Ko ia ai, ko ha līpooti ʻe fakamatalaʻi ia ke mālie ke kei maʻu pē ʻa e tokanga ʻa e kakaí.

ʻOku lava fēfē ke ke tokoniʻi hoʻo fānaú ke fekuki mo e ongoongo fakatupu loto-moʻuá?

• Fakangatangata ʻenau sio ʻi he ngaahi ongoongo fakamamahí. ʻOku ʻikai ʻuhinga eni ia ʻoku ʻikai totonu ke ʻilo ʻe hoʻo fānaú ʻa e meʻa ʻoku hoko ʻi he māmaní. Ka ʻoku ʻikai lelei ke nau toutou sio pe fanongo ʻi he ngaahi ongoongo fakamamahí.

  “Taimi ʻe niʻihi ʻokú ma talanoa fakaikiiki fekauʻaki mo ha ongoongo, ʻo ʻikai fakatokangaʻi ʻoku lōmekina ai ʻema fānaú.”​—Malia.

  Tefitoʻi moʻoni Fakatohitapu: “Ko e hohaʻa ʻi he loto ʻo ha tangata ʻokú ne lōmekina ia.”​—Palōveepi 12:25.

• Fanongo anga-kātaki, pea tali anga-ʻofa. Kapau ʻoku faingataʻa ki hoʻo kiʻi tamá ke talanoa fekauʻaki mo e meʻa ʻoku hokó, fokotuʻu ange ke ne tā ia ʻi ha fakatātā. Talanoa ki he ngaahi meʻa ʻoku tokanga ki ai hoʻo kiʻi tamá ʻo ngāueʻaki ʻa e ngaahi lea ʻe mahino ki aí, kae fakaʻehiʻehi mei he ngaahi fakaikiiki ʻoku ʻikai fiemaʻú.

  “ʻOku ongoʻi lelei ange homa ʻofefiné ʻi heʻema tangutu ‘o fanongo ki aí. Ko e meʻa ʻoku ʻikai tokoní ko hono tala ange kiate ia, ‘Ko e founga eni ʻo e ngaahi meʻá ʻi he taimi ní, pea ʻoku fiemaʻu ke tau anga ki ai.’”​—Sarahi.

  Tefitoʻi moʻoni Fakatohitapu: “Vave ki he fanongo, fakatuotuai ki he lea.”​—Sēmisi 1:19.

• Tokoniʻi hoʻo kiʻi tamá ke ʻai ʻa e ongoongó ke ʻi hono tuʻunga totonú. Ko e fakatātaá, ko ha ongoongo ʻo fekauʻaki mo ha puke fakamālohi ʻe hangē ia ko ha meʻa ʻoku faʻa hoko anga-maheni pē. Fakamatalaʻi ki hoʻo fānaú ʻa e ngaahi meʻa ʻokú ke fai ke maluʻi kinautolú. ʻE ʻomai nai ha meʻa fakamamahi ʻi he ongoongó ʻa ia ʻoku tātaitaha ʻene hokó ka ʻoku ʻikai ʻuhinga iá ʻoku hoko maʻu pē.

  “Tokoniʻi hoʻo fānaú ke nau fekuki mo ʻenau ngaahi ongoʻí. Ko e meʻa ʻoku tau faʻa fakakaukau ki aí, ʻokú ne tākiekina ʻetau ngaahi ongoʻí, ko ia kapau te tau tokoniʻi ʻetau fānaú ke nau tokangataha ki he ngaahi meʻa leleí ʻe tokoni ia ke nau ongoʻi lelei ange.”​—Lourdes.

  Tefitoʻi moʻoni Fakatohitapu: “Ko e loto ʻo e tokotaha potó ʻokú ne ʻoatu ʻa e vavanga fakaefakakaukau ki hono ngutú pea tānaki atu ʻa e fakalotoʻi ki heʻene leá.”​—Palōveepi 16:23.