Ko ha ʻAmanaki Moʻoni ki ha Kahaʻu Lelei Ange

ʻOkú ke fakatuʻamelie ki he kahaʻú? Ko e kakai tokolahi ʻoku nau feinga ke tauhi maʻu ha vakai pau neongo ʻa e ngaahi palopalema mafatukituki ʻoku tau fehangahangai mo ia ʻi he ʻaho ní. Ka ʻoku lava ke tau fakatuʻotuʻa moʻoni atu ʻe lelei ange ʻa e ngaahi tuʻungá? ʻIo! ʻOku ʻomai ʻe he Tohi Tapú kiate kitautolu ha ʻamanaki moʻoni ki ha kahaʻu lelei ange.

Ko e hā ʻa e ʻamanaki ʻoku tokonaki mai ʻe he Tohi Tapú?

ʻOku fakahaaʻi ʻe he Tohi Tapú ko e faʻahinga ʻo e tangatá te nau fehangahangai mo e ngaahi palopalema mafatukituki. Kae kehe, ʻokú ne talaʻofa ko e ngaahi palopalema ko ení heʻikai ke ne uesia ai pē kitautolu ʻo taʻengata. Fakakaukau angé ki he ngaahi fakatātā moʻoni ko ení.

Palopalemá: ‘Ikai ha ʻapi

Meʻa ʻoku leaʻaki ʻe he Tohi Tapú: “Te nau langa fale pea nofo ai.”—ʻAisea 65:21.

Meʻa ʻoku ʻuhinga ki ai ʻi he kahaʻú: Ko e kakaí te nau maʻu honau ngaahi ʻapi tonu.
Palopalemá: Taʻemaʻungāué mo e masivá

Meʻa ʻoku leaʻaki ʻe he Tohi Tapú: “Ko e ngāue ʻa honau nimá ʻe fiefia kakato ai ʻa e faʻahinga kuó u filí.”—ʻAisea 65:22.

Meʻa ʻoku ʻuhinga ki ai ʻi he kahaʻú: Ko e kotoa ʻo e faʻahinga ʻo e tangatá te nau maʻu ha ngāue fakafiemālie, fakafiefia mo fakakoloa.
Palopalemá: Fakamaau taʻetotonu

Meʻa ʻoku leaʻaki ʻe he Tohi Tapú: “Ko hono kau houʻeikí te nau pule ʻo fakatatau ki he fakamaau totonú.”—ʻAisea 32:1.

Meʻa ʻoku ʻuhinga ki ai ʻi he kahaʻú: Ko e fakamaau taʻetotonu ʻoku fakatupunga ʻe he tomuʻa fehiʻa fakamatakalí, tuʻunga fakasōsialé mo e fakaʻekonōmiká ʻe toʻo ʻosi atu ia. ʻE hokosia ʻe he tokotaha kotoa ʻa e fakamaau totonú.
Palopalemá: Fasimanava mo e Fiekaiá

Meʻa ʻoku leaʻaki ʻe he Tohi Tapú: “ʻE lahi fau ʻa e uité ʻi he māmaní; ʻe mahutafea ʻa e tumutumu ʻo e ngaahi moʻungá.”—Saame 72:16.

Meʻa ʻoku ʻuhinga ki ai ʻi he kahaʻú: Ko e tokotaha kotoa te ne maʻu ʻa e meʻakai fakatupu moʻui lelei hulu fau. Heʻikai ke toe mohe fiekaia ha taha pe moʻua ʻi he fasimanavá.
Palopalemá: Faihiá mo e Fakamālohí

Meʻa ʻoku leaʻaki ʻe he Tohi Tapú: “Te nau tangutu taki taha ʻi hono lalo kālepi pea ʻi hono lalo fiki, pea ʻe ʻikai ha taha te ne ʻai kinautolu ke nau ilifia.”—Maika 4:4.

Meʻa ʻoku ʻuhinga ki ai ʻi he kahaʻú: Ko e tokotaha kotoa te ne ongoʻi malu koeʻuhí ko e kakai fulikivanú ʻe toʻo ʻosi atu pea ko e “kau māʻoniʻoní te nau maʻu ʻa e māmaní.”—Saame 37:10, 29.
Palopalemá: Tau

Meʻa ʻoku leaʻaki ʻe he Tohi Tapú: “ʻE ʻikai hiki ʻe ha puleʻanga ha heletā ki ha puleʻanga, pea ʻe ʻikai te nau toe ako tau.”—ʻAisea 2:4.

Meʻa ʻoku ʻuhinga ki ai ʻi he kahaʻú: ʻE ʻi ai ʻa e melino ʻi he māmaní kotoa. (Saame 72:7) ʻE ʻikai toe ʻi ai ha taha ʻe tengihia ʻi he mate ha tokotaha ʻofeina ʻi hano tāmateʻi ʻi he taú pe kumi hūfanga koeʻuhi ko e taú.
Palopalemá: Puke mo e mahaki

Meʻa ʻoku leaʻaki ʻe he Tohi Tapú: “ʻE ʻikai ha taha ʻoku nofo ai te ne pehē: ‘ʻOku ou puke.’”—ʻAisea 33:24.

Meʻa ʻoku ʻuhinga ki ai ʻi he kahaʻú: Ko e kakaí ʻe ʻikai ke nau toe faingataʻaʻia fakaesino mo puke. (ʻAisea 35:5, 6) ʻOku aʻu ʻo talaʻofa ʻe he Tohi Tapú “ʻe ʻikai ke toe ʻi ai ha mate.”—Fakahā 21:4.
Palopalemá: Uesia ʻa e ʻātakaí

Meʻa ʻoku leaʻaki ʻe he Tohi Tapú: “ʻE fiefia ʻa e toafá mo e fonua pakukaá, pea ʻe mavava ʻa e toafa tokaleleí pea matala ʻo hangē ko e lilé.”—ʻAisea 35:1.

Meʻa ʻoku ʻuhinga ki ai ʻi he kahaʻú: Ko e māmaní ʻe hoko ia ko ha palataisi maʻá e faʻahinga ʻo e tangatá ke nau nofo ai ʻo hangē ko e muʻaki taumuʻa ʻa e ʻOtuá.—Sēnesi 2:15; ʻAisea 45:18.

ʻOku faingataʻa ke tui ko e meʻa ʻoku talaʻofa ʻe he Tohi Tapú ʻe hoko moʻoni?

ʻOku mahino pē ia kapau ko e anga ia hoʻo ongoʻí. Kae kehe, ʻoku mau fakalototoʻaʻi koe ke ke sivisiviʻi lahi ange ʻa e meʻa ʻoku leaʻaki ʻe he Tohi Tapú ʻo fekauʻaki mo e kahaʻú. Ko e hā hono ʻuhingá? Ko e ngaahi talaʻofa ʻi he Tohi Tapú ʻoku kehe ia mei he ngaahi talaʻofa mo e ngaahi fakamahalo ʻoku fai ʻe he tangatá. Ko e ngaahi talaʻofa ʻi he Tohi Tapú ko e ʻomai ia mei he ʻOtuá. Ko e ʻuhinga eni ʻoku mahuʻinga aí:

ʻOku falalaʻanga ʻa e ʻOtuá. ʻOku pehē ʻe he Tohi Tapú ko e ʻOtuá ʻoku “ʻikai lava ke loí.” (Taitusi 1:2) Tānaki atu ki aí, ko e ʻOtuá pē taha ʻokú ne maʻu ʻa e malava ke tomuʻa tala ʻa e kahaʻú. (ʻAisea 46:10) ʻOku ʻi he Tohi Tapú ʻa e ngaahi fakatātā lahi ʻoku fakamoʻoniʻi ai ko e meʻa ʻoku kikiteʻi ʻe he ʻOtuá ʻoku hoko ʻo moʻoni maʻu pē ia. Ki ha fakamatala lahi ange, sio ʻi he vitiō ʻE Lava Fēfē Ke Tau Fakapapauʻi ʻOku Moʻoni ʻa e Tohi Tapú?
ʻOku maʻu ʻe he ʻOtuá ʻa e mālohi ke ne fakaleleiʻi ʻa e ngaahi palopalemá. ʻOku pehē ʻe he Tohi Tapú ʻoku maʻu ʻe he ʻOtuá ʻa e mālohi ke ne fai “ʻa e meʻa kotoa pē ʻokú ne leleiʻia ke faí.” (Saame 135:5, 6) ʻI hono toe fakalea ʻe tahá, heʻikai lava ʻe ha meʻa ʻo taʻofi ʻa e ʻOtuá mei hono fakahoko ʻene ngaahi talaʻofá. Pehē foki, ʻoku loto ʻa e ʻOtuá ke ne tokoniʻi kitautolu koeʻuhí he ʻokú ne ʻofa ʻiate kitautolu.—Sione 3:16.

ʻOku anga-maheni pē ia ke ke fifili, ‘Kapau ʻoku loto ʻa e ʻOtuá ke ne tokoniʻi kitautolu pea maʻu ʻa e mālohi ke fai pehē, ko e hā ʻoku tau kei hokosia ai ʻa e ngaahi palopalemá?’ Ke tali ʻa e fehuʻi ko iá, sio ʻi he vitiō Ko e Hā ʻOku Fakaʻatā Ai ʻe he ʻOtuá ʻa e Faingataʻá?

ʻE anga-fēfē hono fakahoko moʻoni ʻa e ʻamanaki ko ení?

ʻE ngāueʻaki ʻe he ʻOtuá hono Puleʻangá ʻa ia ko ha founga-pule ia ʻi hēvani ke fakahoko ʻene ngaahi talaʻofá. Kuó ne fakanofo ʻa Sīsū Kalaisi ko e Pule ia ʻo e Puleʻanga ko iá pea ʻoange kiate ia ʻa e mafai ke ne tokangaʻi ʻa e māmaní mo e kakai ʻi aí. ʻI he taimi naʻe ʻi māmani ai ʻa Sīsuú naʻá ne fakamoʻui ʻa e mahamahakí, fafanga ʻa e fiekaiá, puleʻi ʻa e matangí pea naʻa mo ʻene fokotuʻu hake ʻa e kau maté. (Maʻake 4:39; 6:41-44; Luke 4:40; Sione 11:43, 44) Naʻá ne fakahaaʻi ai heni ʻa e meʻa te ne fai ʻi he tuʻunga ko e Tuʻi ʻo e Puleʻanga ʻo e ʻOtuá.

Sio ʻi he vitiō Ko e Hā ʻa e Puleʻanga ʻo e ʻOtuá? ke ako lahi ange ki he founga te ke maʻu ʻaonga ai mei he Puleʻanga ʻo e ʻOtuá.

ʻE fakahoko fakakū ʻa e ʻamanaki ko ení?

Vavé ni mai! ʻE lava fēfē ke tau fakapapauʻi iá? Naʻe tomuʻa tala ʻe he Tohi Tapú ʻa e ngaahi meʻa te ne fakaʻilongaʻi ʻa e taimi ʻe kamata pule mai ai ʻa e Puleʻanga ʻo e ʻOtuá ki he māmaní kotoa. (Luke 21:10, 11) Ko e ngaahi meʻa ʻoku lolotonga hoko ʻi he māmaní ʻoku fehoanaki ia mo e meʻa naʻe tomuʻa tala ʻe he Tohi Tapú.

Ke ako lahi ange, lau ʻa e kupu “ʻE Pule Fakakū ʻa e Puleʻanga ʻo e ʻOtuá ki he Māmaní?”

ʻE lava fēfē ke tokoniʻi kitautolu ʻe he ʻamanaki ʻoku ʻomai ʻe he Tohi Tapú ʻi he ʻahó ni?

ʻOku fakahoa ʻe ha tokotaha-tohi Tohi Tapu ʻe taha ʻa e ʻamanaki ʻoku ʻomai ʻe he Tohi Tapú ʻoku hangē ia “ko ha taula ia ki heʻetau moʻuí.” (Hepelū 6:19) Hangē pē ko hono ʻai ʻe ha taula ha vaka ke tuʻu maʻu lolotonga ha matangí, ko e ʻamanaki moʻoni ʻi he Tohi Tapú ki he kahaʻú ʻe lava ke ne tokoniʻi kitautolu ke tau matuʻuaki ha palopalema pē te tau fehangahangai mo ia ʻi he ʻahó ni. Ko ʻetau ʻamanakí ʻe lava ke ne tokoniʻi kitautolu ke tau nofoʻaki nonga mo fiefia, ke fakakaukau lelei pea hoko ʻo moʻui lelei.—1 Tesalonaika 5:8.