Ko e Hā ʻOku Mate Ai ʻa e Kakaí?

Tali ʻa e Tohi Tapú

ʻOku fakanatula pē ke fifili pe ko e hā ʻoku mate ai ʻa e kakaí, tautefito ʻi he taimi ʻoku mole ai ha tokotaha ʻoku tau vāofi mo ia. ʻOku pehē ʻe he Tohi Tapú: “Ko e huhu kona ʻokú ne ʻomai ʻa e maté ko e angahalá.”​—1 Kolinitō 15:56.

Ko e hā ʻoku faiangahala ai mo mate ʻa e kakai kotoa pē?

Ko e ʻuluaki ongo meʻa fakaetangatá, ʻa ʻĀtama mo ʻIvi, naʻe mole ʻa ʻena moʻuí koeʻuhí naʻá na faiangahala ki he ʻOtuá. (Sēnesi 3:17-19) Ko e maté ʻa e ikuʻanga pē taha naʻe malava ke hoko ʻi heʻena angatuʻu ki he ʻOtuá, he ko ia “ʻa e matavai ʻo e moʻuí.”​—Saame 36:9; Sēnesi 2:17.

Naʻe tuku atu ai ʻe ʻĀtama ʻa e mele ʻo e angahalá ki he kotoa ʻo ʻene fānaú. ʻOku pehē ʻe he Tohi Tapú: “Ko e fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.” (Loma 5:12) ʻOku mate ʻa e kakai kotoa pē koeʻuhí ʻoku nau faiangahala kotoa pē.​—Loma 3:23.

Founga ʻe fakangata ai ʻa e maté

ʻOku palōmesi ʻa e ʻOtuá ki ha taimi ʻa ia ‘te ne folofua ai ʻa mate ʻo taʻengata.’ (ʻAisea 25:8) Ke toʻo ʻa e maté, kuo pau ke ne fakangata ʻa hono tupuʻanga tefitó, ʻa ia ko e angahalá. ʻE fai eni ʻe he ʻOtuá fakafou ʻia Sīsū Kalaisi, ʻa ia “ʻokú ne ʻave ʻa e angahala ʻa māmaní.”​—Sione 1:29; 1 Sione 1:7.