HANGANAKI LEʻO!

Ngaahi Fana Fakamālohi Takatakai he Māmaní—Ko e Hā ʻa e Lau ʻa e Tohi Tapú?

FAKAMUIMUI TAHÁ: ʻEpeleli 27, 2023

Ko e ngaahi fana fakamālohí ʻoku hokohoko atu ʻene uesia ʻa e tokolahi takatakai ʻi he māmaní. Fakakaukau angé ki ha ngaahi fakatātā pē ʻe niʻihi ki muí ni mai.

“Ko ʻAmelika ʻoku lēkooti lahi taha ai ʻa e ngaahi tāmate fakatokolahí ʻi he taʻu taki taha, ʻo fakafuofua ki he foʻi tāmate ʻe taha ʻi he uike taki taha.”—ʻEpeleli 21, 2023, The Guardian.
“Ko e mēmipa ʻe toko hongofulu ʻo ha fāmili pē ʻe taha, ko e toko fitu ai ko e kakai fefine pea ko e toko taha ko ha kiʻi tamasiʻi taʻu 13, naʻe tāmateʻi ʻi ha fana fakatokolahi ʻi ha ʻapi ʻi ʻAfilika Tonga.”—ʻEpeleli 21, 2023, AP News.
“Ko ha tangata ʻi Siamane naʻá ne fana ha kakai ʻe toko ono ʻo nau mate ki muʻa ke ne toʻo ʻene moʻuí ʻi ha holo faiʻanga lotu ʻo e Kau Fakamoʻoni ʻa Sihová ʻi Hamburg.”—Maʻasi 10, 2023, Reuters.

Ko e Tohi Tapú ʻokú ne ʻomai ʻa e fakafiemālie ki he faʻahinga ʻoku nau faingataʻaʻia koeʻuhi ko e ngaahi fakatamaki hangē ko ení. Ke vakai ki ha hokosia moʻoni, sio ʻi he vitiō DeJanerio Brown: Loto-Mamahi kae ʻIkai Foʻi.

ʻOku toe tokoniʻi foki kitautolu ʻe he Tohi Tapú ke tau mahinoʻi ʻa e ʻuhinga ʻoku hoko ai ʻa e ngaahi fakatamaki fakamamahi peheé. Ke kamata fekumi ki he kaveinga ko ení, sio ʻi he vitiō Ko e Hā ʻOku Fakaʻatā Ai ʻe he ʻOtuá ʻa e Faingataʻá?

ʻI Siulai 2022, naʻe hoko ʻa e ngaahi fana fakamālohi fakalilifu takatakai ʻi he māmaní:

“Ko hono fakapoongi ʻo e tokotaha politiki ʻiloa taha ʻi Siapaní [ʻa e palēmia mālōlō ko Shinzo Abe] naʻá ne luluʻi ʻa e fonuá pea naʻe ofongi ai ʻa e tapa kehekehe ʻo e māmaní, tautefito ki he siʻisiʻi ko ia ʻa e ngaahi faihia fakamālohí ʻi he fonuá pea mo e lao fakangatangata ki hono ngāueʻaki ʻo e meʻafaná.”—Siulai 10, 2022, The Japan Times.
“ʻOku moʻutāfuʻua ʻa Tenimaʻake ʻi hono fana ʻe ha tangata ʻo mate ʻa e toko tolu ʻi ha falekoloa lahi ʻi Copenhagen.”—Siulai 4, 2022, Reuters.
“ʻAfilika Tonga: Naʻe mate ʻa e toko 15 ʻi hono fana ʻe ha kau tangata ʻi ha pā ʻi Soweto.”—Siulai 10, 2022, The Guardian.
“Laka hake ʻi he toko 220 naʻe fanaʻi pea nau mate ʻi ʻAmelika ʻi he fakaʻosinga uike mālōlō ʻo Siulai 4.”—Siulai 5, 2022, CBS News.

ʻOku ʻi ai koā ha ʻamanaki ʻe ngata ʻa e fakamālohi peheé? Ko e hā ʻa e lau ʻa e Tohi Tapú?

Ngataʻanga ki he Fakamālohí

ʻOku fakamatalaʻi ʻe he Tohi Tapú hotau taimí ko e “ngaahi ʻaho fakaʻosí,” ko ha taimi ʻa ia ko e kakaí te nau tōʻonga anga-kakaha, anga-fakamanu mo anga-fakamamahi. (2 Tīmote 3:1, 3) Ko e ngaahi tōʻonga fakamālohi peheé ʻokú ne ʻai ʻa e kakaí ke nau nofo tailiili. (Luke 21:11) Kae kehe, ʻoku talaʻofa mai ʻe he Tohi Tapú ʻe ʻi ai ha taimi ʻe ngata ai ʻa e fakamālohí pea ko e “kakaí te nau nofo ʻi ha feituʻu melino, ʻi ha ngaahi nofoʻanga malu pea ʻi ha feituʻu mālōlōʻanga ʻoku nonga.” (ʻAisea 32:18) ʻE anga-fēfē hono fakangata ʻa e fakamālohí?

Ko e ʻOtuá te ne toʻo atu ʻa e fulikivanú pea fakaʻauha ʻa e kotoa ʻo e ngaahi meʻataú.

“Ko e meʻa ki he kau fulikivanú, ʻe tuʻusi atu kinautolu mei he māmaní.”—Palōveepi 2:22.
“ʻOkú ne [ʻOtuá] fakangata ʻa e ngaahi taú ʻi he māmaní kotoa. ʻOkú ne fesiʻi ʻa e kaufaná peá ne tutuʻu ʻa e taó; ʻokú ne tutu ʻa e ngaahi saliote taú ʻaki ʻa e afi.”—Saame 46:9.

ʻE toʻo ʻosi atu ʻe he ʻOtuá ʻa e ngaahi tupuʻanga tefito ʻo e ngaahi tōʻonga fakamālohí ʻaki hono akoʻi ʻa e kakaí ke nau nofo melino.

“ʻE ʻikai te nau fai ha faʻahinga maumau pe ko ha faʻahinga fakaʻauha ʻi he kotoa ʻo hoku moʻunga tapú, koeʻuhí ʻe fonu moʻoni ʻa e māmaní ʻi he ʻiloʻi ʻo Sihová ʻo hangē ko hono ʻufiʻufi ʻe he vaí ʻa e tahí.”—ʻAisea 11:9.
Naʻa mo e ʻi he taimí ni, ʻoku akoʻi ʻe he ʻOtuá ʻa e kakai takatakai ʻi he māmaní ke nau fakamamaʻo mei he fakamālohí mo e ngaahi meʻataú, ke “tuki ʻenau ngaahi heletaá ke hoko ko e ngaahi mataʻi-palau pea mo ʻenau ngaahi taó ke hoko ko e ngaahi hele ʻauhani.”—Maika 4:3.

Ke ako lahi ange fekauʻaki mo e talaʻofa ʻa e Tohi Tapú ki ha māmani ʻoku ʻatā mei he manavaheé, lau ʻa e kupu “Tauʻatāina mei he Manavaheé—ʻOku Malava Ia?”

Ke ako lahi ange fekauʻaki mo e fakaleleiʻanga tuʻuloa ki he fakamālohí, lau ʻa e kupu “Kuo Hoko ʻa e Māmaní ʻo Melino!”