Ko e Ongoongo Lelei ʻo Fakatatau kia Sīsū​—Ngāue Mālohi ki Hono Faʻu Iá

Ko e taha ʻo e kātoanga mahuʻinga taha ʻoku hanga vēkeveke atu ki ai ʻa e Kau Fakamoʻoni ʻa Sihová ʻi he taʻu ní ko hono tuku ange ko ia ʻo e Konga 1 ʻa e Ko e Ongoongo Lelei ʻo Fakatatau kia Sīsū. Ko e laui miliona kuo nau ʻosi mamata ai. Pea ko e konga pē eni ʻe taha mei he konga ʻe 18! Ko e hā ʻa e ngaahi ngāue ʻoku fakahoko ʻe he fanga tokouá ke faʻu ʻa e ngaahi vitiō fakakongokonga ko ení, pea kuo anga-fēfē hoʻo tokoni ki he ngāue ko ení?

Tokangaʻi ʻa e Kau ʻEti Faivá mo e Kau Ngāué

ʻI he vaʻa ʻAositalāsiá, ʻoku faʻu ai ʻa e lahi taha ʻo e vitiō Ongoongo Leleí ʻoku fakafuofua ki he kakai ʻe toko 50 ki he 80 ʻoku nau kau ʻi hono ʻetiʻi ʻa e ngaahi konga taki taha.a ʻOku tokonaki ai ʻa e kai hoʻatā, kai efiafi mo e fakaneifua ki he kotoa ʻo e kau ʻeti faivá mo e kau ngāué. Ko e meʻakaí ʻoku teuteu lelei tokamuʻa ia. “ʻOku mau fakatau mai ʻa e ngaahi meʻakaí mei he faʻahinga kehekehe ke lava ke mau maʻu ha meʻakai ʻoku fakatupu moʻui lelei pea ʻi ha mahuʻinga fakaʻatuʻi,” ko e fakamatala ia ʻa Esther, ʻoku ngāue ʻi he Potungāue Meʻakaí. “Pea ʻoku mau liliu maʻu pē ʻemau founga feimeʻatokoní ke fakasiʻisiʻi hono maumauʻi ʻo e meʻakaí.” ʻI he ʻaho taki taha, ʻoku mau fakamoleki ʻa e meimei tola ʻe fā (ʻAmelika) ki he meʻakai ʻa e toko taha.

ʻOku ʻikai ngata pē ʻi he fiemaʻu ʻe he kau ʻeti faivá mo e kau ngāué ʻa e meʻakaí ka ʻoku nau fiemaʻu foki ke hoko ʻo malu. Ke malu mei he hā? ʻI ʻAositelēlia ʻoku faʻa māfana mo laʻalaʻā, ka ʻoku toe fakatuʻutāmaki ange foki ʻa e huelo ʻo e laʻaá. Ke fakaʻehiʻehi mei he huelo fakatuʻutāmaki ko iá mo e ʻea velá, ko e fanga tokoua ngāue mālohí ʻoku nau fokotuʻu ʻa e ngaahi tēniti mo e ngaahi feituʻu fakamokomoko pea fakapapauʻi ʻoku lahi ʻa e ngaahi kilimi ki he laʻaá, fakamalu, mo e vai. Ko Kevin, ʻokú ne ngāue ʻi he Potungāue Hiki-Leʻo/Vitioó, ʻokú ne fakamatala: “Ko e tokolahi taha ʻo e fanga tokoua ʻoku nau tokoni ki he ngāue ko ení ko e kau Pēteli ʻoku nau nofo pē ʻi honau ʻapí. ʻOku nau fakahoko fiefia mo anga-fakatōkilalo ʻa e ngāue ko ení mo e ngaahi ngāue kehe. ʻOku ʻikai mei lava ke fakahoko ʻa e ngāue ko ení ka naʻe ʻikai ʻenau tokoní.”

Ko Hono Hiki ʻo e Faivá ʻi ha Feituʻu

Ko e ngaahi konga ʻe niʻihi heʻikai lava ʻo hiki ola lelei ia ʻi he ʻōfisi vaʻá, ʻo tatau pē ʻi tuʻa mo loto ʻi he feituʻu hiki faivá. ʻI he ngaahi tuʻunga ko ení, ko e kau hiki faivá ʻoku nau ʻalu ʻo fakahoko ia ʻi ha feituʻu kehe. Ke lava ʻo hiki ha ngaahi konga mei he taimi ʻo e Tohi Tapú ʻi he kuonga muʻá, ʻa ia naʻe ʻikai ha ʻuhila, hala valitā pea mo ha ngaahi fale fakaeonopōní, ko e kau ʻeti faivá mo e kau ngāué ʻoku nau faʻa fononga ki ha ngaahi feituʻu mamaʻo. Ko honau ngaahi teungá, naunaú mo e meʻangāué kuo pau ke faʻo pea ʻave ʻo tauhi malu ia ʻi he feituʻu ʻe fakahoko ai ʻa e hiki faivá. Ki muʻa ke kamata ʻa e hikí, kuo pau ke fakapapauʻi ʻe he tokotaha tokoni ki he kouʻotineitá ʻoku ʻi ai ʻa e ngaahi senoleita, vai maʻa ki he inú, mo e ngaahi falemālōlō ke ngāueʻaki. Ko e kau ʻeti faivá mo e kau ngāué ʻoku nau nofo ʻi he ngaahi ʻapi ʻo e Kau Fakamoʻoni fakalotofonuá, ʻi he ngaahi kalavana, pe ʻi he ngaahi hōtele pe ʻi ha fale.

Ko e hiki faiva ʻi ha feituʻú, ʻoku lava ke mamafa, fiemaʻu ki ai ʻa e taimi lahi pea fakaongosia ki he tokotaha kotoa ʻoku kau ki aí. Ko ia ai, ʻi he 2023 naʻe tali ʻe he Kulupu Pulé ke fakatau ha fuʻu TV lahi naʻe feʻunga mo e tola ʻe 2.5 miliona (ʻAmelika) ke tokoni ki he hiki mo e faʻu faivá. Ko e tekinolosia ko ení ʻoku tokoni ia ke maʻu ʻa e foʻi ʻata lelei taha mo e maama tofu pē ʻoku fiemaʻú ke hangē ʻoku huluʻi tofu pē ia ʻi he fetuʻu ko iá. Ko e olá, ʻoku siʻisiʻi ange ai ʻa e fakamole ke fononga ki ha ngaahi feituʻu ʻo hiki ai ʻa e faivá. Ko Darren, ko ha mēmipa ʻo e Kōmiti Vaʻa ʻi ʻAositalāsiá, ʻokú ne pehē: “Ko hono hiki ʻo ngāueʻaki ʻa e fuʻu TV lahí ʻoku tokoni ia ke fakasiʻisiʻi ʻa e helaʻia ʻa e kau ʻeti faivá pea fakaʻatā ʻa e kau ngāué ke nau toutou hiki ha foʻi konga ʻo fakatatau ki heʻenau fiemaʻú. Ko e fakatātaá, kapau te mau hiki ʻi tuʻa, naʻe lau mōmeniti pē ke maʻu ʻa e tāitō hifo ʻa e laʻaá ki muʻa pea puliá. Ka ʻi he fuʻu TV lahí, ʻe lava ke mau fakaʻasi ai ʻa e tāitō ʻa e laʻaá, kae ʻoua kuo mau maʻu ʻa e foʻi hiki tonu tahá.”

“Naʻe Hangē Ia Naʻe ʻIkai ha Feilaulaú”

Naʻe fiemaʻu ʻa e kau ʻeti faiva ʻe laui ngeau mo e kau ngāue tokolahi ange ki he konga taki taha ʻo e Ongoongo Leleí. ʻOku anga-fēfē ʻenau ongoʻí ki he meʻa kotoa kuo fai ke tokangaʻi kinautolú?

Ko Amber, naʻá ne fononga ʻi he kilomita ʻe 700 tupu (maile ʻe 435) mei hono ʻapí ʻi Melipoane ke kau ʻi he polosekí, naʻá ne tohi: “Mei heʻeku tūʻuta atu pē ʻi he malaʻe vakapuná, ko e fanga tokoua ʻi he Pētelí naʻa nau tokangaʻi lelei ʻaupito au. Naʻe fakaafeʻi au ʻe he kau Pēteli tokolahi ki ha kiʻi kai pe ipu tī. ʻI he feituʻu hiki faivá, ko e tokotaha kotoa naʻa nau ʻai au ke u ongoʻi fiemālie mo ʻofaʻi. Naʻá ku maʻu ʻa e ngaahi tāpuaki lahi mei ai. Naʻe hangē ia naʻe ʻikai ha feilaulaú!”

Ko Derek ʻokú ne ngāue ʻi he timi faʻu vitioó, ʻokú ne pehē: “Kuo tokoni mai ʻa e ngaahi potungāue lahi talu mei he kamata pē ʻa e polosekí. ʻOku ou houngaʻia ʻi he fanga tokoua mo e fanga tuofāfine kuo nau feilaulauʻi honau taimí, koloá mo honau iví ke tokoni ʻi he poloseki ko ení. ʻOku nau loto-lelei ke tokoni pea anga-ʻofa. ʻOku hā mahino ʻoku tāpuakiʻi kinautolu ʻe Sihova kae pehē foki kiate kimautolu. ʻOku ou tuipau ʻoku ʻikai ke ne tokanga pē ki he ola ʻemau ngāué ka ki he founga kuo mau fakahoko kakato ai ʻa e ngāué.”

Fakamālō atu ki homou tokoni ki he vitiō fakakongokonga ko ení ʻo fakafou ʻi hoʻomou ngaahi meʻaʻofá, ʻo kau ki ai ʻa e ngaahi tokoni ʻoku mou fakahoko ʻi he donate.jw.org.