Ko e Hā Te Ne ʻAi ʻEtau Lotú ke Fakahōifua ki he ʻOtuá?

Hangē ko ia naʻe lāulea ki ai ʻi he lēsoni ki muʻá, ʻoku ʻikai ke fakahōifua ki he ʻOtuá ʻa e lotu kotoa pē. Neongo ia, ʻoku lava ke tau lotu ki hotau Tokotaha-Fakatupú ʻi ha founga ʻoku ʻai ai ia ke fiefia. Ko e hā ʻa e “founga lotu” ʻoku fakahōifua kiate iá? (Sēmisi 1:27) Sio angé ki he meʻa ʻoku akoʻi ʻe he Tohi Tapú.

1. Ko e hā ʻoku totonu ke makatuʻunga ai ʻetau lotú?

Ko ʻetau lotú ʻoku totonu ke makatuʻunga ʻi he Tohi Tapú. Naʻe pehē ʻe Sīsū ki he ʻOtuá: “Ko hoʻo folofolá ko e moʻoní ia.” (Sione 17:17) Ko e ngaahi lotu ʻe niʻihi ʻoku nau tukunoaʻi ʻa e moʻoni ʻi he Folofola fakamānavaʻi ʻa e ʻOtuá, ʻa e Tohi Tapú. ʻOku nau fetongi ia ʻaki ʻa e ngaahi akonaki fakaetangata mo e ngaahi talatukufakaholó. Ka ʻoku ʻikai fakahōifua kia Sihova ʻa e faʻahinga ʻoku nau “taʻetokaʻi ʻa e fekau ʻa e ʻOtuá.” (Lau ʻa e Maʻake 7:9.) ʻI he tafaʻaki ʻe tahá, ʻoku tau ʻai ʻa e ʻOtuá ke fiefia ʻi heʻetau pipiki ki he Tohi Tapú pea muimui ki heʻene faleʻí.

2. ʻI he founga fē ʻoku totonu ke tau lotu ai kia Sihová?

Koeʻuhi ko Sihova ko hotau Tokotaha-Fakatupú ʻokú ne tuha mo ʻetau anga-līʻoa maʻataʻataá. (Fakahā 4:11) ʻOku ʻuhinga ení kuo pau ke tau ʻofa kiate ia, lotu kiate ia pē pea ʻikai ngāueʻaki ha ʻaitoli, ʻīmisi pe fakatātā fakalotu.​—Lau ʻa e ʻAisea 42:8.

Ko ʻetau lotú kuo pau ke “toputapu pea mo fakahōifua” kia Sihova. (Loma 12:1) ʻOku ʻuhinga ení ʻoku fiemaʻu ke tau talangofua ki heʻene ngaahi laó. Ko e fakatātaá, ko e faʻahinga ʻoku ʻofa kia Sihová ʻoku nau ʻofa mo talangofua ki heʻene ngaahi tuʻunga ʻi he nofo malí. Pea ʻoku nau fakaʻehiʻehi mei he ngaahi tōʻonga fakatupu maumau, hangē ko hono ngāueʻaki ʻa e tapaká pe ngāueʻaki e faitoʻo kona tapú pe ngāuekoviʻaki ʻa e ngaahi faitoʻó pe ʻolokaholó.a

3. Ko e hā ʻoku totonu ai ke tau lotu kia Sihova fakataha mo e kaungātuí?

Ko ʻetau ngaahi fakataha he lolotonga ʻa e uiké ʻokú ne ʻomai ʻa e faingamālie ke “fakahīkihikiʻi ʻa Sihova . . . ʻi he fakatahaʻangá.” (Saame 111:1, 2) Ko e founga ʻe taha ʻoku tau fai ai ení ko e hiva fakahīkihiki ki he ʻOtuá. (Lau ʻa e Saame 104:33.) ʻOku kole mai ʻe Sihova ke tau maʻu ʻa e ngaahi fakatahá koeʻuhí ʻokú ne ʻofa ʻiate kitautolu pea ʻokú ne ʻilo te ne tokoniʻi kitautolu ke fiefia taʻengata ʻi he moʻuí. ʻI he ngaahi fakatahá ʻoku tau fefakalototoʻaʻaki ai pea maʻu ʻaonga mei ai.

KELI LOLOTO ANGE

4. ʻOku ʻikai totonu ke tau ngāueʻaki ʻa e ngaahi ʻīmisí ʻi heʻetau lotú

VITIŌ: ʻOku Tali ʻe he ʻOtuá ʻa Hono Ngāueʻaki ʻo e ʻĪmisí ʻi he Lotú? (3:26)

• ʻI he taimi ʻo e Tohi Tapú, ko e hā naʻe hoko ʻi he feinga ʻa e kakai ʻe niʻihi ʻa e ʻOtuá ke lotu kiate ia ʻo ngāueʻaki ha ʻaitoli?

Ko e kakai ʻe niʻihi ʻoku nau feinga ke ongoʻi ofi ange ki he ʻOtuá ʻaki hono ngāueʻaki ʻa e ngaahi ʻīmisí ʻi heʻenau lotú. ʻE ʻai moʻoni ai kinautolu ke ofi ange ki he ʻOtuá? Lau ʻa e ʻEkisoto 20:4-6 mo e Saame 106:35, 36, pea lāulea leva ki he ngaahi fehuʻi ko ení:

• Ko e hā ʻa e ngaahi meʻa pe ngaahi ʻīmisi kuó ke sio ʻoku ngāueʻaki ʻe he kakaí ʻi heʻenau lotú?

• Ko e hā ʻa e ongoʻi ʻa Sihová ʻi hono ngāueʻaki ʻa e ngaahi ʻīmisí?

• Ko e hā hoʻo ongoʻí fekauʻaki mo hono ngāueʻaki ʻo e ngaahi ʻīmisí?

5. Ko e lotu kia Sihova tokotaha peé ʻokú ne fakatauʻatāinaʻi kitautolu mei he ngaahi fakakaukau halá

VITIŌ: Fakatauʻatāinaʻi ʻe he Moʻoní (5:16)

Lau ʻa e Saame 91:14, pea lāulea leva ki he fehuʻi ko ení:

• ʻI heʻetau fakamoʻoniʻi ʻoku tau ʻofa kia Sihova ʻaki ʻa e lotu kiate ia peé, ko e hā ʻokú ne talaʻofa mai te ne faí?

6. ʻOku tau lotu ki he ʻOtuá ʻi he ngaahi fakataha ʻa e fakatahaʻangá

ʻOku tau fakahīkihikiʻi ʻa Sihova pea felangahakeʻaki ʻaki ʻa e hiva mo fai ʻa e ngaahi tali ʻi he ngaahi fakataha ʻa e fakatahaʻangá. Lau ʻa e Saame 22:22, pea lāulea leva ki he ongo fehuʻi ko ení:

• ʻOkú ke saiʻia ʻi he fanongo ki he tali ʻi he ngaahi fakatahá?

• Te ke loto ke fai ha tali?

7. ʻOku hōifua ʻa Sihova ʻi heʻetau vahevahe atu ʻa e meʻa ʻoku tau akó

ʻOku lahi ʻa e ngaahi faingamālie ʻoku lava ke tau vahevahe ai ʻa e ngaahi moʻoni ʻo e Tohi Tapú mo e niʻihi kehé. Lau ʻa e Saame 9:1 mo e 34:1, pea lāulea leva ki he fehuʻi ko ení:

• Ko e hā ha meʻa kuó ke ako mei he Tohi Tapú ʻokú ke saiʻia ke tala ange ki ha taha?

FAKANOUNOU

ʻOku tau fakahōifua ki hotau Tokotaha-Fakatupú ʻi heʻetau lotu kiate ia pē, fakahīkihikiʻi ia ʻi he ngaahi fakataha ʻa e fakatahaʻangá pea vahevahe ki he niʻihi kehé ʻa e meʻa kuo tau akó.

Fakamanatu

• ʻOku tau ʻilo mei fē ʻa e founga ke lotu fakahōifua ai ki he ʻOtuá?

• Ko e hā ʻoku totonu ai ke tau lotu pē kia Sihová?

• Ko e hā ʻoku totonu ai ke tau lotu fakataha mo e faʻahinga ʻoku loto ke fakahōifua ki he ʻOtuá?

AKO LAHI ANGE

ʻI he talanoa “ʻOku ʻIkai Ke U Toe Ngāue Fakatamaioʻeiki ki he Ngaahi ʻAitolí,” lau ki he meʻa naʻe fai ʻe ha fefine ke ʻoua toe ngāueʻaki ʻa e ngaahi ʻaitolí ʻi heʻene lotú.

“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)

Ako ki he meʻa ʻoku lava ke ne tokoniʻi koe ke fai ʻa e ngaahi talí ʻi he ngaahi fakataha ʻa e fakatahaʻangá.

“Fakahīkihikiʻi ʻa Sihova ʻi he Fakatahaʻangá” (Ko e Taua Leʻo, Sanuali 2019)

Sio ki he maʻu ʻaonga ha talavou mei hono maʻu ʻa e ngaahi fakataha ʻa e fakatahaʻangá neongo naʻe ʻikai faingofua ia kiate ia.

Naʻe Tokangaʻi Au ʻe Sihova (3:07)

Ko e kakai tokolahi ʻoku nau fakafekauʻaki ʻa e kolosí mo e lotu faka-Kalisitiané, ka ʻoku totonu ke tau ngāueʻaki ia ʻi heʻetau lotú?

“Ko e Hā ʻOku ʻIkai ke Ngāueʻaki Ai ʻe he Kau Fakamoʻoni ʻa Sihová ʻa e Kolosí ʻi Heʻenau Lotú?” (Kupu ʻi he uepisaití)