Laʻalaʻā Lahi—Ko e Hā ʻa e Lau ʻa e Tohi Tapú?

• “ʻOku līpooti ʻi Siaina ko e taʻu vela ‘fakaʻulia taha’ eni ʻa e ʻeá pea ko e faʻahitaʻu māfana pakukā taha eni hono tolu kuo lēkōtí.”​—The Guardian, Sepitema 7, 2022.

• “ʻI ha taʻu hokohoko ʻe nima, ʻe ʻi ai ʻa e ngaahi tafaʻaki ʻo ʻAfilika te nau tofanga ʻi he laʻalaʻā lahi.”​—Ongoongo ʻa e UN, ʻAokosi 26, 2022.

• “ʻOku ʻi ai ha fakatokanga ki he vahe tolu ʻe ua ʻo ʻIulope te nau tofanga ʻi ha laʻalaʻā, ʻa ia ʻoku ngalingali ko e kovi taha ia ʻe hoko ʻi he taʻu ʻe 500 kuo maliu atú.”​—Ongoongo BBC, ʻAokosi 23, 2022.

Ko e kau mataotao tokolahi ʻoku nau tomuʻa tala ʻe hokohoko atu ʻa e ngaahi laʻalaʻā peheé pea ʻe aʻu ʻo toe kovi ange. ʻOku ʻi ai koā ha ʻamanaki ki ha kahaʻu lelei ange? Ko e hā ʻa e lau ʻa e Tohi Tapú?

Laʻalaʻaá mo e kikite ʻi he Tohi Tapú

Naʻe tomuʻa tala ʻe he Tohi Tapú fekauʻaki mo hotau ʻahó:

• “ʻI he feituʻu ki he feituʻu ʻe ʻi ai ʻa e ngaahi nounou fakameʻatokoni.”​—Luke 21:11.

Ko e laʻalaʻaá ʻoku faʻa iku atu ki he ngaahi nounou fakameʻatokoni. Ko e ngaahi nounou fakameʻatokoni peheé, pea mo e faingataʻaʻia mo e mate tupu mei aí, ʻoku fakahoko ai ʻa e kikite ʻi he Tohi Tapú.​—Fakahā 6:6, 8.

ʻUhinga ʻoku ʻalu ke toe kovi ange ai ʻa e laʻalaʻaá

ʻOku fakahaaʻi mai ʻe he Tohi Tapú ha ʻuhinga mahuʻinga ki he ʻalu ke toe kovi ange ʻa e laʻalaʻaá. ʻOku pehē ai:

• “ʻOku ʻikai ʻi he tangata ʻoku ʻaʻevá ke ne tataki ʻa ʻene laká.”​—Selemaia 10:23.

ʻOku ʻuhinga ení ko e faʻahinga ʻo e tangatá heʻikai lavameʻa ʻenau “tataki ʻa [ʻenau] laká,” pe pule pē kiate kinautolu. Ko ʻenau ngaahi faituʻutuʻuni halá ʻoku faʻa fakatupunga ai ʻa e laʻalaʻaá mo e honge vai.

• Ko e tokolahi taha ʻo e kau faisaienisí ʻoku nau loto-tatau ko e ngāue ʻa e tangatá kuó ne fakatupunga ʻa e māfana ʻa e ʻeá, ʻo iku atu ki he tupulaki ʻa e laʻalaʻaá takatakai he māmaní.

• Ko e mānumanú mo e ngaahi tuʻutuʻuni sio-nounoú ʻoku taki atu ki he tā ʻa e ʻuluʻakaú, ʻuliʻi ʻa e ʻātakaí pea mo hono ngāuehalaʻaki ʻa e ngaahi koloa fakaenatulá, ʻo ʻai ai ke ʻi he tuʻunga fakatuʻutāmaki ʻa e maʻuʻanga vaí.

Kae kehe, ʻoku ʻomai ʻe he Tohi Tapú ha ʻamanaki.

ʻOku ʻi ai koā ha ʻamanaki ki he kahaʻú?

ʻOku talaʻofa mai ʻe he Tohi Tapú ko e ʻOtuá te ne fakangata ʻa e honge vaí. Anga-fēfē?

1. 1. Ko e ʻOtuá te ne “fakaʻauha ʻa e faʻahinga ʻoku nau fakaʻauha ʻa e māmaní.” (Fakahā 11:18) Te ne toʻo atu ʻa e faʻahinga ʻoku nau fakatupunga ʻa e honge vaí​—ʻa e kakai fulikivanu mo mānumanu ʻa ia ʻoku nau uesia ʻa e ʻātakaí.​—2 Tīmote 3:1, 2.

2. 2. “ʻE hoko ʻa e kelekele kuo pakukā ʻi he velá ko ha vai kahoʻia.” (ʻAisea 35:1, 6, 7) ʻE fakaleleiʻi ʻe he ʻOtuá ʻa e maumau tupu mei he laʻalaʻaá pea liliu ʻa e palanite ko ení ko ha palataisi vaiʻia.

3. 3. “ʻOkú ke tokangaʻi ʻa e māmaní, ʻo ʻai ia ke fua lahi pea mahu ʻaupito.” (Saame 65:9) ʻI he tāpuaki ʻa e ʻOtuá, ko e māmaní ʻe lahi fau ai ʻa e meʻakai lelei pea mo e vai maʻa ki he tokotaha kotoa.