Nehemaia
5 Kae kehe, naʻe ʻi ai ha fuʻu kalanga mei he kakaí pea mo honau ngaahi uaifí ʻo lāunga fekauʻaki mo honau fanga tokoua Siú.+ 2 Naʻe pehē ʻe he niʻihi: “ʻOku mau tokolahi fakataha mo homau ngaahi fohá mo homau ngaahi ʻofefiné. Kuo pau ke mau maʻu ha uite koeʻuhí ke mau kai pea mau kei moʻui.” 3 Ko e niʻihi naʻa nau pehē: “ʻOku mau tuku atu ʻemau ngoué mo ʻemau ngoue kālepí mo homau ngaahi falé ko e maluʻi ke maʻu mai ai ha uite lolotonga ʻa e nounou fakameʻatokoní.” 4 Lolotonga ia naʻe pehē ʻe he niʻihi: “Kuo mau nō mai ha paʻanga ʻaki ʻemau ngaahi ngoué mo ʻemau ngoue kālepí ke totongiʻaki ʻa e tukuhau ʻa e tuʻí.+ 5 Ko eni ʻoku mau kakano mo toto taha pē mo homau fanga tokouá,* pea ko ʻemau fānaú ʻoku nau hangē pē ko ʻenau fānaú; neongo ia kuo pau ke mau fakamoʻulaloaʻi homau ngaahi fohá mo e ngaahi ʻofefiné ki he nofo pōpula, pea ko e niʻihi ʻo homau ngaahi ʻofefiné kuo nau ʻosi nofo pōpula.+ Ka ʻoku ʻikai hamau mālohi ke taʻofi ʻa e meʻá ni, koeʻuhí ko ʻemau ngoué mo ʻemau ngoue kālepí kuo maʻu ia ʻe he niʻihi kehe.”
6 Naʻá ku ʻita lahi ʻi heʻeku fanongo atu ki heʻenau kalangá pea mo e ngaahi lea ko ení. 7 Ko ia naʻá ku fakakaukauloto ki he ngaahi meʻá ni, pea naʻá ku ʻohake ʻa e fehālaaki ʻa e houʻeikí mo e kau tokoni pulé peá u pehē kiate kinautolu: “Ko kimoutolu taki taha ʻoku mou ʻeke ha tupu* mei homou tokouá.”+
ʻIkai ko ia pē, naʻá ku fokotuʻutuʻu ha fuʻu fakataha koeʻuhí ko kinautolu. 8 Pea naʻá ku pehē kiate kinautolu: “ʻI he tuʻunga lahi taha naʻe ala lavá, kuo tau fakatau mai ʻa hotau fanga tokoua Siu ko ia naʻe fakatau atu ki he ngaahi puleʻangá; ka te mou fakatau atu koā he taimí ni ʻa homou fanga tokouá,+ pea ʻe toe fakatau mai pē koā kinautolu kiate kitautolu?” ʻI he meʻá ni naʻa nau hoko ai ʻo fakalongomate, pea naʻe ʻikai te nau ʻilo pe ko e hā te nau leaʻakí. 9 Naʻá ku pehē ange leva: “ʻOku ʻikai ke lelei ʻa e meʻa ʻoku mou faí. ʻIkai ʻoku totonu ke mou ʻaʻeva ʻi he manavahē ki hotau ʻOtuá+ koeʻuhí ke ʻoua naʻa lava ʻo lumaʻi kitautolu ʻe he ngaahi puleʻangá, ʻe hotau ngaahi filí? 10 ʻIkai ngata aí, ko au, mo hoku fanga tokouá, pea mo ʻeku kau tamaioʻeikí ʻoku mau nō atu kiate kinautolu ʻa e paʻanga mo e uite. Kātaki ʻo tuku muʻa ʻa e tali nō ko eni mo ʻeke tupú.+ 11 Kātaki muʻa ʻo fakafoki kiate kinautolu ʻi he ʻahó ni pē ʻa ʻenau ngoué,+ ko ʻenau ngoue kālepí, ko ʻenau ngoue ʻōlivé, mo honau ngaahi falé, pea pehē ki he vahe teau ʻe taha* ʻo e paʻangá, ko e uité, ko e uaine foʻoú, pea mo e lolo ʻoku mou ʻeke ko e tupu meiate kinautolú.”
12 ʻI he meʻá ni naʻa nau pehē: “Te mau fakafoki ʻa e ngaahi meʻá ni kiate kinautolu pea ʻe ʻikai te mau toe ʻeke mei ai ha meʻa. Te mau fai ʻa e meʻa tofu pē ʻokú ke leaʻakí.” Ko ia naʻá ku ui mai ai ʻa e kau taulaʻeikí pea ʻai ʻa e kau tangata ko iá ke nau fuakava te nau fai ki he talaʻofa ko ení. 13 Pehē foki, naʻá ku tupeʻi ʻa e ngaahi pelu ʻo hoku kofú* peá u pehē: “ʻOfa ke tupeʻi peheni ʻe he ʻOtua moʻoní ʻa e tangata kotoa pē ʻe ʻikai te ne fai ki he talaʻofa ko ení mei hono falé pea mei he ngaahi meʻa ʻokú ne maʻú, pea ʻofa ke tupeʻi peheni ia ʻo fakakaʻanga.” ʻI he meʻá ni naʻe pehē ʻe he fakatahaʻangá kotoa: “ʻĒmeni!”* Pea naʻa nau fakahīkihikiʻi ʻa Sihova, pea naʻe fai ʻa e kakaí ki heʻenau talaʻofá.
14 ʻIkai ngata aí, mei he ʻaho naʻá ne fekauʻi ai au ke u hoko ko honau kōvana+ ʻi he fonua ʻo Siutá, mei he taʻu hono 20+ ki he taʻu hono 32+ ʻo e pule ʻa Tuʻi ʻAtaseasé,+ ko e taʻu ia ʻe 12, ko au pea pehē ki hoku fanga tokouá naʻe ʻikai te mau kai ʻa e ʻinasi meʻakai ʻa e kōvaná.+ 15 Ka ko e kau kōvana ki muʻa ʻa ia naʻa nau muʻomuʻa ʻiate aú naʻa nau fakamafasiaʻi ʻa e kakaí pea toʻo meiate kinautolu ʻa e sikeli* siliva ʻe 40 ki he mā mo e uaine ʻi he ʻaho taki taha. Pehē foki, ko ʻenau kau tamaioʻeikí naʻa nau lōmekina ʻa e kakaí. Ka naʻe ʻikai te u fai ia+ koeʻuhí ko ʻeku manavahē ki he ʻOtuá.+
16 ʻIkai ko ia pē, naʻá ku tokoni ʻi he ngāue ki he ʻā ko ení, pea naʻe ʻikai te mau maʻu mei ai+ ha ngoue; ko ʻeku kau tamaioʻeikí kotoa naʻa nau fakatahataha ki ai ki he ngāué. 17 Ko e kau Siu mo e kau tokoni pule ʻe toko 150 naʻa nau kai ʻi heʻeku tēpilé, pea pehē ki he faʻahinga ko ia naʻa nau omi kiate kimautolu mei he ngaahi puleʻangá. 18 ʻI he ʻaho kotoa pē naʻe teuteu ai maʻaku* ʻa e pulu tangata ʻe taha, sipi lelei ʻe ono, pea mo e fanga manupuna, pea naʻe ʻomai kiate kimautolu ʻa e faʻahinga uaine kehekehe lahi fau ʻo tuʻo taha ʻi he ʻaho ʻe hongofulu kotoa pē. Neongo ʻa e meʻa kotoa ko ení naʻe ʻikai te u kounaʻi ʻa e ʻinasi meʻakai ʻa e kōvaná, koeʻuhí naʻe ʻosi fua ʻe he kakaí ʻenau kavenga ngāué. 19 Ke ke manatu ʻofa mai* kiate au, ʻe hoku ʻOtua, koeʻuhi ko e meʻa kotoa kuó u fai maʻá e kakaí ni.+