Hoko Atu ki he Taʻu Hono Uá ʻa e Tau ʻi ʻIukalainé​—Ko e Hā ʻa e ʻAmanaki ʻOku ʻOmai ʻe he Tohi Tapú?

Ko e Falaite ʻo Fepueli 24, 2023, ʻokú ne fakaʻilongaʻi ha ʻaho fakamamahi​—ko e taʻu ʻe taha talu mei he kamata ʻa e tau ʻi ʻIukalainé. Fakatatau ki he ngaahi līpooti ʻe niʻihi, ʻoku fakafuofua ki he kau sōtia ʻIukalaine mo e kau sōtia Lūsia ʻe toko 300,000 kuo tāmateʻi pe fakalaveaʻi pea fakafuofua ki he kakai siviliane ʻe toko 30,000 ʻoku ʻi ai ʻa e tui kuo nau mate ʻi he taú. Kae kehe, ko e fika fakakātoá ʻe malava ke toe lahi ange.

Ko e meʻa fakamamahí, ʻoku hā ngali ʻoku teʻeki ai ke ngata ʻa e tau ko ení.

• “ʻI he meimei taʻu ʻe taha talu mei he hū ʻa e kongakau ʻa Lūsiá ki ʻIukalainé, ʻoku ʻikai ha fakaʻilonga moʻoni ʻoku vavé ni ke ngata ʻa e taú. ʻOku ʻikai ke hā mahino mai ʻe ikunaʻi moʻoni ʻa e taú ʻe ha taha ʻo e ongo tafaʻakí, pea ʻoku hā ngali heʻikai ke fai ha felotoi.”​—NPR (National Public Radio), Fepueli 19, 2023.

Ko e kakai tokolahi ʻoku nau faingataʻaʻia moʻoni koeʻuhi ko e mamahi mo e faingataʻaʻia ʻoku fakatupunga ʻe he meʻá ni pea mo e ngaahi fepaki kehe pē ki he kakai tonuhia takatakai he māmaní. Ko e hā ʻa e ʻamanaki ʻoku ʻomai ʻe he Tohi Tapú? ʻE toe ʻi ai koā ha ngataʻanga ki he taú?

Ko ha tau ʻa ia te ne fakangata ʻa e kotoa ʻo e ngaahi taú

ʻOku lave ʻa e Tohi Tapú ki ha tau ʻa ia te ne fakahaofi ʻa e faʻahinga ʻo e tangatá kae ʻikai ko e fakaʻauha. Ko e tau ko iá ʻoku ʻiloa ko ʻĀmaketone, pea ʻoku fakamatalaʻi ia ko e “tau ʻo e ʻaho lahi ʻo e ʻOtua Māfimafi-Aoniú.” (Fakahā 16:14, 16) Fakafou ʻi he tau ko iá, ʻe hanga ʻe he ʻOtuá ʻo fakangata ʻa e tuʻunga-pule fakaetangatá, ʻa ia kuó ne fakatupunga ʻa e ngaahi tau fakaefakaʻauha. Ke ako ki he founga ʻe ʻomai ai ʻe ʻĀmaketone ʻa e melino tuʻuloá, lau ʻa e ongo kupu ko ení:

• “Ko e Hā ʻa e Tau ʻo ʻĀmaketone?”

• “Ko ʻĀmaketone ko ha Ongoongo Lelei!”