Ngaahi ʻUhinga ke ʻAmanaki Lelei Ai ki he 2023—Ko e Hā ʻa e Lau ʻa e Tohi Tapú?

ʻI he kamata ko ia ʻa e taʻu 2023, ʻoku tau ʻamanaki ke maʻu ʻa e lelei tahá maʻa kitautolu kotoa pea mo hotau ngaahi fāmilí. Ko e hā ʻe lava ke tau ʻamanaki lelei ki aí?

ʻOku ʻomai ʻe he Tohi Tapú ʻa e ʻamanaki

Ko e Tohi Tapú ʻokú ne ʻomai ʻa e ongoongo lelei ko e ngaahi palopalema ʻoku tau fehangahangai mo ia he taimi ní ʻoku fakataimi pē pea ʻoku vavé ni ke fakaleleiʻi. Ko hono moʻoní, ko e Tohi Tapú naʻe “tohi ko hotau fakahinohino, koeʻuhí ke tau lava fakafou . . . ʻi he fakafiemālie mei he Folofolá ke tau maʻu ai ha ʻamanaki.”​—Loma 15:4.

• Ke ako lahi ange fekauʻaki mo e ngaahi meʻa ʻoku talaʻofa mai ʻi he Tohi Tapú, lau ʻa e kupu “Ko ha ʻAmanaki Moʻoni ki ha Kahaʻu Lelei Ange.”

Ko ha ʻamanaki ʻe lava ke ne tokoniʻi koe he taimí ni

Ko e ʻamanaki mei he Tohi Tapú ʻe lava ke hangē “ko ha taula ia ki heʻetau moʻuí.” (Hepelū 6:19) Ko e ʻamanaki ko iá ʻe lava ke ne ʻai kitautolu ke tau tuʻu maʻu. ʻE lava ke ne tokoniʻi kitautolu ke fekuki mo ʻetau ngaahi palopalema ʻi he lolotonga ní, ke maʻu ha vakai pau, pea ke maʻu ʻa e fiefia tuʻuloa. Ko e fakatātaá:

• Vakai ki he founga naʻe tokoniʻi ai ʻe he ʻamanaki mei he Tohi Tapú ha tangata naʻá ne fāinga mo hono maʻunimā ia ʻe ha tōʻonga kovi. Sio ʻi he vitiō Kuó U Foʻi Heʻeku Founga Moʻuí.

• Vakai ki he founga ʻe lava ke tokoniʻi ai kitautolu ʻe he ʻamanaki mei he Tohi Tapú ʻi he taimi ʻoku mole ai hatau ʻofaʻanga ʻi he maté. Sio ʻi he vitiō Fakafiemālie ki he Faʻahinga ʻOku Mamahí.

Fakaivimālohiʻi hoʻo ʻamanakí

Ko e kakai tokolahi ʻoku nau ʻamanaki ʻe hoko ha ngaahi meʻa lelei, ka ʻoku ʻikai lava ke nau fakapapauʻi pe ʻe faifai ange pea fakahoko ʻa e ngaahi meʻa ʻoku nau ʻamanaki ki aí. Ko e meʻa ʻoku talaʻofa mai ʻe he Tohi Tapú ʻoku kehe ia. Ko e hā hono ʻuhingá? Koeʻuhí ko e ngaahi talaʻofa ʻa e Tohi Tapú ʻoku haʻu ia meia Sihova ko e ʻOtuáa tonu, “ʻa ia ʻoku ʻikai lava ke loí.” (Taitusi 1:2) Ko Sihova pē ʻokú ne maʻu ʻa e mālohi ke fakahoko ʻa e kotoa ʻene ngaahi talaʻofá; ʻe lava ke ne fai “ʻa e meʻa kotoa pē ʻokú ne leleiʻia ke faí.”​—Saame 135:5, 6.

ʻOku mau fakaafeʻi loto-māfana atu koe ke maʻu ʻaonga mei he ʻamanaki alafalalaʻanga ʻa e Tohi Tapú. ʻE lava ke ke langa hake ʻa hoʻo falala ki aí ʻaki hono “vakaiʻi fakalelei . . . ʻa e Folofolá.” (Ngāue 17:11) Vakaiʻi tonu ia ʻaki hono ʻahiʻahiʻi ʻemau ako Tohi Tapu taʻetotongi mo ha faiakó. Kamata ʻa e 2023 ʻaki ha vakai fakatuʻamelie!