Ko Hai ʻa Sione Papitaiso?
Tali ʻa e Tohi Tapú
Ko Sione Papitaisó ko ha palōfita ia ʻa e ʻOtuá. (Luke 1:76) Naʻe fanauʻi ia ʻi he 2 K.M. pea naʻá ne mate ʻi he 32 T.S. Naʻe fekauʻi ia ʻe he ʻOtuá ke ne teuteu ʻa e hala ki he Mīsaiá pe Kalaisí. Naʻe fai eni ʻe Sione ʻaki hono malangaʻi ʻa e pōpoaki ʻa e ʻOtuá ki hono kaungā Siú pea ke fakatafoki mai honau lotó ki he ʻOtuá.—Maʻake 1:1-4; Luke 1:13, 16, 17.
Naʻe tokoniʻi ʻe he pōpoaki ʻa Sioné ʻa e kau fiefanongo moʻoní ke nau ʻiloʻi ʻa Sīsū ko e Nasaletí ko e Mīsaia ia naʻe talaʻofá. (Mātiu 11:10) Naʻe enginaki ʻa Sione ki heʻene kau fanongó ke nau fakatomala mei heʻenau ngaahi angahalá pea papitaiso leva ko e fakaʻilonga ia ʻo ʻenau fakatomalá. (Luke 3:3-6) Koeʻuhí naʻá ne papitaiso ʻa e kakai tokolahi, naʻe ui ai ia ko Sione Papitaiso pe tokotaha Faipapitaisó. Ko e papitaiso mahuʻinga taha naʻe fakahoko ʻe Sioné ko hono papitaiso ʻo Sīsuú.a—Maʻake 1:9.
ʻI he kupu ko ení
Ko e hā naʻá ne ʻai ʻa Sione Papitaiso ke makehé?
Naʻe tomuʻa tala ʻa e ngāue te ne fakahokó: Fakafou ʻi he ngāue fakafaifekau ʻa Sioné, naʻe fakahoko ai ʻiate ia ʻa e kikite fekauʻaki mo e talafekau ʻa Sihová. (Malakai 3:1; Mātiu 3:1-3) Naʻá ne fakamoʻoniʻi ko ia ʻa e tokotaha te ne “teuʻi maʻa Sihova ha kakai kuo mateuteu”—ʻa ia ko ia naʻá ne tofa ʻa e hala ki hono kaungā Siú ke nau tali ʻa e pōpoaki ʻo e fakafofonga tefito ʻa Sihova ko e ʻOtuá, ʻa Sīsū Kalaisi.—Luke 1:17.
Lavameʻa ʻi heʻene moʻuí: Naʻe pehē ʻe Sīsū “kuo teʻeki ai hoko mai ha taha ʻoku lahi hake ʻia Sione Papitaiso, ka ko ha tokotaha ʻoku siʻi ange ʻi he Puleʻanga ʻo hēvaní ʻoku lahi ange ia ʻiate ia.” (Mātiu 11:11) Koeʻuhi ko Sioné naʻe ʻikai ko ha palōfita pē ka naʻe toe tomuʻa tala ko ha “talafekau” ia, naʻe ʻikai ha sevāniti ʻa e ʻOtuá ki muʻa ʻiate ia ʻe lau ʻoku lahi ange ʻiate ia. Naʻe fakahaaʻi foki ʻi he ngaahi lea ʻa Sīsuú ko Sioné ʻe ʻikai te ne kau ʻi he Puleʻanga fakahēvaní.b Ko e palōfita faitōnunga ko ení naʻá ne mate ki muʻa ke fakaava ʻe Kalaisi ʻa e hala ki he moʻui fakahēvaní. (Hepelū 10:19, 20) Ka ʻe hoko ʻa Sione ko ha taha ʻe moʻui ʻi he māmaní ʻa ia ʻe pule mai ki ai ʻa e Puleʻanga ʻo e ʻOtuá, fakataha mo e ʻamanaki ke moʻui taʻengata ʻi he Palataisí.—Saame 37:29; Luke 23:43.
Ko hai ʻa e ongo mātuʻa ʻa Sione Papitaisó?
Ko e ongo mātuʻa ʻa Sioné ko ha ongo meʻa mali ko Sākalaia mo ʻIlisapesi. Ko Sākalaiá ko ha taulaʻeiki Siu. Ko hono fanauʻi ʻo Sioné ko ha mana he koeʻuhí naʻe paʻa ʻene faʻeé, pe naʻe ʻikai malava ke ne maʻu fānau. Pehē foki, ko ia mo Sākalaia “naʻá na fakatou motuʻa.”—Luke 1:5-7, 13.
Ko hai naʻá ne fakatupunga ʻa e mate ʻa Sione Papitaisó?
Ko Tuʻi Hēlota ʻAnitipasa naʻá ne fekau ke tuʻusi ʻa e ʻulu ʻo Sioné. Naʻá ne fai eni ʻi hono fakaʻaiʻai ia ʻe hono uaifí ʻa Helotiasi. Naʻá ne fehiʻa ʻia Sione koeʻuhí naʻá ne tala ange kia Hēlota ʻa ia naʻe taku ko ha Siú, ko ʻene mali kia Helotiasí naʻe taʻefakalao ʻo fakatatau ki he lao faka-Siú.—Mātiu 14:1-12; Maʻake 6:16-19.
Naʻe feʻauʻauhi ʻa Sione Papitaiso mo Sīsū?
Ko e fakakaukau ko ia naʻá na feʻauhí ʻoku ʻikai ʻaupito poupouʻi ia ʻe he Tohi Tapú. (Sione 3:25-30) Ko e moʻoni, naʻe fakahaaʻi mahino ʻe Sione ko hono fatongiá ia ke teuteu ʻa e hala ki he Mīsaiá, kae ʻikai ke ne feʻauʻauhi mo ia. Naʻe pehē ʻe Sione: ‘Naʻá ku haʻu ʻo faipapitaiso ʻi he vaí koeʻuhi ke fakahaaʻi ia ki ʻIsileli.’ Naʻá ne hoko atu: “Ko e tokotahá ni ko e ʻAlo ia ʻo e ʻOtuá.” (Sione 1:26-34) Ko ia naʻe fiefia lahi ʻa Sione ʻi heʻene fanongo fekauʻaki mo e lavameʻa ʻa Sīsū ʻi he ngāue fakafaifekaú.
a Ko Sīsū “naʻe ʻikai te ne fai ha angahala.” (1 Pita 2:21, 22) Ko ia naʻá ne papitaiso ʻo ʻikai koeʻuhí naʻe fiemaʻu ke ne fakatomala, ka koeʻuhí naʻá ne tuku atu ia ke fai ʻa e finangalo ʻo e ʻOtuá. Naʻe kau ki ai ʻa hono foaki atu ʻe Sīsū ʻa ʻene moʻuí maʻa kitautolu.—Hepelū 10:7-10.
b Sio ki he kupu “Ko Hai ʻOku ʻAlu ki Hēvaní?”