Ko e Fakataha-Lahi Fakavahe 2002 “Kau Fanongonongo Faivelenga ʻo e Puleʻangá” ʻa e Kau Fakamoʻoni ʻa Sihová
1 “Ne u fiefia ʻi heʻenau pehe kia kita, ‘Tau o ki he fale ʻo Sihova.’” (Sāme 122:1) ʻI hono sivisiviʻi ʻa e fakamatala ʻa e tokotaha-tohi-sāmé, fakatokangaʻi (1) ʻa e anga ʻo ʻene ongoʻí ʻi he taimi naʻe fakaafeʻi ai ia ke ne kau ʻi he lotu kia Sihová, (2) ko e ngaahi kaungāfeohi lelei naʻá ne maʻú, ʻa ia naʻa nau toe mahuʻingaʻia loto-vēkeveke ʻi he lotu moʻoní, pea (3) mo e palani kuo pau naʻe fiemaʻu ke fakalahi atu ai ʻa e fakaafé, ke fakatahataha fakataha, pea ke fai ha fononga ki he fale ʻo e ʻOtuá.
2 ʻIkai ʻoku fakaongo atu ʻe he ngaahi lea ʻa e tokotaha-tohi-sāmé ʻa ʻetau ongoʻí tonu ʻi he taimi ʻoku tau fanongo ai kuo ʻosi fai ha ngaahi palani ki heʻetau fakataha-lahi hoko maí? ʻOku fakafonu kitautolu ʻaki ʻa e fakatuʻamelié ʻi heʻetau manatu ki he ngaahi fiefia ʻo e ngaahi fakataha-lahi he kuohilí pea mo e toe ʻamanaki atu ko ia ki ha toe fakatahataha makehe mo e ngaahi kaungā ʻofa kia Sihová. Kuo fai ha ngaahi fokotuʻutuʻu ki he ngaahi Fakataha-Lahi Fakavahe “Kau Fanongonongo Faivelenga ʻo e Puleʻangá” ʻaho ʻe tolu ʻi he feituʻu vaʻa ʻo Nuʻu Silá ki he 2002. Ko e taimi ʻeni ke fai ai ʻetau ngaahi palaní ke kau pea ke maʻu ʻa e ʻaonga kakato tahá mei he kātoanga fakalaumālie ʻoku tatali mai kia kitautolú.
3 Kuo ʻosi kamata teuteu ʻe he “setuata anga-tonú, ʻa e tokotaha potó,” ha meʻakai fakalaumālie taimi totonu ke ʻomai ʻi he fakataha-lahí. (Luke 12:42, NW) Kuo ʻosi vaheʻi ʻa e fakatahaʻanga taki taha ki ha fakataha-lahi pau koeʻuhi ke lava ʻo fakaʻehiʻehi ai mei he fuʻu tokolahi ʻi he feituʻu faiʻanga fakataha-lahi taki taha pea ʻi he feituʻu ʻoku ʻi ai ʻa e ngaahi hōtelé/mōtelé. Tānaki atu ki ai, kuo kamata fokotuʻutuʻu ʻe he fanga tokoua tokolahi ha ngaahi potungāue fakataha-lahi kehekehe koeʻuhi “ko e meʻa kotoa pe ke fai ke tāu mo māu.” (1 Kol. 14:40) ʻI he fokotuʻu ha ngaahi meʻa lahi ʻaupito ke ʻaonga mo fakafaingamālie ai kiate kitautolú, ko e hā ʻe lava ke tau fai fakafoʻituitui ke teuteu atu ai ki he fakataha-lahí?
4 Ko Hono Fai Hoʻo Ngaahi Fokotuʻutuʻu Nofoʻangá: Kuo fai ʻa e kau malanga tokolahi taha ki he fakahinohino māʻalaʻala kuo ʻomai ʻi he ngaahi fakalahi ki he ngaahi fakataha-lahí ʻi he ngaahi taʻu siʻi kuohilí ʻi he ʻEtau Ngāue Fakafaifekau ʻo e Puleʻanga, pea naʻe hokosia ai ha ngaahi ola lelei lahi. Kae kehe, ʻoku kei fiemaʻu pē ke fai ha kole atu ki he tokotaha kotoa pē ke KĀTAKI ʻO NGĀUEʻAKI ʻA E FAKAHINOHINO KO ʻENÍ KI HONO MAʻU ʻA E NGAAHI NOFOʻANGA MŌTELÉ:
(a) Kātaki ʻoua ʻe taʻofi ha mōtele ʻoku ʻikai te ke fakataumuʻa ke ngāueʻaki pe ko ha mōtele lahi ange he tahá ʻi he fakakaukau ki hano ʻuluaki vakaiʻi ʻa e mōtele taki taha pea toki filiʻi leva ʻa e mōtele ʻoku lelei tahá, kae kaniseli ʻa e ʻū mōtele kehé. (Mt. 5:37) Ko e taʻeʻofa ʻeni, pea ʻoku taʻofi ai ʻa e ʻū mōtelé mei he maʻu ʻa e pisinisi naʻe mei malava ke nau maʻú. ʻOku toe toʻo ai foki mei he kau malanga kehé ʻa hono ngāueʻaki ʻa e ngaahi loki ko iá, ʻa ia ʻoku faʻa mātuʻaki fiemaʻú.
(e) ʻOua ʻe taʻofi ha ngaahi loki mōtele maʻau pe ki ha niʻihi kehe ʻo ʻikai ke fakahā ʻa e ngaahi hingoá mo ʻave leva ʻa e ngaahi tipōsiti ki he loki taki taha. ʻI he ʻikai ha tipōsití, ʻoku ʻi ai leva ʻa e totonu ʻa e mōtelé ke ʻoange ho lokí ki ha taha kehe.
(f) ʻOua ʻe ʻai ha kakai tokolahi ange ke nau nofo ʻi he lokí ʻo tokolahi ia mei he lao pea mo e meʻa ʻoku fakaʻatā ʻe he fokotuʻutuʻú, ʻa ia ʻoku faʻa angamaheniʻaki ke ʻoua ʻe toe laka hake he toko fā pē pe ko e toko nima, ʻo kau ai ʻa e fānaú. Manatuʻi, ʻokú ke totongi ʻa e mahuʻingá ʻo fakatatau ki he lahi ʻo e faʻahinga naʻa mo LOTO-TAHA ke ʻi he lokí.
(h) ʻOua ʻe lēsisita ki muʻa ʻi he 1:00 efiafí pe ko e hā pē ʻa e founga ngāue ʻa e mōtelé. Te ke lēsisita nai hili ʻa e polokalama ʻo e ʻaho ko iá, koeʻuhi he ʻoku maluʻi ʻe hoʻo tipōsití ho lokí.
(i) ʻOua ʻe feimeʻakai pe fakamafana meʻakai ʻi he lokí tuku kehe ka ʻoku ʻi ai hano peito ki he taumuʻa ko iá, pea ke tokanga ke ʻoua ʻe ʻuliʻi ha meʻa pē ʻi he lokí ʻaki ʻa e meʻakaí.
5 Ko e muimui ʻi he fakahinohino ko ʻení ʻoku ʻomai ai kia kitautolu ha faingamālie ke fakahāhā ʻetau ʻofa ki hotau fanga tokoua Kalisitiané. (1 Kol. 10:24; 1 Tim. 6:8) Kae kehe, ko hano maumauʻi ʻa e ngaahi tafaʻaki ko ʻení ʻoku ʻomai ai ʻa e luma ki he huafa mo e kautaha ʻa Sihová.—Sāme 119:168.
6 Vakai Holo ʻi he Fakatahaʻangá: Kapau ʻoku tau ʻiloʻi ha tokoua pe ko ha tuofefine ʻoku ʻi ai haʻane fiemaʻu fakaesino pe fakamatelie ʻoku faingataʻa ai kiate ia ke ne maʻu ʻa e fakataha-lahí, ʻe lava ke tau “fano” atu ʻetau ʻofá pea fai ha tokoni? (2 Kol. 6:12, 13; Teu. 15:7) Ko e laumālie ʻeni naʻe fakaʻaiʻai ʻe Paula ʻi he 2 Kolinito 8:14. Ko e hā ʻoku ʻikai te ke fakaafeʻi ai ʻa e faʻahinga peheé ke nau ʻalu fakataha mo koe ki he fakataha-lahí? Kapau ko ha kau tāimuʻa kinautolu, ngalingali ʻoku ʻi ai ʻenau ngaahi meʻa lelei lahi naʻe hokosia ke vahevahe ia mo koe ʻi he lolotonga ʻo e fonongá. Kapau ko ha ngaahi mēmipa taʻumotuʻa kinautolu ʻo e fakatahaʻangá, ʻoku nau maʻu nai ha talanoa fakateokalati fakaofo kuo teʻeki ai ke ke fanongo ai ki muʻa. ʻIkai ko e feohi mo e fanga tokoua pea mo e fanga tuofāfine ko ʻení ko ha tākiekina lelei ia kiate koe mo ho fāmilí? Te nau fakahoungaʻi hoʻo nima-homó pea ʻe fakapaleʻi ia ʻe Sihova.—Pal. 28:27; Mt. 10:42.
7 Neongo ko e faʻahinga ko ia ʻoku ʻi ai ʻenau ngaahi fiemaʻu makehé ʻoku tokangaʻi tefito ia ʻe honau ngaahi kāinga Kalisitiané, ko e kau mātuʻa mo e niʻihi kehe ʻi he fakatahaʻangá ʻoku nau ʻiloʻi ʻa e ngaahi fiemaʻu peheé ʻe lava ke nau tokoni anga-ʻofa ʻi hano fai ha ngaahi fokotuʻutuʻu. (1 Tim. 5:4) ʻI he taimi ʻoku ʻoatu ai ki he Kōmiti Ngāue ʻa e Fakatahaʻangá ʻa e ngaahi foomu Special Needs Room Request, ʻoku totonu ke sivisiviʻi ʻe he kōmití pe ʻoku taau ki ai ʻa e tokotaha tohi kole taki taha ki muʻa ke ʻoatu ʻa e ngaahi foomu ko ʻení ki he Potungāue Nofoʻangá. ʻOku totonu ke fakakau ʻe he sekelitali ʻa e fakatahaʻangá ʻa ʻene fika telefoní ʻi he fōmú koeʻuhi ke lava ʻa e Potungāue Nofoʻangá ʻo fetuʻutaki kiate ia ʻo kapau ʻe ʻi ai ha faʻahinga fehuʻi. Meiliʻi ʻa e ngaahi foomu kuo ʻosi talí ki he tuʻasila ʻo e fakataha-lahí ʻoku fakahaaʻi ʻi he tafaʻaki ʻe taha ʻo e fōmú.
8 Tali Loto-Lelei ʻi he Tuʻunga ko ha Tokotaha Pole: ʻI he lolotonga ʻa e fakataha-lahí, ʻoku tokoni ai ʻa e kau ngāue pole ʻe laui teau ki he lele lelei ʻa e ngaahi potungāué. ʻOku tokonaki ʻe he kau fakanofonofo ʻi he holó mo e ngaahi tauʻanga meʻalelé ha fakahinohino ki he nofoʻangá pea tokangaʻi mo ʻetau ngaahi meʻalelé he lolotonga ʻa e ʻahó. ʻOku maʻu ʻe he Potungāue Fakamaʻá ʻa e monū ko hono hakeakiʻi hotau tuʻunga ongoongo lelei ʻi he maʻá, ʻo ʻai ai hotau feituʻu faiʻanga lotu fakataimí ke maʻa ange ʻi he ki muʻa ke tau ngāueʻaki iá. ʻE lava ke tau tokoni heni pe ko ha ngaahi potungāue kehe ʻe lava ke ngāueʻaki ai ʻetau poupoú? Te ke foaki loto-lelei atu hoʻo tokoní ke ngāue “uouangataha” mo ho fanga tokouá?—Sef. 3:9.
9 ʻOku Fakatokangaʻi Moʻoni ʻe he Kakaí ʻa e Meʻa ʻOku Tau Faí? ʻI he lolotonga ha fakataha-lahi fakavahe he taʻu ko ʻeni kuohilí, naʻe ngāue ai ʻi ha hōtele ha tangata naʻá ne taʻofi ʻa ʻene ako mo e Kau Fakamoʻoni ʻa Sihová ʻi he taʻu ʻe 20 kuo maliu atú. Naʻá ne tala ange ai ki ha Kau Fakamoʻoni ʻokú ne fakakaukau he taimí ni ke toe hoko atu ʻene ako Tohitapú pea toe foki ki he ngaahi fakatahá. Ko e hā hono ʻuhingá? Koeʻuhi ko e tōʻongafai anga-ʻofa naʻe fai ange kiate ia he lolotonga ʻo e ngaahi ʻaho naʻe ʻi he hōtelé ai ʻa e Kau Fakamoʻoní.
10 Naʻe pehē ʻe ha tokotaha tuʻuaki koloa ʻi he hōtelé ʻo fekauʻaki mo hotau fanga tokouá: “Ko homou kulupú ʻa e kulupu lelei taha ʻoku nofo ʻi homau hōtelé. Ko homou kakaí ʻoku nau anga-kātaki mo anga-fakaʻapaʻapa ʻaupito.” He laukau ē kuo pau ke hoko ki heʻetau Tamai fakahēvaní ʻi heʻene vakai mai ʻoku tau muimui ki he akonaki ʻa Sīsuú: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani”!—Mt. 5:16.
11 ʻOfa ke tau tapua atu ʻa e fakakaukau ʻa Tuʻi Tēvitá, ʻa ia naʻá ne fakatuʻamelie fiefia ke ʻalu ki he fale faiʻanga lotu ʻo Sihová. Ko ʻetau ngaahi fakataha-lahi fakavahé ko ha matavai mātuʻaki mahuʻinga ia ʻo e meʻakai fakalaumālié pea mo ha faingamālie taʻehanotatau ki ha feohi anga-ʻofá. Ko ia ai, ʻoku mau fakaafeʻi loto-māfana atu kimoutolu ke kamata ʻa hono fai haʻamou ngaahi fokotuʻutuʻu ke maʻu ʻa e ngaahi konga kotoa ʻo e ʻaho kotoa ʻe tolu ʻo e Fakataha-Lahi Fakavahe “Kau Fanongonongo Faivelenga ʻo e Puleʻangá” ʻi he taʻu ní!
[Puha ʻi he peesi 3]
Taimi ʻo e Polokalamá
Falaite mo e Tokonaki
9:30 pongipongi – 5:00 efiafi
Sāpate
9:30 pongipongi – 4:00 efiafi
[Puha ʻi he peesi 6]
FEITUʻU ʻAHO NGAAHI SĒKETÍ
TONGA Sepitema 20-22, 2002 Tonga
Holo Fakamanatu Kuini Sāloté
NUKUʻALOFA
(Faka-Tonga, faka-Pilitānia ʻe niʻihi)
PALMERSTON NORTH—1 ʻOkatopa 4-6, 2002 3A, 3B, 3C
Manawatu Sports Stadium,
Pascal Street, Palmerston North
PALMERSTON NORTH—2 ʻOkatopa 11-13, 2002 4A, 4B, 5A Konga (Turangi), 5C
Manawatu Sports Stadium,
Pascal Street, Palmerston North
FAKATAHA-LAHI ʻOKALANI (SM) ʻOkatopa 25-27, 2002 10 Konga (Auckland SM, Avondale SM,
South Auckland Assembly Hall Christchurch SM, Manukau SM,
160 Clevedon Road, Papakura Manurewa SM, Porirua SM)
CHRISTCHURCH ʻOkatopa 25-27, 2002 1A, 1B, 2A, 2B
Westpac Trust Centre
Whiteleigh Avenue, Addington
Christchurch
(Lea-fakaʻilonga foki)
HAMILTON—1 ʻOkatopa 25-27, 2002 5A Konga (Murupara, Putaruru,
Mystery Creek Events Centre Westbrook Rotorua, North & South Taupo,
Mystery Creek Road, Hamilton North & South Tokoroa), 5B, 6A, 6B, 7A, 7B
HAMILTON—2 Nōvema 1-3, 2002 7C, 8A, 8B, 9A, 9B, F10 Konga (Auckland
Mystery Creek Events Centre Chinese, Auckland Korean, Auckland
Mystery Creek Road, Hamilton Niuean, Auckland Rarotongan,
(Lea-fakaʻilonga foki) Auckland Tongan, Niue Is)
LALOTONGA Nōvema 8-10, 2002 Rarotonga, Aitutaki (ʻOtu Motu Kuki)
Assembly Hall, Vaimaanga,
Rarotonga, ʻOtu Motu Kuki