Naʻe ʻi Ai Moʻoni ha Tokotaha ko Sione Papitaiso?
ʻOku lave ʻa e ngaahi fakamatala Kōsipelí ki ha tangata ko Sione Papitaiso, ʻa ia naʻá ne malanga fekauʻaki mo e Puleʻanga ʻo e ʻOtuá ʻi Siutea. ʻOku tonu mātē ʻa e lēkooti ʻi he Tohi Tapú fekauʻaki mo e tangata ko ení? Fakakaukau:
ʻOku pehē ʻe he Tohi Tapú: “Naʻe haʻu ʻa Sione Papitaiso ʻo malanga ʻi he toafa ʻo Siuteá, ʻo pehē: ‘Mou fakatomala, he kuo ofi ʻa e Puleʻanga ʻo hēvaní.’” (Mātiu 3:1, 2) ʻOku lava ke fakapapauʻi ʻa e fakamatala ko ení ʻe he ngaahi maʻuʻanga fakamatala fakamāmaní? ʻIo.
Ko e faihisitōlia ʻi he ʻuluaki senitulí ko Feleviasi Siosifasi naʻá ne fakamatala fekauʻaki mo ha tangata ko “Sione, ko hono fakaikú ko e Papitaiso,” ʻa ia “naʻá ne enginaki ki he kau Siú ke nau maʻu ʻa e founga moʻui māʻoniʻoni,” ke “anga-līʻoa ki he ʻOtuá,” pea “ke hoko ʻo papitaiso.”—Jewish Antiquities, Book XVIII.
ʻOku fakamatalaʻi ʻi he Tohi Tapú naʻe valokiʻi ʻe Sione ʻa Hēlota ʻAnitipasa, ʻa ia naʻá ne pule ʻi he vahefonua ʻo Kāleli mo Pēleá. Naʻe taukaveʻi ʻe Hēlota ko ha Siu ia ʻi he malumalu ʻo e Laó. Naʻe fakaangaʻi ʻe Sione ʻa Hēlota koeʻuhí ko ʻene mali mo e uaifi ʻo hono tokoua tamai-tahá, ʻa Helotiasi. (Maʻake 6:18) Ko e fakaikiiki ko ení ʻoku toe poupouʻi foki ia ʻi he ngaahi maʻuʻanga fakamatala fakamāmaní.
Naʻe pehē ʻe he faihisitōlia ko Siosifasí ko ʻAnitipasa naʻá ne “ʻofa ʻia Helotiasi” pea “naʻá ne kole taʻemīngao kiate ia ke na mali.” Naʻe tali ia ʻe Helotiasi peá ne liʻaki leva hono husepānití kae mali mo ʻAnitipasa.
ʻOku pehē ʻe he Tohi Tapú “ko e kakai ʻo Selusalemá mo Siutea kātoa pea mo e ngaahi feituʻu takatakai kotoa ʻi Sioataní naʻa nau ʻaukolo atu [kia Sione], pea naʻá ne papitaiso kinautolu ʻi he Vaitafe Sioataní.”—Mātiu 3:5, 6.
ʻOku toe poupouʻi foki ʻe Siosifasi ʻa e fakaikiiki ko ení, ʻaki ʻene tohi ʻo pehē naʻe fetaʻotaʻomi mai ha “fuʻu kakai” ke sio kia Sione pea naʻe “maongo [pe fakalototoʻa] moʻoni kiate kinautolu ʻene ngaahi malangá.”
ʻOku hā mahino, ko e faihisitōlia ʻi he ʻuluaki senituli ko Siosifasí naʻá ne vakai kia Sione Papitaiso ko ha tokotaha moʻoni. Ko ia ʻe pehē pē foki mo kitautolu.