2022: Ko ha Taʻu ʻo e Hohaʻatuʻu—Ko e Hā ʻa e Lau ʻa e Tohi Tapú?

Lolotonga ʻa e 2022, ko e ngaahi meʻa pē kuo tau fanongo ki ai ʻi he ngaahi ongoongó ko e tau, faingataʻa fakaʻekonōmika pea mo e ngaahi fakatamaki ki he ʻātakaí. Ko e Tohi Tapú pē ʻokú ne fakamatalaʻi ʻa e ʻuhinga moʻoni ʻoku hoko ai ʻa e ngaahi meʻa ko ení.

Ko e ʻuhinga moʻoni ʻo e hoko ʻa e ngaahi meʻa ʻi he 2022

Ko e ngaahi meʻa naʻe hoko ʻi he taʻu kuo ʻosí ʻokú ne toe fakamoʻoniʻi ʻoku tau moʻui ʻi he taimi ʻoku ui ʻe he Tohi Tapú ko e “ngaahi ʻaho fakaʻosí.” (2 Tīmote 3:1) Ko e vahaʻa taimi ko iá naʻe kamata ʻi he taʻu 1914. Fakatokangaʻi ʻa e fehoanaki ʻa e meʻa naʻe tomuʻa tala ʻi he Tohi Tapú ʻe hoko ʻi hotau taimí pea mo e ngaahi meʻa naʻe toki hoko ki mui ní:

“Ngaahi tau.”​—Mātiu 24:6.

• “Ko e 2022 [ko e] Taʻu Ia Naʻe Toe Foki Ai ki ʻIulope ʻa e Meʻa Fakamanavahē ko e Taú.”a

“Ngaahi nounou fakameʻatokoni.”​—Mātiu 24:7.

• “2022: Ko ha Taʻu ʻo e Honge Taʻehanotatau.”b

“Ngaahi mahaki fakaʻauha.”​—Luke 21:11.

• “Ko e toe ʻasi ko ia ʻa e polioó, lolotonga ia ʻa e tupulaki ʻa e monkeypox pea hokohoko atu hono uesia kitautolu ʻe he COVID-19, kuo ʻai ai ke toe hā māʻalaʻala ange ʻa e fakatuʻutāmaki ʻo e mahaki pipihí pea mo e mātuʻaki tuʻu laveangofua ʻa e faʻahinga ʻo e tangatá.”c

“Ngaahi meʻa fakamanavahē.”​—Luke 21:11.

• “Vela ʻa e ʻeá, laʻalaʻaá, vela vaó pea mo e ngaahi tāfeá. Ko e faʻahitaʻu māfana ʻo e 2022 ʻe manatua moʻoni ia ʻaki ʻa e ngaahi fakatamaki taʻefaʻalaua tupu mei he feliuliuaki ʻa e ʻeá ʻa ia kuó ne fakatupunga ʻa e maumau lahi, toʻo ʻa e moʻui ʻa e laui kilu, pea fakaʻauha ʻa e ʻapi ʻo e laui miliona ʻi māmani lahi.”d

“Ngaahi māveuveú.”​—Luke 21:9.

• “Ko e fakautuutu ko ia ʻa e ʻita ʻa e kakaí fekauʻaki mo e ngaahi palopalema fakaʻekonōmiká, tautefito ki he hiki lahi fakaʻulia ʻa e totongi ʻo e koloá, naʻá ne ʻai ke toe lahi fau ange ʻa e ngaahi laka fakahāhā ʻo fakafepaki ki he ngaahi puleʻangá ʻi he 2022.”e

Ko e hā ʻoku hanga mai ʻi he taʻu kahaʻú?

ʻOku ʻikai ha taha ʻe lava ke ne fakapapauʻi ʻa e meʻa ʻe hoko ʻi he 2023. Ko e meʻa pē ʻoku tau ʻiloʻí ʻoku vavé ni ki he Puleʻanga ʻo e ʻOtuá pe founga-pule fakahēvaní ke ne liliu fakaʻaufuli ʻa e ngaahi meʻa ʻi he māmaní. (Taniela 2:44) Ko e founga-pule ko iá te ne toʻo ʻosi atu ʻa e tupuʻanga ʻo e faingataʻaʻia ʻa e faʻahinga ʻo e tangatá pea fakapapauʻi ʻe fakahoko ʻa e finangalo ʻo e ʻOtuá ʻi he māmaní.​—Mātiu 6:9, 10.

ʻOku mau fakalototoʻaʻi koe ke muimui ʻi he faleʻi ʻa Sīsū Kalaisí pea “hanganaki leʻo” ʻi he fekauʻaki mo hono fakahoko ʻe he ngaahi meʻa ʻoku hoko ʻi he māmaní ʻa e kikite ʻi he Tohi Tapú. (Maʻake 13:37) Kātaki ʻo fetuʻutaki mai kiate kimautolu ke ako lahi ange fekauʻaki mo e founga ʻe lava ke tokoniʻi ai koe ʻe he Tohi Tapú ʻi he taimí ni, pea mo e founga ʻe lava ke ne ʻoatu ai kiate koe mo ho fāmilí ʻa e ʻamanaki moʻoni ki ha kahaʻu lelei ange.