Kuo Fakamoleki ʻa e Laui Tiliona ʻi he Taú​—Ko e Hā ʻa e Mahuʻinga Totonú?

Ko e fakamole ki he taú ʻoku lahi ʻaupito.

•  “Kuo aʻu ki he $2.2 tiliona ʻa e fakamole ki he ngaahi meʻa fakakautau ʻi māmani lahí mei he ngaahi faitau kehekehe.”​—The Washington Post, Fepueli 13, 2024.

ʻOku kau ki he mole ko ení ʻa e meʻa lahi ange ia ʻi he paʻangá. Fakakaukau ki he fakatātā pē ʻe taha ko ení: Ko e tau ʻi ʻIukalainé.

•  Kau Sōtia. ʻI ha fakafuofua ʻe niʻihi, ʻoku ofi ki he kau sōtia ʻe toko 500,000 kuo tāmateʻi pe kafo talu mei he kamata ʻa e taú ʻi he taʻu ʻe ua kuohilí.

•  Kau Siviliane. Fakatatau ki he Ngaahi Puleʻanga Fakatahatahá, ʻoku laka hake ʻi he kakai ʻe toko 28,000 naʻe mate pe lavelavea. Kae kehe, naʻe pehē ʻe ha ʻōfisa māʻolunga ʻa e UN: “Ko e maumau ko eni kuo fakatupunga ʻe he taú ki he kakai ʻi he sōsaietí ʻoku taʻehanotatau.”a

ʻOku lahi fau ʻa e faingataʻaʻia ʻa e tangatá tupu mei he taú mo e fepakí takatakai ʻi he māmaní.

•  114 miliona. Ko e tokolahi ia ʻo e kakai ʻi māmani lahi kuo nau hiki mei honau ʻapí koeʻuhi ko e taú mo e fakamālohí, ʻo kamata mei Sepitema 2023.

•  783 miliona. Ko e tokolahi ia ʻo e kakai ʻoku nau tofanga ʻi he fasimanavá. “Ko e taú ʻa e tupuʻanga tefito ʻo e hōngeá, ko e pēseti ʻe 70 ʻo e kakai fiekaia taha ʻi he māmaní ʻoku nau nofo ʻi he ngaahi feituʻu ʻoku hoko ai ʻa e taú mo e fakamālohí.”​—World Food Programme.

ʻE toe ngata koā ʻa e taú? ʻOku ʻi ai ha ʻamanaki ki ha melino? ʻE ʻi ai koā ha taimi heʻikai ke toe ʻi ai ha taha ʻe masiva pea ʻe fiefia ʻa e tokotaha kotoa ʻi he ngaahi meʻa ʻoku fakatupu mai ʻe he fonuá? Ko e hā ʻoku leaʻaki ʻe he Tohi Tapú?

Ko ha taimi ʻo e tau

Naʻe tomuʻa tala ʻe he Tohi Tapú ʻe hoko ha faitau ʻi māmani lahi, ʻoku fakamatalaʻi fakaefakatātā ia ki ha tokotaha heka hoosi.

•  “Naʻe haʻu ha hoosi ʻe taha, ko ha hoosi lanu kulokula mālohi, pea naʻe tuku ki he tokotaha naʻe heka aí ke ne ʻave ʻa e melinó mei he māmaní koeʻuhi ke nau fetāmateʻaki, pea naʻe ʻoange kiate ia ha fuʻu heletā lahi.”​—Fakahā 6:4.

Naʻe muimui mai ʻi he tangata heka hoosi fakaefakatātā ko iá ha toko ua kehe ʻokú na fakafofongaʻi ʻa e hongé mo e mate ʻoku mafolalahia tupu mei ha mahaki pe ko ha tupuʻanga kehe. (Fakahā 6:5-8) Ke ako lahi ange fekauʻaki mo e kikite Fakatohitapu ko ení mo e ʻuhinga ʻoku tau fakapapauʻi ai ʻoku lolotonga fakahoko ia ʻi hotau ʻahó, lau ʻa e kupu “Kau Tangata Heka Hoosi ʻe Toko Faá​—Ko Hai Kinautolu?”

Ko ha kahaʻu ʻo e melino

ʻOku vavé ni, ke ʻikai toe ngāueʻaki ʻa e ngaahi koloa ʻi he māmaní ki he taú. Kae kehe, heʻikai hoko eni mei he ngaahi feinga ʻa e tangatá. ʻOku pehē ʻe he Tohi Tapú:

•  Ko e ʻOtuá te ne “fakangata ʻa e ngaahi taú ʻi he māmaní kotoa.”​—Saame 46:9.

•  ʻE fakaleleiʻi ʻ e he ʻOtuá ʻa e ngaahi maumau kuo fakatupunga ʻe he taú. “Te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”​—Fakahā 21:4.

•  ʻE fakapapauʻi ʻe he ʻOtuá ko e tokotaha kotoa ʻe nofo ʻi he melino. “Ko hoku kakaí te nau nofo ʻi ha feituʻu melino, ʻi ha ngaahi nofoʻanga malu pea ʻi ha feituʻu mālōlōʻanga ʻoku nonga.”​—ʻAisea 32:18.

Fakatatau ki he kikite Fakatohitapú, ko e ngaahi taú mo e ngaahi meʻa kehe ʻoku tau sio ai ʻi he ʻaho ní ʻoku fakahaaʻi mei ai ko e kahaʻu ʻo e melino ko ení ʻoku ofi ʻaupito.

ʻE anga-fēfē hono ʻomai ʻe he ʻOtuá ʻa e kahaʻu melino ko ení? Te ne fai ia fakafou ʻi heʻene founga-pule fakahēvaní pe Puleʻangá. (Mātiu 6:10) Ke ako pe ko e hā ʻa e Puleʻanga ko ení pea mo ʻene ʻuhinga kiate koé, sio ʻi he vitiō nounou Ko e Hā ʻa e Puleʻanga ʻo e ʻOtuá?