ʻE Lava Fēfē Ke Ke Fakahōifuaʻi ʻa Sihova ʻi Hoʻo Leá?

ʻI hono fakatupu kitautolu ʻe Sihová, naʻá ne ʻomai ha meʻaʻofa fakaofo, ʻa ia ko e malava ke leá. ʻOku mahuʻinga kiate ia ʻa e founga ʻoku tau ngāueʻaki ai ʻa e meʻaʻofa ko iá? ʻIo, ʻoku moʻoni ia! (Lau ʻa e Sēmisi 1:26.) Ko ia ai, ʻe lava fēfē ke tau ngāueʻaki ʻetau malava ke leá ʻi ha founga te tau fakahōifuaʻi ai ʻa Sihova?

1. ʻOku totonu ke fēfē ʻetau ngāueʻaki ʻa e meʻaʻofa ʻo e leá?

ʻOku tala mai ʻe he Tohi Tapú kiate kitautolu ke “hanganaki fefakalototoʻaʻaki mo felangahakeʻaki.” (1 Tesalonaika 5:11) ʻE lava ke ke fakakaukau ki ha faʻahinga ʻoku nau fiemaʻu ha fakalototoʻa? Ko e hā ʻe lava ke ke faí ke ʻai kinautolu ke ongoʻi lelei angé? Tala ange kiate kinautolu ʻoku nau mahuʻinga kiate koe. ʻE lava ke ke tala ange ʻa e meʻa ʻokú ke houngaʻia ai fekauʻaki mo kinautolú. ʻOkú ke ʻilo ha konga Tohi Tapu ʻe lava ʻo fakalototoʻa ki ha taha ʻokú ke ʻilo? ʻOku lahi ʻa e ngaahi veesi Tohi Tapu ʻe lava ke ke ngāueʻakí. Manatuʻi foki, ko e founga hoʻo leaʻaki ha meʻá ʻe lava ke maongo loloto, ʻo tatau pē ia mo e ngaahi foʻi lea ʻokú ke ngāueʻakí. Ko ia feinga maʻu pē ke lea anga-lelei mo anga-malū.​—Palōveepi 15:1.

2. Ko e hā ʻa e faʻahinga lea kuo pau ke tau fakaʻehiʻehi mei aí?

ʻOku pehē ʻe he Tohi Tapú: “Tuku ke ʻoua ʻe haʻu mei homou ngutú ha lea palakū.” (Lau ʻa e ʻEfesō 4:29.) ʻOku ʻuhinga ení ʻoku ʻikai ke tau ngāueʻaki ha lea kapekape pe leaʻaki ha meʻa ʻoku mātuʻaki anga-kovi pe taʻeʻofa mo e taumuʻa ke fakamamahiʻi ha taha. Kuo pau foki ke tau toe fakaʻehiʻehi mei he lau fakatupu maumaú mo e lauʻikovi loí.​—Lau ʻa e Palōveepi 16:28.

3. Ko e hā te ne tokoniʻi kitautolu ke lea ʻi ha founga fakatupu langa haké?

Ko e ngaahi meʻa ʻoku tau leaʻakí ʻoku faʻa fakaeʻa ai ʻa e meʻa moʻoni ʻi hotau lotó pe ko e meʻa ʻi heʻetau fakakaukaú. (Luke 6:45) Ko ia ʻoku tau fiemaʻu ke akoʻi kitautolu ke tokangataha ki he ngaahi meʻa leleí, ʻa ia ko e ngaahi meʻa ʻoku māʻoniʻoní, maʻá, ʻofeiná mo e meʻa ʻoku taau ke fakahīkihikiʻí. (Filipai 4:8) Ke tokangataha ki he ngaahi meʻa ko ení, kuo pau ke tau fili fakapotopoto ʻetau fakafiefiá mo hotau ngaahi kaumeʻá. (Palōveepi 13:20) ʻOku toe tokoni ke tau fakakaukau ki muʻa ke tau leá. Fakakaukau ki he anga ʻo e ongoʻi ʻa e niʻihi kehé fekauʻaki mo e meʻa ʻokú ke leaʻakí. ʻOku pehē ʻe he Tohi Tapú: “Ko e lea taʻefakakaukaú ʻoku hangē ia ko hano hokohokaʻi ʻe ha heletaá, ka ko e ʻelelo ʻo e potó ko ha faitoʻo.”​—Palōveepi 12:18.

KELI LOLOTO ANGE

4. Mapuleʻi hoʻo leá

ʻI he taimi ʻe niʻihi, ʻoku tau leaʻaki ʻa e ngaahi meʻa ʻoku tau fakaʻiseʻisa ai ki mui. (Sēmisi 3:2) Lau ʻa e Kalētia 5:22, 23, pea lāulea leva ki he ongo fehuʻi ko ení:

• Ko fē ʻi he ngaahi ʻulungaanga ko ení ʻoku lava ke ke lotu fekauʻaki mo ia ke ne tokoniʻi koe ke mapuleʻi hoʻo leá? ʻE anga-fēfē hano tokoniʻi koe ʻe he ngaahi ʻulungaanga ko ení?

Lau ʻa e 1 Kolinitō 15:33, pea lāulea leva ki he fehuʻi ko ení:

• ʻE tākiekina fēfē ʻa e ngaahi lea ʻokú ke ngāueʻakí ʻe he ngaahi kaumeʻá mo e fakafiefia ʻokú ke filí?

Lau ʻa e Tangata Malanga 3:1, 7, pea lāulea leva ki he fehuʻi ko ení:

• Ko fē nai ʻa e taimi ʻoku fakapotopoto ai ke hanganaki fakalongolongo pe tatali ki ha taimi lelei ange ke toki leaʻaki ha meʻa?

5. Lea lelei fekauʻaki mo e niʻihi kehé

VITIŌ: Leaʻaki ʻa e “Meʻa ʻOku Lelei ke Langa Hake” ʻa e Niʻihi Kehé (4:07)

• ʻI he vitioó, ko e hā naʻe loto ai ʻa e tokoua ko ení ke liliu ʻa e founga ʻene lea fekauʻaki mo e niʻihi kehé?

• Ko e hā naʻá ne fai ke liliú?

Lau ʻa e Tangata Malanga 7:16, pea lāulea leva ki he fehuʻi ko ení:

• Ko e hā ʻoku totonu ke tau manatuʻí ʻi he taimi ʻoku tau hehema ai ke leaʻaki ʻa e ngaahi meʻa ʻikai lelei fekauʻaki mo ha taha?

Lau ʻa e Tangata Malanga 7:21, 22, pea lāulea leva ki he fehuʻi ko ení:

• ʻE lava fēfē ke tokoniʻi koe ʻe he ongo veesi ko ení ke hanganaki nonga ʻi he taimi ʻoku leaʻaki ai ʻe ha taha ha meʻa ʻikai lelei fekauʻaki mo koé?

6. Lea anga-ʻofa ki ho fāmilí

VITIŌ: ʻOfá mo e Fakaʻapaʻapá ʻOkú Na Fakafāʻūtahaʻi ʻa e Ngaahi Fāmilí (3:08)

• Ko e hā te ne tokoniʻi koe ke lea anga-lelei ki ho fāmilí?

Lau ʻa e ʻEfesō 4:31, 32, pea lāulea leva ki he fehuʻi ko ení:

• Ko e faʻahinga lea fēfē ʻokú ne langa hake ha fāmili?

Naʻe fakahaaʻi ʻe Sihova ʻa e anga ʻene ongoʻi fekauʻaki mo hono ʻAló, ʻa Sīsū. Lau ʻa e Mātiu 17:5, pea lāulea leva ki he fehuʻi ko ení:

• ʻE lava fēfē ke ke faʻifaʻitaki kia Sihova ʻi he founga ʻokú ke fetuʻutaki ai mo ho fāmilí?

FAKANOUNOU

Ko e meʻa ʻoku tau leaʻakí ʻe lava ke tokoni pe fakamamahiʻi ai ʻa e kakaí. ʻOku fiemaʻu ke tau fakakaukau fakalelei fekauʻaki mo e meʻa ʻoku tau leaʻakí, mo e taimi ʻoku tau leaʻaki ai iá mo e founga ke tau leaʻaki iá.

Fakamanatu

• Ko e hā ha ngaahi founga ʻe lava ke ke ngāueʻaki ai hoʻo leá ke tokoni ki he niʻihi kehé?

• Ko e hā ʻa e faʻahinga lea kuo pau ke tau fakaʻehiʻehi mei aí?

• Ko e hā te ne tokoniʻi ʻetau leá ke anga-lelei mo langa hake maʻu pē?

AKO LAHI ANGE

Ko e hā te ne tokoniʻi kitautolu ke lea ʻi ha founga ʻe fakalototoʻaʻi ai ʻa e niʻihi kehé?

Fakatupulekina ʻa e ʻElelo ʻo e Potó (8:04)

Ako ki he meʻa te ne tokoniʻi koe ke fakaʻehiʻehi mei he lea koví.

“ʻOku Kovi Nai ʻa e Lea Koví?” (Kupu ʻi he uepisaití)

Sio ki he founga ʻe lava ke ke fakaʻehiʻehi ai mei he tō ki he fakatauele ʻo e lau fakatupu maumaú.

ʻE Lava Fēfē Ke U Taʻofi ʻa e Laú? (2:36)

Sio ki he founga hono tokoniʻi ʻe Sihova ha tangata naʻe fāinga ke tuku ʻene kapekapé.

“Naʻá Ku Kamata ke Fakakaukau Fakamātoato ki he Feituʻu Naʻe Huʻu ki Ai ʻEku Moʻuí” (Ko e Taua Leʻo, Sepitema 1, 2013)