Ngaahi Poloseki ʻOku Maʻu ʻAonga mei Ai Hotau Fanga Tokouá mo e Foʻi Palanité

ʻI he tuʻunga ko e Kau Fakamoʻoni ʻa Sihova, ʻoku tau ʻilo ʻe vavé ni ke hanga ʻe Sihova ko e ʻOtuá ʻo fakahaofi hotau palanité mei he maumau kuo fakatupunga ʻe he faʻahinga ʻo e tangatá. (Fakahā 11:18) Kae kehe, ʻoku tau toe fai ʻa e meʻa ʻoku tau malavá ke tokangaʻi ʻa e foʻi palanité. Ko e fakatātaá, kuo tau tisaini ʻetau ngaahi fale faiʻanga lotú ʻi ha founga ʻe siʻisiʻi haʻane uesia ʻa e ʻātakaí.

Ko e hā ʻa e ngaahi poloseki kuo tau fakahokó? Pea kuo anga-fēfē tokoni ʻa e ngaahi poloseki ko ení ke tau ngāueʻaki fakapotopoto ai ʻa e paʻanga tokoní?

Ko ha Fakaleleiʻanga ki Hono Tauhi ke Mokomoko ha Holo ʻAsemipilī

ʻI he kamatá, naʻe ʻuluaki langa ʻa e Holo ʻAsemipilī Matola ʻi Mosemipīkí ʻo ʻato kapa pea naʻe ʻikai ke holisi takai. Naʻe hanga ʻe he ʻato ko ení ʻo ʻai ʻa e holó ke ʻafu ʻaupito. ʻOku pehē ʻe ha tokoua fakalotofonua ʻe taha: “ʻE ʻai kimautolu ʻe he ʻafú ke mau fetafetafei! ʻI he ʻosi ʻa e polokalamá, ʻoku fakavave ʻa e fanga tokouá ki tuʻa ke maʻu ha ʻea lelei mo fakamokomoko.” ʻE lava fēfē ke tau tokonaki ha ʻātakai ako ʻe fakafiemālie ange ki hotau fanga tokouá?

Naʻa mau fili ke fakaleleiʻi ʻa e palopalema ko ení ʻi ha founga heʻikai ke uesia ai ʻa e ʻātakaí. Naʻa mau fokotuʻu ha ngaahi ī ʻoku vilohi pē ʻe he havilí. Naʻa mau toe fakapipiki mo ha ngaahi kofu ke ne fakasiʻisiʻi ʻa e hū ki he falé ʻa e mafana mei he vela ʻa e laʻaá, pea ʻoku tokoni leva ʻa e ī ke vilo tuʻumaʻu ʻa e ʻeá. ʻOku ʻikai ke fakalele ʻa e ngaahi ī ʻaki ha ʻuhila ka ʻoku nau ngāueʻaki ʻa e havilí mo e feviloʻaki fakanatula ʻa e ʻeá ke toʻo atu ʻa e ʻea vela ʻoku nofo ʻi he holó. Ko e ngaahi ī ko ení ʻoku $50 nai ki he taha.a

Kuo tokoni ʻa e fakaleleiʻanga ko ení ke toe fakafiemālie ange ʻa e ʻea ʻi he Holo ʻAsemipilií. Koeʻuhi ʻoku vilo maʻu pē ʻa e ʻeá, ʻoku siʻisiʻi leva ʻa e hauhau mo e tuʻungafulufulu ʻoku ʻasi ʻi he falé. ʻOku siʻisiʻi foki mo e tātānaki ʻa e kāponi taiʻokisaití kae lahi ange ʻa e ʻosikená. Ko e olá, ʻoku toe tokanga ange ʻa e kau maʻu fakatahá mo fiemālie. ʻOku pehē ʻe he tokoua naʻe lave ki ai ki muʻá: “ʻI he taimi ní ʻoku ʻikai ke mau toe fakavave ki tuʻa ʻi he tuku pē ʻa e polokalamá. ʻI hono kehé, ʻoku mau nofo pē ʻi he holó lolotonga ʻa e mālōlō hoʻataá ʻo talanoa mo e ngaahi kaungāmeʻá. Ko ʻete tangutu ʻi he holó ʻi hono ʻato foʻoú ʻoku hangē pē ia haʻate tangutu ʻi ha fuʻu lalo ʻakaú!”

Ala Maʻu ha Maʻuʻanga Ivi Taʻefakangatangata

Kuo tau fokotuʻu ha ngaahi sisitemi maʻuʻanga ivi mei he laʻaá ʻi heʻetau ngaahi fale faiʻanga lotu lahi takatakai he māmaní. ʻOku ngāueʻaki ʻe he ngaahi sisitemi ko ení ha ngaahi lauʻi sola ke ne liliu ʻa e huelo ʻo e laʻaá​​—ʻa ia ko ha maʻuʻanga ivi taʻefakangatangata​​—ki he ivi fakaʻuhilá. Ko e olá, ʻoku siʻisiʻi ʻetau fakafalala ki he ivi fakaʻuhila ʻoku maʻu mei he ngaahi meʻa hangē ko e malalá, loló mo e kasá. ʻOku siʻisiʻi ange ai ʻa hono ʻuliʻi ʻo e ʻātakaí pea ʻoku tokoni ia ke fakahaofi ʻa e ngaahi paʻanga tokoní.

ʻI he 2023, naʻe fokotuʻu ha sisitemi maʻuʻanga ivi mei he laʻaá ʻi he ʻōfisi vaʻa Solovēniá. ʻOkú ne tokonaki ʻa e pēseti ʻe 30 ʻo e ivi ʻoku fiemaʻu ki he falé. Kapau ʻe ʻi ai ha taimi ʻe lahi ange ai ʻa e ivi fakaʻuhila ʻoku tokonakí ʻi he meʻa ʻoku fiemaʻú, ʻe lava ke fakatafe ʻa e ivi ko iá ki he maʻuʻanga ʻuhila ʻa e koló. Ko e fakamole ki he sisitemi ko ení naʻe feʻunga mo e $360,000. Kae kehe, koeʻuhi ʻoku siʻisiʻi ange he taimí ni ʻa e moʻua ʻuhila ʻa e vaʻá, ʻe tō pē ʻa e fakamolé ʻi he ʻosi ha taʻu ʻe fā.

ʻI he 2024, naʻa mau fokotuʻu ha ngaahi lauʻi sola mo ha fuʻu puha ʻuhila lahi ʻi he ʻōfisi vaʻa Suli Langikā. Ko e fakamole ki he poloseki ko iá naʻe feʻunga mo e $3 miliona nai, pea ʻokú ne tokonaki ʻa e pēseti ʻe 70 ʻo e ivi fakaʻuhila ʻoku fiemaʻu ʻe he vaʻá. Ko e paʻanga ʻoku fakahaofi aí ʻe feʻunga ia ke totongiʻaki ʻa e fakamolé ʻi loto ʻi he taʻu pē ʻe tolu. ʻI he taʻu tatau pē, naʻa mau toe fokotuʻu ha sisitemi pehē ʻi he ʻōfisi vaʻa Netalení. Naʻe feʻunga ʻa e fakamolé mo e $1.1 miliona pea ʻokú ne tokonaki ʻa e pēseti ʻe 35 ʻo e ivi fakaʻuhilá ki he vaʻá. Ko e paʻanga ʻoku fakahaofi aí ʻe feʻunga ia ke totongiʻaki ʻa e fakamolé ʻi he ʻosi ha taʻu ʻe hiva.

Naʻa mau toe fokotuʻu ha ngaahi sisitemi tatau ʻi ha ngaahi ʻōfisi liliu-lea tuʻu mavahe (RTO) ʻi Mekisikou. Ko ha fakatātā ʻe taha: Ko e Tarahumara (Central) RTO ʻi Chihuahua. ʻI he taimi momokó, ko e fua māfaná ʻoku lava ke māʻulalo ange ia ʻi he tikilī Selosiasi ʻe 0, pea ʻi he taimi māfaná, ʻoku lava ke māʻolunga ange ia ʻi he tikilī Selosiasi ʻe 40! Ka koeʻuhi ko e mamafa ʻa e totongi ʻuhilá, naʻe fakaʻehiʻehi ʻa e fanga tokouá mei hono ngāueʻaki ʻa e ngaahi mīsini fakamokomokó mo e fakamāfaná. Ko Jonathan, ko ha tokoua ʻoku ngāue ʻi he RTO, ʻokú ne pehē: “ʻOku mau tui ʻa e ngaahi pulupulu mo e vala māfana ʻi he taimi momokó pea fakaavaava ʻa e ngaahi matapaá ʻi he taimi māfaná.”

ʻI he 2024, naʻe fokotuʻu ʻi he RTO ha sisitemi maʻuʻanga ivi mei he laʻaá. Ko e fakamole ki he sisitemi ko ení naʻe feʻunga mo e $21,480, ka ko e paʻanga ʻoku fakahaofi aí ʻe feʻunga ia ke totongiʻaki ʻa e fakamolé ʻi loto ʻi he taʻu pē ʻe nima. ʻOku lava he taimí ni ke ngāueʻaki ʻe hotau fanga tokouá ʻa e ngaahi mīsini fakamokomokó mo e fakamāfaná mei he taimi ki he taimi. ʻOku pehē ʻe Jonathan: “ʻOku mau toe fiefia ange ʻi homau vāhenga-ngāué, pea ʻoku toe lelei ange ai ʻa e ngāue ʻoku mau fakahokó. ʻI he taimi tatau, ʻoku mau fiefia ʻi hono ʻiloʻi ʻoku ngāueʻaki fakapotopoto ʻa e paʻanga ʻa e kautahá pea ʻi ha founga ʻoku lelei ki he ʻātakaí.”

Tānaki ʻa e Vai ʻUhá

ʻI ʻAfilika, ko e ngaahi Fale Fakatahaʻanga ʻe niʻihi ʻoku ʻikai ke nau maʻu ha maʻuʻanga vai lelei. Ko ia ai, ʻe fiemaʻu nai ki he fanga tokouá ke nau ʻave ʻa e vaí ʻi ha laui kilomita ki honau Fale Fakatahaʻangá. ʻI he ngaahi holo ʻe niʻihi, ʻoku fakatau mai ʻe he fanga tokouá ʻa e vai ʻoku tiliva ʻi ha loli, ka ʻoku mamafa ia pea ʻokú ne maumauʻi ʻa e ʻātakaí.

Ke lava ʻo maʻu ʻe hotau fanga tokouá ha vai, kuo mau tau ha ngaahi fakatali mo fokotuʻu ha ngaahi tangikē vai lalahi ʻi he ngaahi Fale Fakatahaʻanga lahi ʻi ʻAfilika. Ki muʻa ke fokotuʻu ʻa e naunaú, ʻoku ako ʻa e fanga tokouá ki he anga ʻo e tuʻu ʻa e ʻeá ʻi he feituʻú kae lava ke nau tisaini ʻa e founga ola lelei taha ke tānaki ai ʻa e vaí ki he Fale Fakatahaʻangá. Ko e fakamole ki hono fokotuʻu ʻa e naunau ko ení ki ha Fale Fakatahaʻanga ʻoku ʻi he $600 ki he $3,000. Kae kehe, ʻoku faʻa fakasiʻisiʻi ʻe he naunau ko ení ʻa e ngaahi fakamole ki hono tokangaʻi ʻa e Fale Fakatahaʻangá, he ʻoku ʻikai toe fiemaʻu ke totongi ʻe he fanga tokouá ʻa e vaí.

Kuo maʻu ʻaonga hotau fanga tokouá mei he ngaahi tānakiʻanga vai ʻuha ko ení. Ko Noemia, ko ha tuofefine mei Mosemipiiki, ʻokú ne pehē: “Ki muʻá, naʻa mau fononga ki ha feituʻu mamaʻo ʻaupito ke maʻu ha vai. Naʻa mau aʻu mai ki he holó kuo mau helaʻia mo ongoongosia. Pea koeʻuhi naʻe maʻungataʻa ʻa e vaí, naʻe faingataʻa ke tauhi maʻu ha tuʻunga lelei ʻo e maʻá. ʻI he taimí ni, ʻoku lava ke fanofano ʻa e tokotaha kotoa. ʻOku lava ke mau ʻalu ki he Fale Fakatahaʻangá pea fiefia ʻi he fakatahá ʻo ʻikai ke mau mate helaʻia. Mālō ʻaupito!”

ʻOku anga-fēfē hono fua ʻa e fakamole ki he ngaahi poloseki ko ení? Fakafou ʻi he ngaahi tokoni ki he ngāue ʻi māmani lahí, ʻa ia ko e lahi ʻo e ngaahi tokoni ko iá ʻoku fai ia fakafou ʻi he ngaahi founga kehekehe ʻi he donate.jw.org. Fakamālō atu ki hoʻomou tokoni nima-homó!