“Haʻu Kiate Au, . . . pea Te U Fakaivifoʻou Kimoutolu”

Toʻutupu ʻOku Nau Hangē ha Ngaahi Tulutā Hahau Fakaivifoʻoú

ʻOKU ʻikai ha veiveiua naʻe fakakau ʻe Sīsū Kalaisi ʻa hono kau muimui kei siʻi angé ʻi heʻene pehē: “Haʻu kiate au, . . . pea te u fakaivifoʻou kimoutolu.” (Mātiu 11:​28, NW) ʻI he taimi naʻe kamata ʻomi ai ʻe he kakaí ʻenau fānau īkí kiate iá, naʻe feinga ʻa ʻene kau ākongá ke taʻofi kinautolu. Ka naʻe pehē ʻe Sīsū: “Tuku pē ʻa e kau tamaiki ke nau haʻu kiate au; ʻoua ʻe taʻofi kinautolu.” Naʻe aʻu ʻo hanga ʻe Sīsū ʻo “hapai ʻa e kau tamaiki, ʻo ne ʻai hono nima kiate kinautolu, ʻo ne fuʻu tāpuekina.” (Maake 10:​14-16) Naʻe vakai taʻetoefehuʻia ʻa Sīsū ki he fānaú ʻoku nau mahuʻinga.

ʻOku fakamatala ʻa e Tohitapú ki ha kau talavou mo e kau finemui loto-tōnunga, pea pehē ki he toʻutupu mo e fānau iiki, ʻa ia ʻoku nau fokotuʻu ʻa e ngaahi faʻifaʻitakiʻanga lelei ʻaupito ʻi he tauhi ki he ʻOtuá. Ko ha “kau talavou” ʻoku nau fakaivifoʻou hangē ko e ngaahi tulutā hahaú ʻoku tomuʻa tala ia ʻi he tohi Sāmé. ʻOku toe fakamatala ai fekauʻaki mo e “kau talavou” mo e “kau finemui” ʻoku nau fakahīkihikiʻi ʻa e huafa ʻo Sihová.​—Sāme 110:3; 148:​12, 13.

Ko ha Feituʻu ke Lakalakaimonū Ai ʻa e Toʻutupú

Ko e similī fekauʻaki mo e tulutā hahaú ʻoku feʻungamālie, he ko e hahaú ʻoku fakafehokotaki ia ki he tuʻunga lahi pea mo e tāpuaki. (Senesi 27:28) Ko e ngaahi tulutā hahaú ʻoku maʻamaʻa mo fakaivifoʻou. ʻI he taimi ko eni ʻo e ʻi ai ʻa Kalaisí, ʻoku foaki loto-lelei mo vēkeveke atu ai ʻe he toʻutupu Kalisitiané kinautolu ʻi he fuʻu tokolahi ʻaupito. ʻI he hangē tofu pē ko e ngaahi tulutā hahau fakaivifoʻoú, ʻoku tauhi fiefia ki he ʻOtuá ʻa e kau talavou mo e kau finemui tokolahi pea tokoniʻi ʻa honau kaungālotú.—Sāme 71:17.

Ko e toʻutupu Kalisitiané ʻoku ʻikai te nau fakaivifoʻou pē ki he niʻihi kehé; ko kinautolu tonu ʻoku nau maʻu ʻa e fakaivifoʻou ʻi heʻenau ngāué. ʻOku ʻomai ʻe he kautaha ʻa e ʻOtuá ha ʻātakai ʻa ia ʻoku lava ke nau lakalakaimonū ai. ʻI hono tauhi maʻu ʻa e ngaahi tuʻunga fakaʻulungaanga māʻolungá, ʻoku maʻu ai ʻe he kau talavoú mo e kau finemuí ha vahaʻangatae fekoekoeʻi mo e ʻOtuá. (Sāme 119:9) ʻI he loto fakatahaʻangá, ʻoku nau toe kau ai ʻi he ngaahi ngāue lelei pea maʻu ʻa e ngaahi kaumeʻa lelei—ko e ngaahi meʻa tefito ʻoku tānaki atu ki ha moʻui fakafiemālie mo mohu ʻuhinga.

‘Ko ha Faitoʻo mo ha Fakaivifoʻou’

ʻOku ongoʻi tonu ʻe he toʻutupu Kalisitiané ʻo hangē ha “ngaahi tulutā hahaú”? Feʻiloaki angé mo Tania, ko ha finemui ʻokú ne kau longomoʻui ʻi he fakatahaʻangá pea līʻoa fiefia ʻa e houa laka hake he 70 he māhina ki he ngāue fakafaifekaú. ʻOku fēfē ʻene ongoʻí? “ʻOku ou ongoʻi fakaivifoʻou mo laka ki muʻa,” ko ʻene leá ia. “Ko hono maʻu ʻa Sihova mo ʻene kautaha fakaemāmaní ʻi heʻeku moʻuí kuo hoko ia ‘ko ha faitoʻo mo ha fakaivifoʻou’ kiate au.”​—Palovepi 3:​8, NW.

Ko Ariel, ko ha finemui faifekau taimi-kakato ia ʻe taha, ʻoku houngaʻia ʻi he fafanga fakalaumālie ʻokú ne maʻu ʻi he loto fakatahaʻangá. “ʻI heʻeku ʻalu ki he ngaahi fakataha faka-Kalisitiané, ngaahi fakataha-lahí, mo e ngaahi ʻasemipilií pea malava ke u kai ʻi he tēpile fakalaumālie ʻa Sihová, ʻoku fakaivifoʻou fakalaumālie moʻoni au ʻe he meʻá ni,” ko ʻene fakamatalá ia. “Pea ʻokú ne tokoniʻi au ke ʻiloʻi ʻoku ʻi ai hoku kaungāngāue ʻi he māmaní kotoa.” ʻI hono fakamatalaʻi ʻa e matavai taupotu ʻo e fakaivifoʻoú, ʻokú ne pehē: “ʻOku mātuʻaki fakaivifoʻou ke maʻu ʻa Sihova ko ha kaumeʻa, tautefito ʻi he taimi ʻoku ou fanongo ai pe sio ki he ngaahi nunuʻa fakalilifu ʻoku ʻai ʻe he fokotuʻutuʻu ko ení ki he kakaí.”—Semisi 2:​23.

ʻI hono taʻu 20, ʻoku ngāue ai ʻa Abishai ko ha ʻevangeliō taimi-kakato mo ha sevāniti fakafaifekau ʻi he fakatahaʻangá. ʻOkú ne fakamatalaʻi ʻa e meʻa ʻokú ne hokosiá ʻi he ngaahi leá ni: “ʻOku ou ongoʻi fakaivifoʻou koeʻuhi ʻoku ou ʻiloʻi ʻa e founga ke fekuki ai mo e ngaahi palopalema lahi ʻoku fehangahangai mo e toʻutupú he ʻaho ní. Ko e moʻoni mei he Tohitapú kuó ne tokoniʻi au ke hanganaki hangataha ki he meʻa ʻoku fiemaʻu ke u faí koeʻuhi ke tauhi ʻaufuatō ai kia Sihova.”

ʻI hono taʻu hongofulu tupu siʻí, naʻe ʻita vave ʻa Antoine. Naʻá ne taaʻi he taimi ʻe taha ha kaungāako ʻaki ha sea, pea naʻá ne ngāueʻaki ha peni vahevahe ke hokaʻi ʻaki ha tokotaha ʻe taha. Naʻe ʻikai ʻaupito ko ha tokotaha fakaivifoʻou ʻa Antoine! Ka naʻe liliuʻi ʻe he fakahinohino mei he Tohitapú ʻa ʻene tōʻongá. ʻOkú ne taʻu 19 he taimí ni pea ʻoku ngāue ko ha sevāniti fakafaifekau mo ha faifekau taimi-kakato ʻi he fakatahaʻangá, ʻokú ne pehē: “ʻOku ou fakamālō kia Sihova ʻi hono fakaʻatā au ke maʻu ha ʻilo kiate ia pea ki hono tokoniʻi au ke u sio ki he fiemaʻu ke ngāueʻi ʻa e mapuleʻi-kitá pea liliu ʻa hoku ʻalungá. ʻI he foungá ni, kuó u kalofi ai ʻa e ngaahi palopalema lahi.”

ʻOku fakatokangaʻi ʻe he niʻihi kehé ʻa e fakakaukau fakaivifoʻou ʻa e toʻutupu Kalisitiané. Ko Matteo ko ha Fakamoʻoni kei siʻi ia ʻi ʻĪtali. Naʻe fakapapauʻi ʻe heʻene faiakó ko ha taha pē te ne ngāueʻaki ha lea kovi ʻi he kalasí ʻe pau ke ne totongi ha sēniti ko hono moʻua. ʻI ha taimi ki mui ai, naʻe kole ai ʻa e tamaikí ke fakangata ʻa e tuʻutuʻuní koeʻuhi naʻa nau pehē, “ʻoku taʻemalava ke ʻikai ngāueʻaki ʻa e lea koví.” “Ka,” ʻoku fakamatala ʻa Matteo, “naʻe pehē ʻe he faiakó naʻe ʻikai ke pehē ia, pea naʻá ne ngāueʻaki au, ko e taha ʻo e Kau Fakamoʻoni ʻa Sihová, ko ha fakatātā, ʻo fakahīkihikiʻi au ʻi he ʻao ʻo e kalasí kotoa ʻi heʻeku lea maʻá.”

ʻI ha kalasi taʻemaau ʻi Taileni, naʻe ui ai ʻe he faiakó ʻa e taʻu 11 ko Racha ki muʻa ʻi he kalasí ʻo fakaongoongoleleiʻi ia ʻi hono ʻulungāngá, ʻo ne pehē: “Ko e hā ʻoku ʻikai te mou faʻifaʻitaki kotoa ai kiate iá? ʻOkú ne tōtōivi ʻi he akó pea ʻulungaanga lelei.” Naʻá ne tala ange leva ki he kau akó: “ʻOku ou tui ʻe fiemaʻu ke mou hoko ko e taha ʻo e Kau Fakamoʻoni ʻa Sihová, ʻo hangē ko Racha, ke laka ki muʻa ai homou ʻulungāngá.”

ʻOku fakafiefia ke sio ki he laui afe ʻo e toʻutupu Kalisitiané ʻoku nau hoko ʻo ʻiloʻi lelei ange ʻa Sihova pea fai hono finangaló. Ko e toʻutupu lelei peheé ʻoku nau fakahāhā ʻa e poto ʻo mahulu atu ia ʻi honau taʻú. ʻOku lava ke tokoniʻi kinautolu ʻe he ʻOtuá ke nau lavameʻa ʻi heʻenau moʻui lolotongá pea pehē ki hono ʻoange kia kinautolu ha kahaʻu lāngilangiʻia ʻi he māmani foʻou ka hoko maí. (1 Timote 4:8) ʻI he tuʻunga honge fakalaumālie ʻo e fokotuʻutuʻu ʻo e ngaahi meʻa lolotongá, ʻa ia ʻoku fonu ʻi he toʻutupu taʻefiemālie mo ongoʻi feifeitamakí, ʻoku ʻomai ʻe he toʻutupu Kalisitiané ha tuʻunga fakaivifoʻou kehe ʻaupito!