Ngaahi Tāfea Fakatupu Maumau Lahi​—Ko e Hā ʻa e Lau ʻa e Tohi Tapú?

ʻI māmani lahi, ʻoku fekuki ʻa e kakai tokolahi mo e ngaahi tāfea fakatupu maumau lahi. Fakatokangaʻi ʻa e ngaahi līpooti ko ʻení:

• “ʻI he ngaahi ʻaho siʻi ne toki maliu atú, naʻe lēkooti ʻi he kolomuʻa ʻo Siainá ʻa e ʻuha lahi taha kuo tō ki he fonuá ʻi he meimei taʻu eni ʻe 140 . . . ko e lahi ʻo e ʻuhá naʻe milimita ʻe 744.8 (ʻinisi ʻe 29.3) mei he ʻaho Tokonakí ki he Pulelulú.”​—AP News, ʻAokosi 2, 2023.

• “ʻI he Tuʻapulelulú, ko e ʻaho hono ua ia ʻo e tō ʻa e Afā ko Khanun, naʻe tō ai ʻa e ʻuha lōvai mo e matangi mālohi ki he fakatonga ʻo Siapaní, ʻo mate ai ʻa e toko ua. . . . Ko e afaá ʻoku ʻamanekina ke ne ʻomai ʻa e ʻuha ʻa ia ko e fakakātoa hono lahí ko e mita ʻe 0.6 (fute ʻe 2) ki he feituʻu moʻungaʻia ʻo Taiuaní.”​—Deutsche Welle, ʻAokosi 3, 2023.

• “Ko e tāfea ʻi he fakaʻosinga uiké [ʻi Nova Scotia] naʻe fakatupunga ia ʻe he ʻuha lahi taha ke tō ki he vahefonua ʻo Kānata ʻi he matāfanga ʻAtalanitikí ʻi he taʻu eni ʻe 50.”​—Ongoongo BBC, Siulai 24, 2023.

Ko e hā ʻoku leaʻaki ʻe he Tohi Tapú fekauʻaki mo e hoko ʻa e ngaahi meʻa peheé?

Ko ha fakaʻilonga ʻo e “ngaahi ʻaho fakaʻosí”

ʻOku fakahaaʻi ʻe he Tohi Tapú ʻoku tau lolotonga moʻui ʻi he vahaʻa taimi ʻoku ui ko e “ngaahi ʻaho fakaʻosí.” (2 Tīmote 3:1) Naʻe kikiteʻi ʻe Sīsū ko e lolotonga hotau taimí, te tau sio ki he “ngaahi meʻa fakamanavahē ʻe ʻasi,” pe ngaahi meʻa fakalilifu ʻe hoko. (Luke 21:11) Ko e feliuliuaki ʻa e ʻeá kuó ne fakatupunga ʻa e ngaahi fakatamaki fakalilifu ʻoku toe lahi ange ʻene hoko taʻeʻamanekiná, toutou hoko pea toe mālohi ange.

Ko ha ʻuhinga ki ha ʻamanaki

ʻOku tala mai ʻe he Tohi Tapú ko e ngaahi meʻa fakalilifu ʻoku hoko ʻi he māmaní ʻi he ʻaho ní ʻokú ne ʻomai moʻoni ha ʻuhinga ki ha ʻamanaki. Ko e hā hono ʻuhingá? Naʻe pehē ʻe Sīsū: “ʻI hoʻomou sio ʻoku hoko ʻa e ngaahi meʻá ni, mou ʻiloʻi leva ʻoku ofi ʻa e Puleʻanga ʻo e ʻOtuá.”​—Luke 21:31; Mātiu 24:3.

Ko e ngaahi meʻa ʻoku tau sio ki ai ʻoku hokó ʻoku fakamoʻoniʻi ai ʻe vavé ni ke hanga ʻe he Puleʻanga ʻo e ʻOtuá ʻo puleʻi kakato ʻa e ngaahi ʻelemēniti fakanatula ʻo e māmaní, ʻo kau ai ʻa e vilo takai ʻa e vaí.​—Siope 36:27, 28; Saame 107:29.

Ke ako lahi ange fekauʻaki mo e founga ʻe toe fakafoʻou ai ʻe he Puleʻanga ʻo e ʻOtuá ʻa e ʻātakai ʻo e māmaní, sio ki he kupu “Ko Hai Te Ne Fakahaofi ʻa e Māmaní?”