Ua Kalonikali
28 Naʻe taʻu 20 ʻa ʻĀhasi+ ʻi heʻene hoko ko e tuʻí, pea naʻá ne pule ʻi he taʻu ʻe 16 ʻi Selusalema. Naʻe ʻikai te ne fai ʻa e meʻa naʻe totonu ʻi he vakai mai ʻa Sihová ʻo hangē ko ia naʻe fai ʻe Tēvita ko ʻene kuí.+ 2 ʻI hono kehé, naʻe ʻaʻeva ia ʻi he ʻalunga ʻo e ngaahi tuʻi ʻo ʻIsilelí,+ pea naʻe aʻu ʻo ne ngaohi ʻa e ngaahi ʻīmisi mētale*+ ʻo e ngaahi Pēalí. 3 ʻIkai ngata aí, naʻá ne fai ʻa e feilaulau fakakohu ʻi he Teleʻa ʻo e Foha ʻo Hīnomí* pea tutu ʻa hono ngaahi fohá ʻi he afí,+ ʻo muimui ʻi he ngaahi tōʻonga fakalielia ʻa e ngaahi puleʻanga+ naʻe kapusi ʻe Sihova mei he ʻao ʻo e kau ʻIsilelí. 4 Naʻá ne hanganaki faifeilaulau foki mo fai ha feilaulau fakakohu ʻi he ngaahi potu māʻolungá,+ ʻi he ngaahi foʻi māʻolungá, pea ʻi he lalo ʻakau tupu ʻāfaʻafá kotoa.+
5 Naʻe tuku atu ai ia ʻe Sihova ko hono ʻOtuá ki he nima ʻo e tuʻi ʻo Sīliá,+ ko ia naʻa nau ikunaʻi ia pea taki ha kau pōpula tokolahi ʻo ʻave kinautolu ki Tāmasikusi.+ Naʻe toe tuku foki ia ki he nima ʻo e tuʻi ʻo ʻIsilelí, ʻa ia naʻá ne taaʻi ia ʻaki ha fuʻu tāmate lahi ʻaupito. 6 He naʻe tāmateʻi ʻe Peka+ ko e foha ʻo Lemalaiá ʻi Siuta ʻa e toko 120,000 ʻi he ʻaho pē taha, ko e kau tangata toʻa hono kotoa, koeʻuhí naʻa nau liʻaki ʻa Sihova ko e ʻOtua ʻo ʻenau fanga kuí.+ 7 Pea ko Sikeli, ko ha pāteʻi tau ʻIfalemi, naʻá ne tāmateʻi ʻa Māseia ko e foha ʻo e tuʻí mo ʻAselikami, ʻa ia naʻá ne tokangaʻi ʻa e palasí,* pea mo ʻElikena, ʻa ia naʻe fika ua hake ki he tuʻí. 8 ʻIkai ngata aí, naʻe taki pōpula ʻe he kau ʻIsilelí ʻa e toko 200,000 ʻo honau fanga tokouá—ko e kakai fefine, ngaahi foha, mo e ngaahi ʻofefine; naʻa nau faʻao foki ha fuʻu koloa vete lahi, pea naʻa nau ʻave ia ki Samēlia.+
9 Ka naʻe ʻi ai ha palōfita ʻa Sihova ko hono hingoá ko ʻŌteti. Naʻá ne ʻalu atu ki he kau tau naʻe omi ki Samēliá peá ne pehē kiate kinautolu: “Vakai, koeʻuhi ko e houhau ʻa Sihova ko e ʻOtua ʻo hoʻomou fanga kuí ʻi Siutá naʻá ne tuku atu ai kinautolu ki homou nimá,+ pea naʻa mou tāmateʻi kinautolu ʻi he fuʻu ʻita lahi ʻa ia kuo aʻu hake ki he langí. 10 Pea ko eni ʻoku mou palani ke ʻai ʻa e kakai ʻo Siuta mo Selusalemá ko hoʻomou kau tamaioʻeiki mo e kaunanga.+ Neongo ia, ʻikai ʻoku mou halaia foki ʻi he ʻao ʻo Sihova ko homou ʻOtuá? 11 Ko eni mou fanongo mai pea fakafoki ʻa e kau pōpula ʻa ia naʻa mou ʻave mei homou fanga tokouá, he ʻoku ʻiate kimoutolu ʻa e houhau kakaha ʻa Sihová.”
12 Ko ia ko e niʻihi ʻo e ngaahi ʻeiki ʻo e kau ʻIfalemí, ʻa ʻAsalaia ko e foha ʻo Siohananí, Pelekaia ko e foha ʻo Mesilemotí, Sesikaia ko e foha ʻo Salumí, pea mo ʻĀmasa ko e foha ʻo Hatelaí, naʻa nau fakafetaulaki atu ki he faʻahinga naʻe haʻu mei he feingataú, 13 pea naʻa nau pehē kiate kinautolu: “ʻOua naʻa ʻomi ki heni ʻa e kau pōpulá, he te tau halaia ai ʻi he ʻao ʻo Sihová. Ko e meʻa ʻoku mou palani ke faí ʻe fakalahi ai ʻetau angahalá mo ʻetau halaiá, he kuo ʻosi lahiʻānoa ʻetau halaiá pea ʻoku ʻi ai ha houhau kakaha ki ʻIsileli.” 14 Ko ia naʻe tuku atu ai ʻe he kau sōtiá ʻa e kau pōpulá mo e koloa veté+ ki he ngaahi ʻeikí pea ki he fakatahaʻangá fakakātoa. 15 Pea ko e kau tangata naʻe ui ʻa honau hingoá naʻa nau tuʻu hake ʻo ʻave ʻa e kau pōpulá, pea naʻa nau ʻoange ʻa e vala mei he koloa veté ki he faʻahinga kotoa ʻi honau lotolotongá naʻe ʻikai hanau valá. Ko ia naʻa nau fakavalaʻi kinautolu pea ʻoange kiate kinautolu ʻa e senitolo, meʻakai mo e inu, pea mo e lolo ke nau milimili. ʻIkai ko ia pē, naʻa nau fakaheka ʻa e faʻahinga naʻe vaivaí ʻi he fanga ʻasi pea ʻave kinautolu ki honau fanga tokouá ki Sielikō, ko e kolo ʻo e ʻulu pāmé. ʻI he hili iá, naʻa nau foki ki Samēlia.
16 ʻI he taimi ko iá naʻe kole tokoni ʻa Tuʻi ʻĀhasi ki he ngaahi tuʻi ʻo ʻAsīliá.+ 17 Pea naʻe toe hū mai ʻa e kau ʻĪtomí ʻo ʻohofi ʻa Siuta pea nau ʻave ha kau pōpula. 18 Naʻe toe ʻohofi ʻe he kau Filisitiá+ ʻa e ngaahi kolo ʻo e Sefelaʻá*+ mo e feituʻu Nīkepi ʻo Siutá pea nau hamu ʻa Pete-semesi,+ ʻAsaloni,+ Keteloti, Soko mo hono ngaahi kolo takatakaí,* Timinā+ mo hono ngaahi kolo takatakaí, mo Kimiso mo hono ngaahi kolo takatakaí; pea naʻa nau nofo ai. 19 Naʻe fakavaivaiʻi ʻe Sihova ʻa Siuta koeʻuhí ko Tuʻi ʻĀhasi ʻo ʻIsilelí, he naʻá ne fakangofua tavale ʻa Siuta, ʻo iku ai ki heʻenau taʻefaitōnunga lahi kia Sihova.
20 Naʻe faifai pē ʻo haʻu ʻa Tuʻi Tilikati-pilinesa+ ʻo ʻAsīliá ʻo tauʻi ia kae ʻikai ke ne tokoniʻi ia pea naʻe fakatupunga ai ke ne loto-mamahi. + 21 He naʻe toʻo ʻe ʻĀhasi ʻa e koloa ʻi he fale ʻo Sihová mo e fale* ʻo e tuʻí+ mo e fale ʻo e houʻeikí peá ne foaki ha meʻaʻofa ki he tuʻi ʻo ʻAsīliá; ka naʻe ʻikai hano ʻaonga kiate ia. 22 Pea ʻi he lolotonga ʻa e taimi ʻo ʻene loto-mamahí, naʻe toe taʻefaitōnunga lahi ange ai ʻa Tuʻi ʻĀhasi kia Sihova. 23 Naʻe kamata ke ne faifeilaulau ki he ngaahi ʻotua ʻo Tāmasikusi+ ʻa ia naʻa nau ikunaʻi iá,+ peá ne hoko atu ʻo pehē: “Koeʻuhí ko hono tokoniʻi ʻe he ngaahi ʻotua ʻo e ngaahi tuʻi ʻo Sīliá kinautolú, te u faifeilaulau kiate kinautolu koeʻuhí ke nau tokoniʻi au.”+ Ka naʻa nau fakatupunga ke hoko ha kovi kiate ia pea mo ʻIsileli kotoa. 24 ʻIkai ko ia pē, naʻe tānaki ʻe ʻĀhasi ʻa e ngaahi naunau ʻo e fale ʻo e ʻOtua moʻoní; pea naʻá ne tuʻutuʻu kongokonga ʻa e ngaahi naunau ʻo e fale ʻo e ʻOtua moʻoní,+ tāpuni ʻa e ngaahi matapā ʻo e fale ʻo Sihová,+ pea ngaohi maʻana ha ngaahi ʻōlita ʻi he tuliki kotoa ʻo Selusalemá. 25 Pea ʻi he ngaahi kolo kotoa ʻo Siutá, naʻá ne fokotuʻu ai ʻa e ngaahi potu māʻolunga ke fai ai ʻa e feilaulau fakakohu ki he ngaahi ʻotua kehé,+ pea naʻá ne fakalotomamahiʻi ʻa Sihova ko e ʻOtua ʻo ʻene fanga kuí.
26 Ko e meʻa ki he toenga ʻo hono hisitōliá, mo e kotoa ʻo ʻene ngaahi ngāué mei he kamataʻangá ki he ngataʻangá, vakai kuo hiki ia ʻi he Tohi ʻo e Ngaahi Tuʻi ʻo Siuta mo ʻIsilelí.+ 27 Pea naʻe toka ʻa ʻĀhasi ʻo mālōlō fakataha mo ʻene fanga kuí, pea naʻa nau tanu ia ʻi he koló, ʻi Selusalema, he naʻe ʻikai te nau ʻomi ia ki he ngaahi tanuʻanga ʻo e ngaahi tuʻi ʻo ʻIsilelí.+ Pea naʻe hoko ʻa hono foha ko Hesekaiá ko e tuʻi ʻo fetongi ia.